Woo bɛ ŋa 9

Idɔ ku kpaasii Sɔlu

(Cɔ Woo bɛ ŋa 22:6-16; 26:12-18)

1Waati bɛɛbɛ Sɔlu í ya maa kpã inɛ ŋa iyi à waa too kpãai Jesu ŋau iju nɔ wa bi ku kpa ŋa mɔm nii. Na ŋɔi í jɔ̀ í bɔ bi woo wee nlai Ilaaɔ̃u, 2í tɔɔɛ ku cea nŋu tia ŋa. Tia ŋaui á koo ku na inɛ ngboi ile bii Zuifu ŋa à ya ce kutɔtɔɔ ŋa iyi à wa Damasi. Do saabui tia ŋaui á baò gbugbã iyi á koo ku muò inɛ ŋa iyi à waa too kpãai Jesu, bii inɛmɔkɔi walakɔ bii inaaboi, ku ba ku yɔkɔ ku dĩ ŋa ku bɔò ŋa Zeruzalɛmu. Iyi í gba tia ŋau nɔ í dasi kpãa wa nɛ.

3Si bɛi Sɔlu wa nɛ í maai Damasi, ŋɔi anu akã inya kumá gɔ í naa siɛ wa hai lele. 4Ŋɔi í cuku ilɛ nɔ í gbɔ imui inɛ gɔ í ni, Sɔlu, Sɔlu, na mii í ce ì waa kpãm iju. 5Ŋɔi Sɔlu í bee í ni, Lafɛ̃ɛ, awɔi yoo. Ŋɔi Lafɛ̃ɛ í jɛaa í ni, amui Jesu iyi ì waa kpã ijuu. 6Dede i bɔ inɔ iluu, bɛi aa sɔ̃ɛ mii iyi aa ce. 7Waati bɛɛbɛ inɛ ŋa iyi à waa nɛ do Sɔluu à leekĩ à coko sɔ̃m sɔ̃m, à gbɔ ide ku fɔu amma a kù yɛ inɛ kãma. 8Ŋɔi Sɔlu í dede hai ilɛ í cĩ ijuɛ amma kù yɛ ilu. Ŋɔi à mu awɔɛ à bɔòɛ Damasi. 9Í fɛɛju ajɔ mɛɛta, kù jɛ kù mɔ.

10Wee mɔcɔi Jesu gɔ í wa Damasi bɛ à ya kpoo Ananiasi. Ŋɔi Lafɛ̃ɛ Jesu í naa siɛ si kuyɛ í kpoo í ni, Ananiasi. Nɔ í jɛ í ni, amu wee Lafɛ̃ɛ. 11Ŋɔi Lafɛ̃ɛ í sɔ̃ɔ í ni, dede i koo i mu kpãa iyi à ya kpe Kpãa ku Tɛu i bɔ idei Zudasi. Bii ì to bɛ bee mɔkɔ gɔ iyi à ya kpe Sɔlu inɛi Taasiu. Wa ce kutɔɔ, 12nɔ í ce kuyɛ í yɛ mɔkɔ gɔ iyi à ya kpe Ananiasi í lɔ wa nɔ í lesi nŋu awɔ ku ba nŋu ku yɛ ilu má. 13Amma Ananiasi í ni, Lafɛ̃ɛ, inɛ nkpɔi í sɔ̃m laabaaui mɔkɔu bɛ do laalɔ ŋa iyi í cea inɛɛ ŋa Zeruzalɛmu fei. 14Nɔ à gbɔ iyi inɛ ngboi woo wee ŋai à naa gbugbã ku mu inɛ ŋa iyi à waa ce kutɔɔ do iriɛ ihɛ̃ fei. 15Amma Lafɛ̃ɛ í sɔ̃ɔ í ni, koo, domi ǹ cica inɛɛu bɛi ku jɛ woo ce icɛm ku fɔ laabaaui irim bi dimi mmu ŋa do bi ilaalu nŋa ŋa do bi inɛi Izirɛli ŋa. 16An nɔ n nyisiɛ bɛi nŋu mɔ á yɛ ijuukpã na irim.

