Kufita 12
12
Jingaui Iku ku kua
1Moizi do Arɔ̃ɔ à bɛi à fita hai ilɛi Ezibiti Aɔ̃ Lafɛ̃ɛ í sɔ̃ ŋa í ni, 2cukpau ihɛ̃i á jɛ nŋɛ cukpa sintei adɔ̃. 3I koo i sɔ̃ inɛi Izirɛli ŋa i ni, si ajɔ mɛɛwasiai cukpau ihɛ̃ ilu kpasɛ̃ fei ku nya ama angudã walakɔ ama iwo akã ti kpasɛ̃ɛ. 4Bii kpasɛ̃u kù la bɛi á yɔkɔ ku ŋɔ mɛɛmu akã, aa gbɔsi njɛi do kpasɛ̃ gɔ iyi í wa amɛɛ bɛ si zaka bɛi kukpɔi amanɛ ŋau í to, nɔ a mu mɛɛmu iyi aa yɔkɔ a ŋɔ a tãa. 5Angudã komboi adɔ̃ akã iyi kù nɛ leebu gɔi aa so. Aa yɔkɔ i mu ama angudã walakɔ ama iwo ŋa. 6Aa máa mu ŋa ŋai hee ajɔ maatɛ̃ɛsiai cukpau ihɛ̃, nɔ alɛ ajɔ nŋu bɛi, aa kpa ŋa ŋa. 7Aa bu njɛui i jɔsi jĩi mɛɛtai andɛi ile ŋa tengi bii aa ŋɔɔ ŋau. 8Aa banda iŋau ŋai nɔ i ŋɔɔ idũu bɛ do pɛ̃ɛ hai nɛ levɛ̃ɛ do fɔfɔ kuro gɔ ŋa. 9I kaa ŋɔɔ bii kù jĩa ŋa, nɔ i maà sòó ŋa, amma si inai aa bandaɛ ŋa, hai iriu do kutɛ ŋau do mii ndii inɔ ŋau fei. 10I maà jɔ̀ kãmaɛ ku gbe hee daakɔ ŋa, nɔ bii gɔgɔ í gbe daakɔ i joo ŋa. 11Yaase bɛi aa ŋɔɔò ŋa wee. Aa tã sɔɔlui isɛɛnɛ, nɔ i dasi jĩnɛ iyi i ya bɔò ilu ŋai, nɔ i dasi baata nŋɛ ŋa, nɔ i máa mu golo nŋɛ ŋa, nɔ i ŋɔɔ do saasa ŋa. Nŋui í jɛ jingaui Aɔ̃ Lafɛ̃ɛ iyi à ya kpe Iku ku kua.
12Idũ ajɔ nŋu bɛ an dabii si ilɛi Ezibiti, nɔ an kpa inɛ ŋa iyi à bí sinte si ilɛu fei, hai amanɛ ŋa hee ku koo si mɛɛmu ŋa fei. Bɛɛbɛi an nyisiò iyi iwɛ̃i inɛi Ezibiti ŋau a kù nɛ gbugbã, nɔ amu akãi ǹ jɛ Aɔ̃ Lafɛ̃ɛ. 13Njɛui á jɛ nyindai kpasɛ̃ bii ì wa ŋa. Bii ǹ naa n yɛ njɛu an kua ŋɛi n kaa n leekĩ bi tu ŋɛ nɔ laalɔ kãma kaa ba ŋɛ ku kpa ŋɛ waati iyi an naa n kpã inɛi Ezibiti ŋau iju.
14Na nŋu, i ya ye gigii ajɔu ihɛ̃ ŋa nɔ i ya jɛ jingau i jirimam do ŋa, amu Aɔ̃ Lafɛ̃ɛ. Jingau bɛi á jɛa iŋɛ do ama nŋɛ ŋa wooda iyi aa maa too si ŋa adɔ̃ do adɔ̃ hee do ajɔ fei.
Jingaui Pɛ̃ɛ hai nɛ levɛ̃ɛ
15Aɔ̃ Lafɛ̃ɛ í sɔ̃ ŋa má í ni, zakai ajɔ mɛɛje pɛ̃ɛ hai nɛ levɛ̃ɛi aa maa jɛ ŋa. Hai ajɔ sinteu levɛ̃ɛ kaa wa si kpasɛ̃ nŋɛ ŋa má, domi inɛ iyi í jɛ pɛ̃ɛ ku tɔtɔɔò levɛ̃ɛ hai ajɔ sinteu hee ku bɔ ajɔ mɛɛjesiau fei, aa nyaai hai si inɔi inɛi Izirɛli ŋa. 16Si ajɔ sinteu do si ajɔ mɛɛjesiau aa ya tɔtɔɔ ŋai i maa tɔɔm ŋa. Ajɔ nŋu ŋau bɛ i kaa ya ce icɛ kãma ŋa í gbe ijɛ iyi aa ya ce ŋa inɛ fei ku jɛ.
