Woo bɛ ŋa 8

1Waati iyi à kpa Etiɛniu Sɔlu mɔ í jɛsi.

Sɔlu í kpã inɛi igbɛi Jesu ŋa iju

Hai ajɔ nŋu bɛi à sinti ku kpã inɛi igbɛi Jesu ŋa iyi à wa Zeruzalɛmu iju ntɔ ntɔ. Bii kù jɛ woo bɛ ŋau baasi, woo dasi Jesu naanɛ ŋau fei à fangaai si ilɛi Zudee do si ilɛi Samari. 2Nɔ inɛ gɔ ŋa iyi à mà bɛɛrɛi Ilaaɔ̃ à si Etiɛni do kukpata.

3Amma Sɔlu í wasi inɛi igbɛi Jesu ŋa ku kpã iju. Í ya lɔ kpasɛ̃ do kpasɛ̃ ŋai ku maa mu inɛmɔkɔ do inaabo ŋa do gbugbã koo dasi ŋa piisɔ̃ɔ.

Filipu wa sisi laabaau jiida si ilɛi Samari

4Inɛ ŋa iyi à fangaau à koo à waa waazo laabaau jiidau bii fei. 5Filipu í bɔ ilu nlai Samari nɔ wa cea inɛi ilu bɛ ŋa faajii inɛ iyi Ilaaɔ̃ í cicau. 6-7Nɔ í ce maamaake ŋa. Í lele inɛi inɔɔko ŋa hai si inɛ nkpɔ nɔ à fita do anu ku dɔ̃ nla nla, nɔ í jɔ̀ wɛɛgɛ nkpɔ do ilu kutɛ akã ŋa à ba iri. Iyi inɛ ŋa à waa gbɔ waazoɛu nɔ à yɛ maamaake ŋau, ŋɔi aŋa fei à teese à de itĩ jiida. 8Nɔ inɛi ilu ŋau à wɛɛò inɔ didɔ̃ nla nla.

9Wee mɔkɔ gɔ mɔ í wa si iluu bɛ, à ya kpoo Simɔɔ. Í ya maa ce dobu dobu í jɔ̀ inɛi ilu ŋau fei à biti nɔ í ce araɛ inɛ nla. 10Hai ilu gbugbã ŋa do hai nɛ gbugbã ŋa fei à ya maa gbɔ ideɛ ntɔ ntɔ nɔ à ya maa ni, inɛɛu ihɛ̃i í jɛ inɛ iyi à ya kpe gbugbã nlai Ilaaɔ̃. 11À ya maa gbɔ ideɛi domi hai ku kpɛ dobu dobuɛ ŋau í ya maa mu ŋa bitii. 12Amma iyi inɛ ŋau à dasi naanɛ si laabaau jiida iyi Filipu wa fɔ si gãmɛi bommai Ilaaɔ̃ do si gãmɛi Jesu Kirisiu, ŋɔi à dasi ŋa inyi hai inɛmɔkɔ do inaabo fei. 13Simɔɔ takaɛ í dasi Jesu naanɛ nɔ à dasiɛ inyi. Í ya maa too Filipu bii fei nɔ í biti ntɔ ntɔ iyi í yɛ maamaake nla ŋa iyi wa ce.

14Woo bɛ ŋau à gbɔ iyi inɛi Samari ŋau à gba idei Ilaaɔ̃. Ŋɔi à bɛ si ŋa Piɛɛ do Zãa hai Zeruzalɛmu bɛ. 15Iyi à to ŋɔi à ce nŋa kutɔɔ ku ba a ba Hundei Ilaaɔ̃. 16À ce bɛɛbɛi si na iyi í jɔ̀ Hundei Ilaaɔ̃ kù kita si kãma nŋa wa titã, aŋa de à ce inyi ku dasi nŋai do irii Lafɛ̃ɛ Jesu nŋu akã. 17Ŋɔi Piɛɛ do Zãa à le nŋa awɔ si iri, nɔ à ba Hundei Ilaaɔ̃.

18Iyi Simɔɔ í yɛ woo dasi Jesu naanɛ ŋau à ba Hundei Ilaaɔ̃ waati iyi woo bɛ ŋau à le nŋa awɔ si iriu, ŋɔi wa bi ku mu nŋa fia. 19Í ni a mua nŋu gbugbãu bɛ ku ba inɛ iyi nŋu á lea awɔ si iri fei ku ba Hundei Ilaaɔ̃. 20Amma Piɛɛ í sɔ̃ɔ í ni, awɔ do fiaɛ fei aa ce nfe, domi ì tamaa bɛi aa yɔkɔ i ra amuai Ilaaɔ̃ do fiai. 21I kù nɛ kpãai ngɔgɔ ihɛ̃ domi idɔɛ kù jɛ dee dee si wajui Ilaaɔ̃. 22Na nŋu, sinda idɔɛ hai si laalɔ ku ceɛ, nɔ i tɔɔ Ilaaɔ̃ ku ceɛ suurui lasabu laalɔ ku ceɛ bii á ce. 23Ǹ wa n fɔ bɛɛbɛi si na iyi í jɔ̀ ǹ yɛ daaɛ í ro nɔ dulum í dĩɛ.

24Ŋɔi Simɔɔ í jɛ nŋa í ni, iŋɛ taka nŋɛ i ceem kutɔɔ bi Lafɛ̃ɛ ku ba ide ŋa iyi ì sɔ̃m ŋau bɛ kãmaɛ ku maà bam.

25Waati iyi à ce waazo à sisia inɛ ŋa yaasei idei Ilaaɔ̃ à tã ŋɔi à sinda à waa nyi Zeruzalɛmu. Iyi à waa nɛ, ŋɔi à wasi ku sisi laabaau jiidau si ilu nkpɔi Samari má.

Idei Filipu do akawe nlai Etiopi gɔ

26Ŋɔi amalekai Lafɛ̃ɛ gɔ í ba Filipu ide ku fɔ í ni, dede i bɔ ikpa awɔ cangai kpãai inunu, too kpãa iyi í wa hai Zeruzalɛmu ku bɔ Gaza. Kpãa nŋui í bɔ ikpa gbaau bɛ. 27Ŋɔi Filipu í dede í nɛ. Si kpãau, ŋɔi í yɛ inɛi Etiopi gɔ. Inɛɛu akawe nla nlai. Nŋui í ya maa mu amanii inaabo ilaalui Etiopi iyi à kpe Kandaasi. Í naa Zeruzalɛmui Ilaaɔ̃ ku gulɛa, 28ŋɔi í sinda wa bɔ ikpa ideɛ má. Wa buba si sarɛtii acĩ wa cio tia iyi walii Ezai í kɔ. 29Ŋɔi Hundei Ilaaɔ̃ í sɔ̃ Filipu í ni ku bɔ kɔkɔi sarɛtiu. 30Ŋɔi Filipu í sɛi í bɔ bi sarɛtiu, nɔ í gbɔ inɛi Etiopiu wa cio si tiai walii Ezaiu. Nɔ í beeɛ í ni, ide iyi ì waa ciou bɛ ì waa gbɔ bɛi wa fɔ mbɛ? 31Ŋɔi inɛɛu í jɛaa í ni, bɛirei an ce n gbɔ bii kù jɛ inɛ gɔi í tusɛɛm. Ŋɔi í tɔɔ Filipu ku gũ wa si sarɛtiu ku buba bi nŋu. Nɔ Filipu í gũ. 32Ide iyi mɔkɔu wa cio si kukɔi idei Ilaaɔ̃ wee.

À kooòɛ bɛi angudã iyi aa saka.

Bɛi ama angudã í ya maa coko waati iyi à waa bu ntoɛ,

bɛɛbɛ mɔi nŋu mɔ kù la gɛlɛ.

33À kayeɛ nɔ à kɔ̀ ku kiitiɛ dee dee.

Si bɛi à kpa irii kuwɛɛɛ, kù wa si ilɛu ihɛ̃ má.

Yooi á fɔ idei inɛi anyiɛ ŋa má.#8:33 Cɔ Ezai 53:7-8.

34Ŋɔi akaweu í sɔ̃ Filipu í ni, ǹ wa n tɔɔɛ i sɔ̃m inɛ iyi waliiu wa fãa. Nŋu takaɛi wa fãa araɛ de. Mà inɛ gɔi wa fãa. 35Ŋɔi Filipu í so ide í sinti do idei waliiu í sisiaaò laabaau jiidai Jesu. 36Si bɛi à waa nɛ si kpãau ŋɔi à to ido gɔ iyi í nɛ inyi. Ŋɔi akaweu í ni, cɔ inyi ihɛ̃. To, mii á ganjim n ce inyi ku dasim má. [ 37Ŋɔi Filipu í sɔ̃ɔ í ni, bii ì dasi Jesu naanɛ do idɔɛ fei aa yɔkɔ i ce inyi ku dasiɛ mɛɛ. Nɔ akaweu í jɛ í ni, ǹ dasi naanɛ iyi Jesu Kirisi Amai Ilaaɔ̃i.] 38Ŋɔi í ni a leekĩ sarɛtiu. Iyi à leekĩɛ nɔ nŋu do Filipu à kita aŋa minji nŋa si inyiu, nɔ Filipu í dasiɛ inyi. 39Iyi à fita hai si inɔ inyiu, ŋɔi Hundei Aɔ̃ Lafɛ̃ɛ í nɛò Filipu. Nɔ akaweu kù yɔɔ má, amma í dasi kpãa wa nɛ do inɔ didɔ̃. 40Ŋɔi Filipu í ba nŋu í wa ilu gɔ iyi à ya kpe Azɔtu, nɔ í ce waazoi laabaau jiidau bɛ do ilu ŋa iyi à wa si kpãau fei hee í toò Sezaree.

Currently Selected:

Woo bɛ ŋa 8: MKL

Highlight

Copy