17Ŋɔi Ananiasi í dede í koo. Iyi í to, ŋɔi í lesi Sɔlu awɔ í ni, Sɔlu kpaasim, Jesu Lafɛ̃ɛ, nŋu iyi í naa siɛ si kpãa si waati iyi ì waa naa, nŋui í bɛm wa ku ba i yɛ ilu má nɔ i kɔ̃ò Hundei Ilaaɔ̃. 18Bɛ gbakã ngɔgɔ í cuku wa hai si ijui Sɔlu í yɛ bɛi kpakai cɛ̃ɛ, nɔ í yɛ ilu má. Ŋɔi í dede nɔ à dasiɛ inyi. 19Si anyiɛ ŋɔi í jɛ sɔnda nɔ gbugbãɛ í baa má.

Sɔlu wa ce waazo Damasi

Nɔ Sɔlu í ce ajɔ minji Damasi bɛ do inɛ ŋa iyi à waa too kpãai Jesu. 20Gbakã í bɔ ile bii Zuifu ŋa à ya ce kutɔtɔɔ ŋa wa waazo wa fɔ iyi Jesu Amai Ilaaɔ̃i. 21Inɛ ŋa iyi à waa gbɔ ideɛu fei à biti à bee njɛ à waa ni, kù jɛ mɔkɔ iyi í ya maa wahala inɛ ŋa iyi à waa ce kutɔɔ do irii Jesu Zeruzalɛmuu mbɛ ya. Kù jɛ nŋui wa naa ihɛ̃ wo ku na ku mu inɛ ŋa ku dĩ ŋa koo na inɛ ngboi woo weei Ilaaɔ̃ ŋau?

22Amma gbugbãi Sɔlu í ya maa kɔ̃ɔsii, nɔ Zuifu ŋa iyi à wa Damasiu a kù mà bɛi aa jɛaa waati iyi wa sɔ̃ ŋa kãm kãm iyi Jesui í jɛ inɛ iyi Ilaaɔ̃ í cicau.

23Iyi í ce ajɔ minji má ŋɔi Zuifu ŋau à waa busi njɛ a ba a kpa Sɔlu. 24Amma inɛ gɔ í koo í sisia Sɔlu ide iyi inɛ ŋau à dĩu. Inɛ ŋau à ya maa degbe iluui hee do andɛ koofa ŋau fei dasã do idũ ku ba a kpaa. 25Amma idũ gɔ mɔcɔi Sɔlu ŋa à jɔ̀ í lɔ inɔ kɔlɔ à bɛi à koo à kitaɛ hai do antaii bindii iluu.

Sɔlu í wa Zeruzalɛmu*

26Ŋɔi Sɔlu í bɔ Zeruzalɛmu. Iyi í to bɛ í bi ku tɔtɔɔ do inɛ ŋa iyi à waa too kpãai Jesuu, amma aŋa fei à waa ce njoɛ si na iyi í jɔ̀ a kù mà mà ntɔ ntɔ wa too kpãai Jesui. 27Ŋɔi Baanabasi í bɔòɛ bi woo bɛ ŋau nɔ í sɔ̃ ŋa bɛi Sɔlu í yɛ Lafɛ̃ɛ si kpãa, do bɛi Lafɛ̃ɛ í baa ide ku fɔ. Nɔ í sɔ̃ ŋa bɛi Sɔlu í ce waazo Damasi do irii Jesu do wɔɔkɔ. 28Hai waati bɛɛbɛi Sɔlu wa dabii si ilui Zeruzalɛmu do woo bɛ ŋau wa waazo do irii Lafɛ̃ɛ Jesu do wɔɔkɔ. 29Nɔ í ce kakɔɔ do Zuifu ŋa iyi à waa fɔ Gɛrɛkiu, amma aŋa mɔ à waa dɛ kpãa bɛi aa ce a kpaa. 30Iyi kpaasi woo dasi Jesu naanɛ ŋau à gbɔ, ŋɔi à bɔòɛ Sezaree nɔ à jɔ̀ í nɛ Taasi.

