Kufita 13

Wooda mmu gɔ ŋa iyi à jɛ ti jingaui Iku ku kuau

1Aɔ̃ Lafɛ̃ɛ í ba Moizi ide ku fɔ í ni, 2ama inɛmɔkɔ ŋa iyi à bí sinte ŋau i nya ŋa ikã a jɛ titom, hai amanɛ ŋa hee ku koo si mɛɛmu ŋa fei, aŋa fei titom nii à jɛ. 3Ŋɔi Moizi í sɔ̃ inɛ ŋau í ni, i ya ye gigii ajɔu ihɛ̃ si bii ì fita wa hai ilɛi Ezibitiu ŋa bii ì tako ì jɛ aru ŋa wo. I ya ye gigii ajɔu ŋa si na iyi í jɔ̀ Aɔ̃ Lafɛ̃ɛi í nya ŋɛ hai bɛ do gbugbã nlaɛ. Nɔ si waatiu bɛ i maà ya jɛ pɛ̃ɛ iyi à dasi levɛ̃ɛ í dede ŋa. 4Nnyii ì waa fita ŋa, si cukpa iyi à ya kpe Abibu, waatɔ cukpa bii à ya sinti amaajɛ ŋa ku da. 5Na nŋu, si cukpau ihɛ̃i aa ce jingauu ŋa adɔ̃ do adɔ̃ waati iyi Aɔ̃ Lafɛ̃ɛ á jɔ̀ i lɔ si ilɛi inɛi Kanaã ŋa do ti inɛi Hɛti ŋa do ti inɛi Amɔre ŋa do ti inɛi Hɛvi ŋa do ti inɛi Zebusi ŋa. Ilɛ nŋui Aɔ̃ Lafɛ̃ɛ í cea bala nŋɛ ŋa kuwã do kugbasi í ni nŋu á mu nŋɛ. Tengi bɛi amɔ do nyikɔ̃ wa kɔ̃. 6Zakai ajɔ mɛɛje pɛ̃ɛ hai nɛ levɛ̃ɛi aa maa jɛ ŋa, nɔ si ajɔ mɛɛjesiau aa cea Aɔ̃ Lafɛ̃ɛ jingau ŋai. 7Si ajɔ mɛɛjeu bɛ, pɛ̃ɛ hai nɛ levɛ̃ɛi aa maa jɛ ŋa. Si ilɛ nŋɛ fei i maà jɔ̀ a yɛ pɛ̃ɛ iyi í dede hee má jɛ levɛ̃ɛ takaɛ. 8Si waatii jingauu, i sisia ama nŋɛ ŋa yaaseɛ ŋa i ni, à waa ce jingauu ihɛ̃i ku ba ka ye gigii mii iyi Aɔ̃ Lafɛ̃ɛ í ce nwa waati iyi à fita wa hai ilɛi Ezibiti. 9Jingauu bɛi á jɛ ŋɛ bɛi nyinda gɔ iyi í wa si awɔ nŋɛ ŋa walakɔ si ikpo nŋɛ ŋa, ku ba i ya maa ye gigii woodai Aɔ̃ Lafɛ̃ɛ si faaji nŋɛ ŋa, domi nŋui í nya nŋɛ wa hai ilɛi Ezibiti do awɔ gbugbãɛ. 10Adɔ̃ do adɔ̃ fei aa ya jirima woodau ŋai bii ajɔu í to. 11Ŋɔi Moizi í ni má, bii Aɔ̃ Lafɛ̃ɛ í jɔ̀ ì lɔ si ilɛi inɛi Kanaã ŋa si bɛi í ce kuwã do kugbasi nŋu ku na bala nŋɛ ŋa do iŋɛ taka nŋɛ nɔ í na í na ŋɛ, 12aa jilɛa Aɔ̃ Lafɛ̃ɛ ama inɛmɔkɔ iyi à bí sinte feii hee do ti mɛɛmu ŋau fei. 13Bii í jɛ gbankɛlɛi, angudãi aa dɛdɛ i sãsi agbɛɛ i bɛi i ceò kuwee ŋa. Bii i kù ce bɛɛbɛ mɔ, aa lɛgɛ kpakɔi gbankɛlɛu ŋai i kpaa. Nɔ ama inɛmɔkɔ yemma nŋɛ ŋa mɔ aa ya ŋa ŋai. 14Nɔ bii ama nŋɛ ŋa à na à bee ŋɛ ajɔ akã à ni, yoomai í jɛ yaasei kuceu bɛ, aa jɛ nŋa ŋai i ni, Aɔ̃ Lafɛ̃ɛ í nya wa hai ilɛi Ezibiti do awɔ gbugbãɛ si aru ku jɛ nwa. 15Nɔ si bɛi Faraɔ̃ í kɔ̀ ku jɔ̀ ka nɛ, Aɔ̃ Lafɛ̃ɛ í kpa inɛ ŋa iyi à bí sinte si ilɛi Ezibiti fei, hai amanɛ ŋa hee ku koo si mɛɛmu ŋa fei. Na ŋɔi í jɔ̀ à ya ka maa cea Aɔ̃ Lafɛ̃ɛ kuweei mii iyi í jɛ kombo iyi à bí sinte fei. Nɔ à ya ka ya ama inɛmɔkɔ iyi à bí sinte si inɔi ama nwa ŋa fei. 16Nŋui á jɛ bɛi nyinda si awɔ nŋɛ ŋa do si ikpo nŋɛ ŋa, domi Aɔ̃ Lafɛ̃ɛ í nya wa wai hai ilɛi Ezibiti do awɔ gbugbãɛ.

