Woo bɛ ŋa 11

Piɛɛ í sisia inɛi igbɛi Jesu ŋa iyi à wa Zeruzalɛmu* idei Kɔɔnɛi ŋa

1Woo bɛ ŋa do kpaasi woo dasi Jesu naanɛ ŋa iyi à wa ilɛi Zudee à gbɔ iyi hai jɛ Zuifu ŋa mɔ à gba idei Ilaaɔ̃. 2Ŋɔi Piɛɛ í baa Zeruzalɛmu nɔ Zuifu woo dasi Jesu naanɛ ŋau à yɛ taaleɛ, 3à ni í lɔ kpasɛ̃i inɛ ŋa iyi a kù ce bango nɔ aŋaò ŋa à jɛ. 4Ŋɔi Piɛɛ í sisi nŋa ideu hai sinteɛ bɛi í ce fei.

5Í sɔ̃ ŋa í ni, waati iyi ǹ wa Zopee ǹ wa n ce kutɔɔ ajɔ nŋu gɔ, ŋɔi ǹ ce kuyɛ. Ǹ yɛ acɔ nla gɔ iyi à waa mu gonta mɛɛɛ wa kita wa hai lelei Aɔ̃ í naa í leekĩ kɔkɔm. 6Iyi ǹ wa n cɔɔ do laakai, ŋɔi si inɔɛ ǹ yɛ mɛɛmui sako ilu kutɛ mɛɛ ŋa do iŋa ku cã ilɛ ŋa do yɛi ŋa. 7Ŋɔi ǹ gbɔ ide ku fɔ gɔ í sɔ̃m í ni, Piɛɛ dede, kpa i ŋɔ. 8Amma ǹ ni, jãm Lafɛ̃ɛ. Ajɔ kãma iŋa iyi í jɛ iwɔ̀ hee má jɛ iyi í riisi kù lɔ gɛlɛm. 9Nɔ ide ku fɔu í sɔ̃m má hai lele í ni mii iyi Ilaaɔ̃ í ni í maaju, n maà n kɔ̀si. 10Bɛɛbɛi í ce isɛ gbɛɛta í bɛi í nyi lele.

11Wee hai Sezaree à bɛ sim amanɛ mɛɛta gɔ ŋa wa. Bɛ gbakã inɛ ŋau à to wa andɛ koofai kpasɛ̃ bii ǹ wau. 12Ŋɔi Hundei Ilaaɔ̃ í ni n too ŋa n maà n leekĩ leekĩ. Nɔ kpaasi mɛɛfam ŋau ihɛ̃ à sim Sezaree bɛ nɔ à lɔ kpasɛ̃i Kɔɔnɛi ajɔ. 13Nɔ Kɔɔnɛi í sɔ̃ wa bɛi nŋu í yɛ amaleka si kpasɛ̃i nŋu wa leekĩ nɔ í ni, bɛ inɛ gɔ ŋa Zopee a koo a kpe Simɔɔ Piɛɛ wa. 14Nŋui á sɔ̃ɛ bɛi awɔ do nyaanzeɛ ŋa fei aa ce i baò faaba ŋa. 15Ŋɔi ǹ koo. Iyi ǹ sinti ku waazo, ŋɔi Hundei Ilaaɔ̃ í naa si ŋa wa bɛi í naa si awa mɔ tako wo. 16Ŋɔi ǹ ye gigii ide iyi Lafɛ̃ɛ í fɔu iyi í ni, Zãa í dasi inɛ ŋa inyi, amma Hundei Ilaaɔ̃i an da nŋɛ si. 17Bɛɛbɛ mɔi Ilaaɔ̃ í ce nŋa amua bɛi í ce nwa wo waati iyi à dasi Lafɛ̃ɛ Jesu Kirisi naanɛ. Na nŋu, bɛirei amu an ce n ganji mii iyi Ilaaɔ̃ í ce. 18Iyi inɛ ŋau à gbɔ ideu, ŋɔi idɔ nŋa í tũ, nɔ à saabu Ilaaɔ̃ à waa ni, debɛi, Ilaaɔ̃ í mua hee do dimi mmu ŋa mɔ kpãa a kpaasiò idɔ nŋa a baò kuwɛɛ hai tã.

Igbɛi inɛi Jesu ŋa iyi í wa Antiɔsi

19Woo dasi Jesu naanɛ ŋa iyi à fangaa bii fei na ijuukpã iyi í naa si waati iyi à kpa Etiɛniu, inɛ gɔ nŋa ŋa à sa à bɔ hee gũngũm gɔ iyi à ya kpe Kitimu. Inɛ gɔ ŋa mɔ à bɔ ilɛi Fenisi, inɛ gɔ ŋa mɔ à nɛ Antiɔsi. Zuifu ŋa aŋa akãi à ya maa waazoa laabaau jiidau. 20Do nŋu fei, inɛ gɔ ŋa hai si inɔ nŋa à naa hai Kitimu do hai Sirɛni à bɔ Antiɔsi nɔ à waa sisia hai jɛ Zuifu ŋa mɔ laabaau jiidai Jesu Lafɛ̃ɛ. 21Nɔ gbugbãi Aɔ̃ Lafɛ̃ɛ í wɛɛ nŋa, nɔ inɛ nkpɔ í kpaasi idɔ í dasi Lafɛ̃ɛ Jesu naanɛ.

22Iyi inɛi igbɛi Jesu ŋa iyi à wa Zeruzalɛmu à gbɔ ideu, ŋɔi à bɛ Baanabasi Antiɔsi bɛ. 23Iyi í to bɛ í yɛ bɛi Ilaaɔ̃ í cea inɛ ŋau didɔ̃ nɔ inɔɛ í dɔ̃. Ŋɔi í mu nŋa gbugbã ku ba a leekĩ dim dim si Lafɛ̃ɛ do idɔ nŋa fei. 24Baanabasiu inɛ ncɛɛi iyi í dasi Jesu naanɛ ntɔ ntɔ nɔ í kɔ̃ò Hundei Ilaaɔ̃. Nɔ akpