Woo bɛ ŋa 5

Idei Ananiasi do Safira

1Amma mɔkɔ gɔ í wɛɛ iyi à ya kpe Ananiasi, aboɛ mɔ à ya kpoo Safira. Mɔkɔu í ta iko nŋa gɔ, 2nɔ í jilɛ ikɔ akãi fiau ndɛɛ, iyi í gbeu mɔ í koo í na woo bɛ ŋau. Nɔ wee aboɛ í wɛɛò kumàsiɛ. 3Iyi í na ŋa fiau ŋɔi Piɛɛ í beeɛ í ni, Ananiasi, bɛirei í ce ì jɔ̀ Seetam í lɔ si idɔɛ hee ì waa sɔa Hundei Ilaaɔ̃ ibo nɔ ì jɔ̀ bubui fiai ikou ndɛɛ. 4Iko iyi ì tau awɔ si ì nɔɔ ba. Iyi ì taa ì tã, fiau kù jɛ titɛɛi? To, na mii í jɔ̀ ì ce dimii lasabuu ihɛ̃. Kù jɛ amanɛ ŋai ì sɔa ibo, Ilaaɔ̃i ì sɔa. 5Iyi Ananiasi í gbɔ ideu gbakã ŋɔi í cuku tengi bɛ í ku. Ŋɔi inɛ ŋa iyi à gbɔ ideu fei njo í mu ŋa hee í caa. 6Ŋɔi awaasũ ŋa à naa à wo ikuu do acɔ à koo à suu.

7Si anyii isɔ mɛɛta má, ŋɔi aboɛ mɔ í lɔ wa. Wee kù mà mii iyi í ce mɔkɔi nŋu titã. 8Ŋɔi Piɛɛ í beeɛ í ni, fia iyi mɔkɔɛ í naaò wau ihɛ̃, bɛɛbɛi ì ta iko nŋɛu ŋa? Ŋɔi Safira í jɛaa í ni, bɛɛ mbɛ. 9Ŋɔi Piɛɛ í beeɛ í ni, bɛirei í ce iŋɛ minji fei ì ce anu akã i cɔ laakaii Hundei Aɔ̃ Lafɛ̃ɛ bɛɛbɛ ŋa. Cɔ, inɛ ŋa iyi à si mɔkɔɛ à wa andɛ koofa bɛ, aa si awɔ mɔ. 10Bɛ gbakã ŋɔi abou mɔ í cuku í ku si wajui Piɛɛ bɛ. Ŋɔi awaasũ ŋau à lɔ bɛ à koo à ba í ku, ŋɔi à soo wa à naa à suu kɔkɔi mɔkɔɛ. 11Ŋɔi njo í mu inɛi igbɛi Jesu ŋau ntɔ ntɔ do inɛ ŋa iyi à gbɔ ideu fei.

Maamaake nkpɔ

12Ŋɔi woo bɛ ŋau à wasi maamaake do nyinda nkpɔ ku ce si inɛ ŋa. Nɔ woo dasi Jesu naanɛ ŋau à ya tɔtɔɔ bantumai Salomɔɔ. 13Inɛ kãma kù bi ku lɔ inɔ nŋa do muafiti domi à waa ce njo, amma do nŋu fei à waa saabu ŋa ntɔ ntɔ. 14Amma kukpɔi inɛ ŋa iyi à dasi Lafɛ̃ɛ Jesu naanɛ ntɔ ntɔ í kɔ̃ɔsi wa koo, hai inɛmɔkɔ do inaabo ŋa. 15Ŋɔi inɛ ŋa à wasi ku naaò bɔ̃ɔ ŋa wa si kpãa ŋa. À ya naa a jilɛ ŋa si daayi ŋa do si sɛ̃ɛ ŋa ku ba bii Piɛɛ wa lɔ ayaɛ ku bii inɛ gɔ ŋa si inɔ nŋa. 16Ŋɔi inɛ nkpɔ í wasi ku naaò bɔ̃ɔ ŋa wa do inɛ ŋa iyi à nɛ inɛi inɔɔko ŋa hai ilɛɛkoi Zeruzalɛmu ŋa, aŋa fei à nɔ à ba iri.

À kpã woo bɛ ŋau iju

17Amma woo wee nlai Ilaaɔ̃u do inɛ ŋa iyi à wa si igbɛi Sadusi ŋa iyi à wa bi tɛɛu fei à dedeò igu si gãmɛi woo bɛ ŋau. 18Ŋɔi à mu ŋa gbakã à dasi ŋa piisɔ̃ɔ. 19Ŋɔi idũu amalekai Ilaaɔ̃ í naa í cĩ gamboi ile piisɔ̃ɔu í nya ŋa nɔ í sɔ̃ ŋa í ni, 20i bɔ bantumai kpasɛ̃i Ilaaɔ̃ i koo i leekĩ bɛ nɔ i sisia inɛ ŋa idei kuwɛɛ titɔ̃u fei ŋa. 21Nɔ woo bɛ ŋau à gbɔ ideu. Amɛɛjuumá gbakã ŋɔi à bɔ bantumai kpasɛ̃i Ilaaɔ̃ bɛ à wasi ku kɔ inɛ ŋa si cio.

