Woo bɛ ŋa 12

À kpa Zaaki nɔ à mu Piɛɛ mɔ à dasiɛ piisɔ̃ɔ

1Waati bɛɛbɛ ilaalu Herodu í sinti ku kpã inɛi igbɛi Jesu gɔ ŋa iju. 2Í jɔ̀ à kpa Zaaki igbãi Zãa do taakuba. 3Ŋɔi í yɛ ideu í dɔ̃a Zuifu ŋau si, nɔ í jɔ̀ à mu Piɛɛ má. Wee waatii jingaui Pɛ̃ɛ hai nɛ levɛ̃ɛi. 4Iyi à mu Piɛɛ ŋɔi Herodu í jɔ̀ à dasiɛ piisɔ̃ɔ nɔ í jɔ̀ sooge ŋa à waa degbeɛ, aŋa mɛɛ ikɔ mɛɛ. Herodu í bi nŋu ku ceaa kiiti si wajui zamaa bii jingaui Iku ku kuau í lɔ. 5À waa mu Piɛɛ ile piisɔ̃ɔ bɛ, amma inɛi igbɛi Jesu ŋa à wasi ku ce kutɔɔ na iriɛ do himma jiida jiida bi Ilaaɔ̃.

Amaleka* gɔ í nya Piɛɛ hai ile piisɔ̃ɔ

6Piɛɛ wa sĩ njoo si aninii sooge minji gɔ ŋa idũ iyi iju kumáɛ Herodu wa bi ku nyaa hai ile piisɔ̃ɔu ku bɔòɛ si wajui zamaa. À dũu do sesee minji nɔ sooge gɔ ŋa à waa degbe andɛi ile piisɔ̃ɔu bɛ. 7Ŋɔi gbakã amalekai Ilaaɔ̃ gɔ í naa si ile piisɔ̃ɔu, ŋɔi inya í má. Ŋɔi amalekau í cã Piɛɛ si cingaaɛ í jũu í ni, dede ńya ńya. Bɛ gbakã sesee ŋau à cuku hai si awɔɛ ŋa. 8Ŋɔi amalekau í ni, dasi ibɔɛ do baataɛ. Ŋɔi Piɛɛ í ce bɛɛbɛ, ŋɔi amalekau í sɔ̃ɔ má í ni, bii dabiiɛ nɔ i toom wa. 9Ŋɔi Piɛɛ í fita hai ile piisɔ̃ɔu í tooɛ, amma kù mà iyi mii ŋau bɛ fei amalekau wa cooi ntɔ ntɔ. Í tamaa bɛi nŋu wa laalai. 10À lɔ woo degbe piisɔ̃ɔ sinteu do minjisiau nɔ à tosi gamboi isɔu. Inɛ nŋu ikpa inɔ ilui wa cɔ. Ŋɔi í cĩ do araɛ nɔ à fita à mu kpãa à nɛ hee à lɔ kpãa kókò sinte, ŋɔi gbakã amalekau í nɛ í jɔ̀ Piɛɛ.

11Ŋɔi Piɛɛ í yɔɔ bɛbɛi iyi kù jɛ àla. Nɔ í ni, ntɔ ntɔ Ilaaɔ̃i í bɛ sim amalekaɛ wa ku na ku nyam hai si awɔi Herodu, do laalɔ iyi Zuifu ŋau à waa bi a ceem fei.

12Iyi í yɛ yaasei ideu ŋɔi í bɔ kpasɛ̃i Maari iyei Zãa Maaku. Wee í ko inɛ nkpɔ nkpɔi í tɔtɔɔ bɛ à wasi ku ce kutɔɔ. 13Iyi Piɛɛ í to bɛ ŋɔi í cã gamboi andɛ koofau ŋɔi abo woo ce icɛ gɔ iyi à ya kpe Rodu í koo í bee í ni, yooi. 14Iyi í mà imui Piɛɛ ŋɔi inɔ didɔ̃ kù jɔ̀ kù cũu. Ŋɔi í sɛi í nyi ile í koo í sɔ̃ inɛ ŋa í ni Piɛɛ í wa andɛ koofa. 15Ŋɔi à sɔ̃ɔ à ni, ì waa sũmui. Amma í ni, ntɔ ntɔi. Ŋɔi à ni, á má jɛ ayaɛi. 16Wee Piɛɛ wa leekĩ bɛ í wasi ku cã gambo. Iyi à naa à cũu nɔ à ba wee nŋui, ŋɔi í mu ŋa biti. 17Nɔ í ni a coko do awɔ í bɛi wa sɔ̃ ŋa bɛi Lafɛ̃ɛ í ce í nya nŋu wa hai ile piisɔ̃ɔu. Ŋɔi í ni a koo a sɔ̃ Zaaki ideu do kpaasi ŋa iyi à gbe, í bɛi í fita í bɔ inya mmu má.

18Iju kumáɛ daadaakɔ ideu í jɔ̀ sooge ŋau à biti hee à bee njɛ à waa ni, ikpa iwoi Piɛɛ í bɔ. 19Ŋɔi Herodu í ni a dɛdɛɛ. Ŋɔi à dɛdɛɛ amma a kù yɔɔ. Ŋɔi í bee woo degbe ŋau ide. Si bɛi a kù yɔkɔ a kù jɛaa, nɔ í ni a kpa ŋa. Ŋɔi Herodu í bɛi í dede hai ilɛi Zudee í koo í buba ikpa Sezaree ajɔ minji titã.

Ikui Herodu*

20Wee idɔi Herodu í kɔ̃ò inɛi Tii ŋa do inɛi Sidɔ̃ɔ ŋa ntɔ ntɔ, ŋɔi inɛ ŋau à tɔtɔɔ njɛ nɔ à nya inɛ gɔ ŋa à bɛ ŋa bi Herodu. Nɔ à ce Balatu akawei ilaaluu kpaasi à bɛi à bɔ bi Herodu a koo a tɔɔɛ suuru domi inɛi ilɛ nŋa ŋa si ilɛi Herodui à ya bɔ ijɛ ku dɛdɛ.

21Ŋɔi Herodu í da nŋa ajɔ si bii á yɛ ŋa. Iyi ajɔu í to ŋɔi Herodu í dasi ibɔi ilaaluɛ í bɛi í buba si antaii kitãi bommaɛ í bɛi í so ide wa sɔ̃ inɛ ŋau. 22Ŋɔi inɛ ŋau à dɔ̃ anu à saabuɛ à waa ni, kù jɛ baa amanɛi wa fɔ ideu, Ilaaɔ̃i. 23Bɛ gbakã amalekai Ilaaɔ̃ í dasi Herodu bɔ̃ɔ í jɔ̀ kokoo ŋa à ŋɔ araɛ í ku, si na iyi í jɔ̀ nŋu amanɛ í gba amboei Ilaaɔ̃, kù kɔ̀si.

24Amma idei Ilaaɔ̃ njɛ í fangaa wa kɔ̃ɔsi.

25Iyi Baanabasi do Sɔlu à ce mii iyi à dasi ŋa ku ceu Zeruzalɛmu bɛ à tã ŋɔi à sinda à nyi Antiɔsi má. Iyi à waa nɛ à gbã Zãa Maaku í si ŋa.

Currently Selected:

Woo bɛ ŋa 12: MKL

Highlight

Copy