17Jingaui Pɛ̃ɛ hai nɛ levɛ̃ɛu ihɛ̃ aa ya ce nŋu mɔ ŋai i maa yeò gigii ajɔ iyi ǹ nya ŋɛ iŋɛ zamaa nla nla hai ilɛi Ezibiti. Jingau á jɛa iŋɛ do ama nŋɛ ŋa wooda iyi aa maa too si ŋa adɔ̃ do adɔ̃ hee do ajɔ fei. 18Pɛ̃ɛ hai nɛ levɛ̃ɛ ŋai aa jɛ ŋa hai alɛi ajɔ maatɛ̃ɛsiai cukpa sinteu hee ku bɔ si alɛi ajɔ kɔnfia do akãsia. 19Zakai ajɔ mɛɛje levɛ̃ɛ kaa wa si kpasɛ̃ nŋɛ ŋa má, domi inɛ iyi í jɛ pɛ̃ɛ ku tɔtɔɔò levɛ̃ɛ, aa nyaai hai si inɔi inɛi Izirɛli ŋa, bii isɛ mmui walakɔ baa bii inɛi Izirɛlii. 20I kaa jɛ nkãma iyi í nɛ levɛ̃ɛ ŋa. Tengi bii ì wa ŋa fei, pɛ̃ɛ hai nɛ levɛ̃ɛ ŋai aa jɛ ŋa.
Sɔɔlui ijɛi jingaui Iku ku kua ku ce
21Ŋɔi Moizi í kpe inɛ ngboi inɛi Izirɛli ŋau fei í sɔ̃ ŋa í ni, i koo i cica si mɛɛmui kpasɛ̃ nŋɛ ŋa nɔ i saka ŋa i ceò jingaui Iku ku kuau ŋa. 22Nɔ i so amaawɔi jĩi ndii izɔpu, i gũsi njɛ iyi i wa inɔ jɛɛu nɔ i jɔsi jĩi mɛɛta andɛi ile ŋau. Waati iyi ì jɔsi njɛu ŋa, inɛ kãma ku maà fita hai ileɛ má hee iju koo máu.
23Waati iyi Aɔ̃ Lafɛ̃ɛ á na ku kpã inɛi Ezibiti ŋau iju, bii í yɛ njɛu á lɔi. Kaa jɔ̀ woo kpa inɛ ŋa a lɔ kpasɛ̃ nŋɛ a kpa ŋɛ. 24Iyi bɛi á jɛa iŋɛ do ama nŋɛ ŋa wooda iyi aa ya maa too si ŋa adɔ̃ do adɔ̃ hee do ajɔ fei. 25Bii ì na ì to si ilɛ iyi Aɔ̃ Lafɛ̃ɛ í wã nŋu ku mu nŋɛu, i ya maa coo ŋa. 26Nɔ bii ama nŋɛ ŋa à bee ŋɛ à ni, yoomai í jɛ yaasei mii iyi ì waa ceu bɛ ŋa, 27i ya jɛ nŋa i ni, kuweei Iku ku kuai iyi à ya cea Aɔ̃ Lafɛ̃ɛ. Waati iyi awa inɛi Izirɛli ŋa à wa ilɛi Ezibiti, Aɔ̃ Lafɛ̃ɛ í kpa inɛi Ezibiti ŋau amma í faaba wa í kua kpasɛ̃ nwa ŋa.
Iyi Moizi í fɔ bɛɛbɛ í tã, ŋɔi inɛi Izirɛli ŋau à gulɛ à waa tɔɔ Ilaaɔ̃. 28Ŋɔi à koo à ce mii iyi Aɔ̃ Lafɛ̃ɛ í sɔ̃ Moizi do Arɔ̃ɔ í ni a ceu fei.
Wahalai ankãanyi - ikui ama yemmai inɛi Ezibiti ŋa
29Zakai idũ laja Aɔ̃ Lafɛ̃ɛ í kpa inɛ ŋa iyi à bí sinte fei si ilɛi Ezibiti, hai ama yemmai Faraɔ̃ ilaaluu, hee ku koo si ama yemmai inɛi piisɔ̃ɔ ŋa, do mɛɛmu ŋa iyi à bí sinte fei. 30Idũ ajɔ nŋu bɛ Faraɔ̃ do akaweɛ ŋa do inɛi Ezibiti ŋau fei à dede nɔ à waa dɔ̃ anu nla nla bii fei si ilɛu, domi kpasɛ̃ kãma kù wɛɛ iyi inɛ gɔ kù ku. 31Hee iju ku maa má Faraɔ̃ í kpe Moizi do Arɔ̃ɔ í sɔ̃ ŋa í ni, i dede i fita hai si ilɛm, iŋɛ do inɛ nŋɛ ŋa. I koo i cea Aɔ̃ Lafɛ̃ɛ kutɔɔ si bɛi ì tɔɔm ŋa wo. 32I gbã mɛɛmu nŋɛ ŋa fei bɛi iŋɛ taka nŋɛ ì fɔ wo nɔ i nɛ ŋa. Si anyiɛ nɔ i tɔɔ Aɔ̃ Lafɛ̃ɛ nŋɛ ku weem.
33Inɛi Ezibiti ŋau à tamaa bɛi aŋa fei aa naa a kui, nɔ à waa mante inɛi Izirɛli ŋau a fita gbãa gbãa hai ilɛi aŋa. 34Nŋui í jɔ̀ inɛi Izirɛli ŋau à so iyafũi pɛ̃ɛ nŋa ŋa iyi à kpo si jɛɛ nɔ kù dede titãu à biiɛ do acɔ à lesi kɔngɔ à nɛò.
35Amma í ko inɛi Izirɛli ŋau à koo à tɔɔ inɛi Ezibiti ŋau a mua aŋa ibɔ ŋa do mii ndii wura do isɔ fũfũ ŋa tã, si bɛi Moizi í tako í sɔ̃ ŋau. 36Ŋɔi Aɔ̃ Lafɛ̃ɛ í jɔ̀ à ba didɔ̃ bi inɛi Ezibiti ŋau nɔ à ba mii ŋa iyi à tɔɔ ŋau. Bɛɛbɛi à gba mii ndii inɛi Ezibiti ŋau fei.
Kufitai inɛi Izirɛli ŋa hai Ezibiti
37Inɛi Izirɛli ŋau à fita hai ilui Ramusɛsi à waa bɔ ikpa ilui Sukɔtu. Jiai inɛmɔkɔ ŋau í wɛɛi zakai aŋa dubu cĩɔ cĩɔ mɛɛfa (600.000) baai inaabo ŋa do ama keeke ŋa baasi. 38Ŋɔi zamaa nla gɔ wa too ŋa wa hai si dimi ikã ikã fei. Nɔ à nɛ mɛɛmu gaa ŋa nkpɔ nkpɔ, angudã ŋa do kɛtɛ ŋa. 39À so iyafũi pɛ̃ɛ iyi à kpo hai ilɛi Ezibitiu à koo à sɔ̃ò pɛ̃ɛ hai nɛ levɛ̃ɛ, domi à lele ŋai hai ilɛu. A kù ba faya a degbeò pɛ̃ɛu ku dede nɔ a kù ba a kù so kosĩa nŋa ŋa.
40Inɛi Izirɛli ŋau wee adɔ̃ cĩɔ mɛɛ do kuntaai (430) à ce ilɛi Ezibiti bɛ. 41Nɔ si anyii adɔ̃ cĩɔ mɛɛ do kuntaau (430), ajɔ nŋu bɛ, inɛi Aɔ̃ Lafɛ̃ɛ ŋau fei à fita hai ilɛi Ezibiti. 42Si bɛi Aɔ̃ Lafɛ̃ɛ í wɔ̀ njoo idũ ajɔ nŋu ku ba ku nya inɛɛ ŋa hai ilɛi Ezibiti, bɛɛbɛ mɔi adɔ̃ do adɔ̃ fei inɛi Izirɛli ŋa do tɔku nŋa ŋa à nɛ a ya wɔ njooi idũ ajɔ nŋu, domi idũu ti Aɔ̃ Lafɛ̃ɛi.
Woodai jingaui Iku ku kua
43Ŋɔi Aɔ̃ Lafɛ̃ɛ í sɔ̃ Moizi do Arɔ̃ɔ í ni, wooda iyi í jɛ ti jingaui Iku ku kuau wee. Isɛ mmu kãma kù nɛ kpãa ku jɛ ijɛu. 44Aa dasi aru ŋa iyi ì ra do fia fei bango ŋai, waati bɛɛbɛ aŋa mɔ aa yɔkɔ a jɛ. 45Isɛ mmu iyi í naa í buba bi tu ŋɛ walakɔ iyi wa ce icɛ bi tu ŋɛ kù nɛ kpãa ku jɔɔ. 46Hee inɔ ilei aa ŋɔ iŋau ŋa, i maà fitaò waduude ŋa. Nɔ i maà lɛgɛ kũkũ baa akã ŋa. 47Inɛi Izirɛli ŋau feii aa ya ce jingauu ihɛ̃. 48Bii isɛ mmu gɔ í naa í sɔ ideɛ, nɔ wa bi ku ce jingaui Iku ku kuau, inɛmɔkɔ iyi í wa ideɛ fei aa dasiɛ bangoi. Waati bɛɛbɛ á ba kpãa ku ce jingauu, nɔ á yɛi bɛi inɛi ilɛ nŋɛ. Amma inɛ iyi a kù dasi bango kaa jɛ. 49Wooda akãu bɛ mɔi í jɛ ti iŋɛ inɛi Izirɛli ŋa do ti isɛ mmu ŋa iyi à wa bi tu ŋɛ. 50Inɛi Izirɛli ŋau fei à ce bɛi Aɔ̃ Lafɛ̃ɛ í sɔ̃ Moizi do Arɔ̃ɔ fei dee dee. 51Ajɔ nŋu, yaase bɛi Aɔ̃ Lafɛ̃ɛ í ce í nya inɛi Izirɛli ŋa mbɛ tuuba tuuba bɛi sooge ŋa hai ilɛi Ezibiti.
Currently Selected:
Kufita 12: MKL
Highlight
Share
Copy
Want to have your highlights saved across all your devices? Sign up or sign in
2021, SIM International et UEEB
