Woo bɛ ŋa 4

Piɛɛ do Zãa à wa bi igbɛi woo kiiti ŋa

1Si waati iyi Piɛɛ do Zãa à waa sɔ̃ zamaau ideu bɛɛbɛ, ŋɔi woo weei Ilaaɔ̃ ŋau do inɛ ngboi inɛ ŋa iyi à ya maa degbe kpasɛ̃i Ilaaɔ̃u do Sadusi ŋa à sɛkɛɛ si ŋa wa. 2Idɔ nŋa í kɔ̃ si na iyi í jɔ̀ mɔcɔ minji ŋau à waa kɔ inɛ ŋa si cio à waa sɔ̃ ŋa iyi Jesu í jĩ hai si balɛ, waatɔ iku ŋa aa yɔkɔ a nyi wa si kuwɛɛ má. 3Ŋɔi à mu ŋa à cĩmbo ŋa si ile piisɔ̃ɔ hee iju kumá domi alɛ í lɛ tã. 4Do nŋu fei, inɛ nkpɔ iyi í gbɔ ideu í dasi naanɛ. Nɔ kukpɔ nŋa í kɔ̃ɔsi hee í to zakai amanɛ dubu miiu.

5Iju kumáɛ ŋɔi inɛ ngboi Zuifu ŋa do inɛ ngbo bubu ŋa do woo kɔ inɛ ŋa si wooda ŋau à tɔtɔɔ Zeruzalɛmu. 6Ŋɔi à tɔtɔɔ aŋa do woo wee nlau iyi à ya kpe Ani, do Kaifu do Zãa do Alesandu do inɛ ŋa iyi à gbe si nyaanzei woo wee nlau fei. 7Ŋɔi à nya Piɛɛ do Zãa wa hai ile piisɔ̃ɔu à na à leekĩ ŋa si waju nŋa nɔ à lɔsi ku bee ŋa à waa ni, do gbugbãi yooi, mà do irii yooi ì ceò mii nɔu bɛ ŋa. 8Ŋɔi Piɛɛ í kɔ̃ò Hundei Ilaaɔ̃ nɔ í sɔ̃ ŋa í ni, iŋɛ inɛ ngbo ŋa, 9ì waa bee wa idei icɛ jiida ŋa iyi à cea wɛɛgɛu ihɛ̃ do bɛi í ce í baò iri. 10Na nŋu, í sĩa iŋɛ fei do inɛi Izirɛli ŋau fei i mà ŋa, mɔkɔ iyi wa leekĩ si waju nŋɛu bɛ, í ba irii do saabui irii Jesu Kirisi inɛi Nazarɛtiu, inɛ iyi ì kpakpa si antaii jĩi ku gaauu ŋa nɔ Ilaaɔ̃ í jũu hai si balɛ. 11Jesui kukɔu wa fãa iyi í ni,

kuta iyi iŋɛ woo ma ŋa ì cau,

nŋui í baa í jɛ kuta sintei icui ile.#4:11 Cɔ Iri ku kɔ̃ 118:22.

12Woo faaba gɔ kù wɛɛ má bii kù jɛ nŋu akã, domi Ilaaɔ̃ kù na irii inɛ gɔ má si andunya iyi aa ka kpe ka baò faaba.

13Iyi inɛ ŋau à gbɔ ideu ŋɔi à biti domi à yɛ wɔɔkɔi Piɛɛ do Zãa nɔ à mà gbakã iyi taaka ŋai iyi a kù ce baa cio. Ŋɔi à mà iyi aŋai à wɛɛ wo do Jesu. 14Amma si bɛi à yɛ mɔkɔ iyi í ba iriu wa leekĩ do Piɛɛ do Zãa, nŋui í jɔ̀ a kù ba ide gɔ iyi aa ni má. 15Ŋɔi à ni a fita hai ile kiitiu. Iyi à fita, inɛ ŋa iyi à gbe bɛu à waa busi njɛ aŋa duusɔ̃ɔ. 16Ŋɔi à waa ni, bɛirei aa ka cea mɔkɔ ŋau ihɛ̃. Wee inɛi Zeruzalɛmu ŋa fei à mà iyi à ce maamaake nla nla gɔ, nɔ a kaa ka yɔkɔ ka jã. 17Amma ka ganji ŋa ku ba ideu ku maà fangaa si inɛ ŋa iyi à gbe má, ka kɔ̀ nŋa do ijuukpã ku ba a maà sɔ̃ inɛ kãma ide do irii Jesu má. 18Ŋɔi à kpe ŋa má nɔ à kɔ̀ nŋa a fɔ ide do irii Jesu má hee má jɛ a kɔ inɛ ŋa si cioi ideɛ.

