Kufita 1
1
À ce inɛi Izirɛli ŋa aru ilɛi Ezibiti
1Irii amai Izirɛli ŋa iyi à nɛ ilɛi Ezibiti do Zakɔbu do kpasɛ̃ nŋa ŋau wee. 2Rubɛ̃ɛ do Simeɔ̃ do Levii do Zudaa 3do Isakaa do Zabulɔ̃ɔ do Bɛnzamɛɛ 4do Dãa do Nɛfitali do Gadi do Azɛɛ. 5Inɛ ŋa iyi à jɛ inɛi Zakɔbu ŋa à wɛɛi fei sãa sãa aŋa kitaò fɛɛwa. Waati bɛɛbɛ fei Zozɛfu takaɛ í wa Ezibiti tã. 6Si anyii adɔ̃ nkpɔ Zozɛfu í ku nɔ bɛɛbɛ mɔi igbãɛ ŋau do ifɔɛu hee do inɛ ŋa iyi à jɛ saaɛ ŋau fei à na à ku. 7Amma tɔkui Izirɛli ŋau à bí ama nkpɔ nkpɔ nɔ à na à kpɔ à kɔ̃ɔsi jiida hee ilɛu í kɔ̃, nɔ à nɛ gbugbã nla nla.
8Si anyii nŋu, inɛ mmu gɔi í na í jɛ ilaalui Ezibiti iyi kù mà yaasei Zozɛfu. 9Nɔ í sɔ̃ inɛɛ ŋa í ni, i cɔ ŋa. Inɛi Izirɛli ŋa à kpɔ nɔ à nɛ gbugbã à re wa. 10Na nŋu, ka ce lasabu jiida, nɔ ka dɛ kpãa gɔ iyi á jɔ̀ akpɔ nŋau ku kaye, domi bii igũ í na í dede aa na a ce anu akã do mbɛɛ nwa ŋa nɔ a jɛ wa igũ a bɛi a fita hai si ilɛu a nɛ.
11Ŋɔi inɛi Ezibiti ŋau à cica inɛ ngboi icɛ ŋa ku ba inɛi Izirɛli ŋa a ya maa ce nŋa icɛi aru ŋa. Bɛɛbɛi à tilasi ŋa a ma ilu nlai Pitomu do Ramusɛsi, tengi bii Faraɔ̃ á nɛ aka nla nla ŋa. 12Amma bɛi à waa kpã ŋa iju fei bɛɛbɛ mɔi akpɔ nŋa í kɔ̃ɔsi wa koo. Ŋɔi í jɔ̀ inɛi Ezibiti ŋau à cé ŋa hee í caa, 13nɔ do inɔ kukãi à dasi ŋa icɛi aruu. 14À ya jɔ̀ kuwɛɛ nŋa ku ro do icɛi aru ŋa, domi do inɔ kukãi à ya tilasi ŋa a koo a tu amà wa a na a ceò biiki ŋa. Nɔ à ya tilasi ŋa má a ce icɛi iko ŋa fei do icɛ dimi ikã ikã fei.
Faraɔ̃ wa kpã inɛi Izirɛli ŋa iju
15Inaabo woo bí inɛ ŋa aŋa minjii à waa ce icɛ bi inɛi Ebɛɛ ŋa. Inɛ akã à ya kpoo Sifura, inɛ akã mɔ Pua. Aŋa minji fei inɛi Ebɛɛ ŋai. Ŋɔi ilaalui Ezibitiu í na ŋa wooda, 16í ni, bii aboi inɛi Ebɛɛ ŋa à waa bi a bí, i ya cɔ amau ku ce ncɛɛ ŋa. Bii ama inɛmɔkɔi i kpaa ŋa, bii í jɛ ama inaabo mɔi i jɔ̀ɔ ŋa.
17Amma inaabo woo bí inɛ ŋau à waa jirima Ilaaɔ̃, nɔ a kù waa ce mii iyi ilaaluu í sɔ̃ ŋa, à ya jɔ̀ amu ŋau a maa wɛɛ nŋai. 18Ŋɔi ilaaluu í kpe ŋa í bee ŋa í ni, na mii í jɔ̀ ì waa ce bɛɛbɛ ŋa, ì jɔ̀ ama inɛmɔkɔ ŋau à waa wɛɛ nŋa ŋa. 19Ŋɔi à jɛa Faraɔ̃ à ni, inaaboi Ebɛɛ ŋa a kù jɛ bɛi inaaboi Ezibiti ŋa, domi à nɛ gbugbã. Bii à waa bi a bí à ya bii hee ka maa to.
20Si bɛɛbɛi, inɛi Izirɛli ŋau à teese à kpɔ à waa kɔ̃ɔsi nɔ à nɛ gbugbã jiida. Nɔ Ilaaɔ̃ í nyisi inaabo woo bí inɛ ŋau jiida ku jɛɛ, 21nɔ í jɔ̀ aŋa mɔ à bi amu ŋa, si na iyi í jɔ̀ à waa jirimaɛ. 22Ŋɔi Faraɔ̃ í na inɛɛ ŋau fei wooda í ni, ama inɛmɔkɔ iyi inɛi Ebɛɛ ŋa à bí fei i nyɔ ŋa si inɔ ido nla iyi à ya kpe Niliu ŋa, nɔ i jɔ̀ ama inaabo ŋau fei a maa wɛɛ ŋa.
Currently Selected:
Kufita 1: MKL
Highlight
Share
Copy
Want to have your highlights saved across all your devices? Sign up or sign in
2021, SIM International et UEEB