Wee waati bɛɛbɛ woo wee nlai Ilaaɔ̃u do inɛɛ ŋau à tɔtɔɔ nɔ à kpe igbɛi woo kiiti ŋau do inɛ ngboi Izirɛli ŋa fei, à bɛi à bɛ woo degbe kpasɛ̃i Ilaaɔ̃ ŋau a koo a gbã woo bɛ ŋau wa hai ile piisɔ̃ɔ. 22Amma iyi à to a kù yɛ woo bɛ ŋau ile piisɔ̃ɔ bɛ. Nɔ à nyi bi inɛ ngbo ŋau má à ni, 23iyi à to bɛ à ba ile piisɔ̃ɔu wa cĩmbo dim dim nɔ à ba woo degbe ŋau à waa leekĩ andɛ bɛ. Amma iyi à cĩ gambo ŋau a kù yɛ inɛ kãma ile bɛ. 24Iyi inɛ ngboi woo degbe kpasɛ̃i Ilaaɔ̃u do inɛ ngboi woo wee ŋau à gbɔ ideu, ŋɔi à biti a kù mà bɛi ideu á kpa iri. 25Ŋɔi inɛ gɔ í naa í sɔ̃ ŋa í ni, i gbɔ ŋa, inɛ ŋa iyi ì dasi piisɔ̃ɔ ŋau à wa bantumai kpasɛ̃i Ilaaɔ̃ à waa kɔ inɛ ŋa si cio. 26Ŋɔi inɛ ngboi woo degbe kpasɛ̃i Ilaaɔ̃u, nŋu do inɛɛ ŋa à koo à gbã ŋa à naaò ŋa wa bi inɛ ngbo ŋau. Amma kù jɛ do gbugbã domi à waa ce njo zamaau ku maà na ku ta aŋa kuta.

27Iyi à naaò ŋa wa à leekĩ ŋa si wajui igbɛi woo kiiti ŋau nɔ woo wee nlai Ilaaɔ̃u í sɔ̃ ŋa 28í ni, à kɔ̀ nŋɛ mam mam à ni i maà ya ce waazo do irii mɔkɔu má ŋa. Amma wee ì ce waazo nŋɛ ì waa koo ŋa hee ì kɔ inɛi Zeruzalɛmu ŋa fei si cio nŋɛ nɔ ì waa bi i dasi wa taalei ikui mɔkɔu ŋa. 29Ŋɔi Piɛɛ do woo bɛ kpaasiɛ ŋau à jɛ à ni, tilasi idei Ilaaɔ̃i aa ka jirima, kù jɛ ti amanɛ ŋa. 30Aɔ̃ Lafɛ̃ɛi bala nwa ŋai í jĩ Jesuu hai si balɛ, inɛ iyi ì kpakpa si jĩi ì kpaa ŋau. 31Ŋɔi Ilaaɔ̃ í soo lele í jilɔɔ awɔ njɛɛ ku jɛ ilaalu do Woo faaba nɔ ku muaò inɛi Izirɛli ŋa kpãa a kpaasi idɔ ku ba ku kpa dulum du ŋa. 32Awai à jɛ sɛɛdai mii ŋau bɛ, awa do Hundei Ilaaɔ̃ iyi Ilaaɔ̃ í mua inɛ ŋa iyi à waa jirimaɛ.

33Iyi à gbɔ ideu ŋɔi idɔ nŋa í kɔ̃ hee à waa bi a kpa ŋa. 34Amma inɛ akã nŋa iyi à ya kpe Gamaliɛli í dede í leekĩ si aninii woo kiiti ŋau í ni a nya woo bɛ ŋau wa titã. Gamaliɛliu Farisii wa jɛ do woo kɔ inɛ ŋa si wooda, nɔ í nɛ bɛɛrɛ ntɔ ntɔ bi inɛ fei. 35Ŋɔi í sɔ̃ inɛ ŋau í ni, iŋɛ inɛi Izirɛli ŋa, i laakai ŋa do mii iyi ì waa bi i cea inɛ ŋau. 36Kù kpɛ mɔm titã iyi mɔkɔ gɔ í naa ihɛ̃ à ya kpoo Tedasi nɔ í ya maa so araɛ lele bɛi inɛ nla gɔ nɔ amanɛ bɛi cĩɔ mɛɛ wa tooɛ. Amma à kpaa, nɔ mɔcɔɛ ŋau fei à fangaa, nɔ à gbɛjɛ ideɛ. 37Si anyiɛ, waati iyi à na à waa ce kuka, ŋɔi mɔkɔ gɔ mɔ í naa à ya kpoo Zudasi inɛi Galilee. Nŋu mɔ í jɔ̀ inɛ nkpɔ nkpɔ wa tooɛ. Amma à kpa nŋu mɔ nɔ inɛ ŋa iyi à waa tooɛu fei à fangaa. 38Na nŋu, bii í jɛ aa gbɔ idem ŋa, i jɔ̀ inɛ ŋau bɛ a nɛ ŋa. Bii í jɛ ideu do icɛ ŋa iyi à waa ceu hai bi amanɛ ŋai wa naa, á na ku kpa iri. 39Amma bii kuce nŋau hai bi Ilaaɔ̃i wa naa, i kaa yɔkɔ i kãmia ŋa ŋa. I ce laakai i maà ti i na i maa ba Ilaaɔ̃ ku ja ŋa. Nɔ à gbɔ ideɛ.

40Ŋɔi à kpe woo bɛ ŋau à cã ŋa do kpɔtɔɔ à ni a maà fɔ ide do irii Jesu má à bɛi à jɔ̀ ŋa. 41Ŋɔi woo bɛ ŋau à nɛ hai bi igbɛi woo kiiti ŋau do inɔ didɔ̃ nla nla si na iyi í jɔ̀ Ilaaɔ̃ í ka ŋa si inɛ ŋa iyi à to a maa yaako ŋa na irii Jesu. 42Ajɔ fei si bantumai kpasɛ̃i Ilaaɔ̃ do si inɔ kpasɛ̃ ŋa à ya maa ce waazoi laabaau jiidau nɔ a maa kɔ inɛ ŋa si cio waati kãma fei a maa ni Jesui í jɛ inɛ iyi Ilaaɔ̃ í cicau.

Currently Selected:

Woo bɛ ŋa 5: MKL

Highlight

Copy