Ilaaɔ̃ wa gbã inɛɛ ŋa

17Waati iyi Faraɔ̃ í jɔ̀ inɛi Izirɛli ŋau à waa nɛ, Ilaaɔ̃ kù jɔ̀ a kù too kpãa iyi wa bɔ ilɛi inɛi Filisi ŋa baa do iyi kpãa nŋu í kandaa, domi kù waa naanɛ inɛ ŋau a na a kpaasi idɔ nɔ a sinda a nyi Ezibiti má bii à na à waa ce igũ do inɛi ilɛ bɛ ŋa. 18Na ŋɔi í ce í jɔ̀ à sinda à too ikpa kpãai gbaa iyi wa bɔ ikpa Tenkui Njee. Inɛi Izirɛli ŋau à waa nɛ hai ilɛi Ezibitii do sɔɔlui igũ. 19Ŋɔi Moizi í ko kũkũi Zozɛfu ŋau, domi bɛɛbɛi nŋu takaɛ í tako í jɔ̀ igbãɛ ŋau do ifɔɛ à ce kuwã do kugbasi wo si waati iyi í sɔ̃ ŋa í ni, Ilaaɔ̃ á na ku faaba ŋɛ nɔ ku nya ŋɛ hai ihɛ̃, amma bii ì na ì waa nɛ ŋa, i ko kũkũm ŋa i nɛò ŋa. 20Inɛ ŋau à nɛ hai Sukɔtu, nɔ à koo à buba Etamu kɔkɔi gbaau. 21Nɔ Aɔ̃ Lafɛ̃ɛ í ya cua nŋa dasã si kudũi ijĩ#13:21 Kudũi ijĩ Kudũi ijĩ iyi à waa fãau ihɛ̃ kù jɛ dimi akã do kudũi ijĩ iyi à nɛ dɔ̃ɔnɛi ku yɛ si sukui atɛ. Kudũi ijĩ iyi à waa fãau ihɛ̃ í ya dedei hai ilɛ hee koo kã lelei Aɔ̃. ku ba ku gbã ŋa si isɛɛnɛ nŋau, nɔ ku cua nŋa idũ do ina ku ba ku ce nŋa inya kumá, nɔ a maa nɛ dasãò idũ. 22Kudũi ijĩu ci ya sɛkɛɛ hai si wajui inɛ ŋau dasã, bɛɛbɛ mɔi inau ci ya sɛkɛɛ idũ.

Currently Selected:

Kufita 13: MKL

Highlight

Copy