31Inɛi igbɛi Jesu ŋa iyi à wa ilɛi Zudee do ilɛi Galilee do ilɛi Samari fei à wɛɛò laakai ku sũ, à waa jirima Ilaaɔ̃, à mua njɛ gbugbã nɔ akpɔ nŋa í kɔ̃ɔsi wa koo do sobii Hundei Ilaaɔ̃.

Iri ku bai Enee

32Piɛɛ mɔ wa dabii bii fei. Nɔ í bɔ bi inɛi Jesu ŋa iyi à wa Lida. 33Bɛi í yɛ wɛɛgɛ gɔ à ya kpoo Enee, kù dede hai bi ku sũɛ hai adɔ̃ mɛɛjɔ. 34Ŋɔi Piɛɛ í sɔ̃ɔ í ni, Enee dede, Jesu Kirisi í jɔ̀ ì ba iri, ka sɛ̃ɛɛ. Gbakã ŋɔi í dede. 35Ŋɔi inɛ ŋa iyi à wa Lidau fei do inɛi ilɛɛkoi Sarɔ̃ɔ ŋa à yɔɔ nɔ à dasi Lafɛ̃ɛ Jesu naanɛ.

Dɔɔkasi í ku nɔ í nyi wa si andunya má

36Wee si ilui Zopee inaabo woo dasi Jesu naanɛ gɔ í wa bɛ à ya kpoo Tabita. Nŋui à ya kpe Dɔɔkasi má do feei Gɛrɛki, waatɔ kabua. Í nɛ daa jiida nɔ í ya maa sobi ilu are ŋa. 37Ŋɔi ajɔ nŋu gɔ í na í ce bɔ̃ɔ í ku. Iyi à wɛ ikuɛ ŋɔi à koo à jilɔɔ ile lele. 38Inɛ ŋa iyi à waa too kpãai Jesu iyi à wa Zopee à gbɔ iyi Piɛɛ í wa Lida kɔkɔi Zopee bɛ. Ŋɔi à bɛ siɛ inɛ minji à ni a koo a sɔ̃ɔ ku naa wa nsɛi nsɛi. 39Ŋɔi Piɛɛ í dede í too ŋa wa. Iyi í to wa, ŋɔi à bɔòɛ lelei ileu. Ŋɔi jaaɔ̃ ŋa fei à naa à kaakoɛ à waa kpataò nɔ à waa nyisiɛ ibɔ do jĩnɛ ku dasi mmuɛ ŋa iyi Dɔɔkasi í ce waati iyi í wɛɛ aŋaò ŋa. 40Ŋɔi Piɛɛ í nya aŋa fei hai ilaawa í bɛi í gulɛ wa ce kutɔɔ. Í sinda si ikuu í ni, Tabita dede. Ŋɔi í cĩ ijuɛ. Iyi í yɛ Piɛɛ nɔ í dede í buba. 41Ŋɔi Piɛɛ í mu awɔɛ í dedeɛ. Nɔ í kpe jaaɔ̃ ŋau do inɛi Jesu ŋa iyi à gbe í nyisi ŋa iyi Dɔɔkasi í jĩ má. 42Ŋɔi laabaauu í fangaa si ilui Zopee fei, nɔ inɛ nkpɔ í dasi Lafɛ̃ɛ Jesu naanɛ. 43Nɔ Piɛɛ í ce ajɔ minji Zopee bɛ bi anà gɔ iyi à ya kpe Simɔɔ.

Currently Selected:

Woo bɛ ŋa 9: MKL

Highlight

Copy