19Amma Piɛɛ do Zãa à sɔ̃ ŋa à ni, i bee ara nŋɛ ide bii á jɛ dee dee si wajui Ilaaɔ̃ ka gbɔ ide nŋɛ nɔ ka jɔ̀ ti Ilaaɔ̃. 20Awa de a kaa ka yɔkɔ ka coko do mii iyi à yɛ do iyi à gbɔ. 21Ŋɔi à gbagba si ŋa má ntɔ ntɔ à bɛi à jɔ̀ ŋa. A kù ba yaase bɛi aa ce a fa itĩ nŋa si na iyi í jɔ̀ inɛ fei wa saabu Ilaaɔ̃ do mii iyi í ceu, 22domi mɔkɔ iyi à faaba do maamaakeu, adɔ̃ɛ í re baa ciiji.

Woo dasi Jesu naanɛ ŋa à waa tɔɔ wɔɔkɔ

23Ŋɔi Piɛɛ do Zãa à nyi bi kpaasi nŋa ŋa si waati iyi woo kiiti ŋau à jɔ̀ ŋa. Nɔ à koo à sisi nŋa ide iyi inɛ ngbo ŋa do inɛ ngboi woo weei Ilaaɔ̃ ŋa à sɔ̃ ŋau. 24Iyi à gbɔ ideu ŋɔi aŋa fei à tɔɔ Ilaaɔ̃ do anu akã à ni, Aɔ̃ Lafɛ̃ɛ, awɔi ì taka lele do ilɛ do tenku do mii iyi í wa si fei. 25Hundeɛi í jɔ̀ bala nwa Davidi woo ce icɛɛ í fɔ wo í ni,

na mii í ce inɛi ilɛ ŋa à ya maa ja.

Na mii í ce à ya maa ce lasabu ngbɛ ngbɛ.

26Ilaalui ilɛ ŋa do ilu iri ŋa à dede nɔ à tɔtɔɔ

ku ba a ce igũ do Aɔ̃ Lafɛ̃ɛ do inɛ iyi í cica.#4:26 Cɔ Iri ku kɔ̃ 2:1-2.

27Ilaaɔ̃ Baaba, ide iyi Davidi í fɔu bɛ ntɔi, domi Herodu do Pɔnsu Pilati à ce anu akã. À tɔtɔɔ do dimi mmu ŋa do inɛi Izirɛli ŋa si iluu ihɛ̃ à yɛ taalei Jesu woo ce icɛ kumáɛ iyi ì cica ì nyaa ikãu. 28Bɛɛbɛi à ce, nɔ nŋu bɛi í jɔ̀ mii iyi ì jilɛ fei hai tako iyi í jɛ idɔɔbiɛ í kɔ̃. 29Na nŋu nsɛi, Lafɛ̃ɛ, ce laakaii ide ku fɔ nŋa nɔ i jɔ̀ awa woo ce icɛɛ ŋau ka sisi ideɛu do wɔɔkɔ nla nla. 30Nyisi gbugbãɛ ku ba maamaake ŋa ku ce nɔ inɛ ŋa a ba iri do saabui irii Jesu woo ce icɛ kumáɛu.

31Iyi à ce kutɔɔu à tã ŋɔi inya bii à tɔtɔɔu í yaya. Ŋɔi aŋa fei à kɔ̃ò Hundei Ilaaɔ̃ nɔ à wasi ku waazo idei Ilaaɔ̃ bɛbɛi do wɔɔkɔ.

Mii iyi woo dasi Jesu naanɛ ŋau à nɛ, ti aŋa feii

32Akpɔi woo dasi Jesu naanɛ ŋau í kɔ̃ɔsi nɔ aŋa fei à nɛ anu akã. Inɛ gɔ ci ya ni mii iyi nŋu í nɛ ti nŋu akãi amma mii iyi à nɛ fei ti aŋa feii. 33Do gbugbã nla nlai woo bɛ ŋau à waa sisiò kujĩi Lafɛ̃ɛ Jesu hai si balɛ, nɔ didɔ̃ nla nlai Ilaaɔ̃ í wa si aŋa fei. 34Inɛ gɔ kù jɛ are si inɔ nŋa, domi ajɔ minji do ajɔ minji fei inɛ ŋa iyi à nɛ iko do kpasɛ̃ ŋa fei à ya taai nɔ a naaò fiau wa, 35a naa a na woo bɛ ŋau, nɔ a ce ikpɛ̃ɛ si bɛi bukaatai inɛ fei í to.

36Bɛɛbɛi Zozɛfu, inɛi Levii gɔ iyi à bí Kitimu, í ce. Nŋui woo bɛ ŋau à ya kpe Baanabasi, waatɔ woo mua inɛ gbugbã. 37Í ta ikoɛ gɔ í naaò fiau wa í naa í na woo bɛ ŋau.

Currently Selected:

Woo bɛ ŋa 4: MKL

Highlight

Copy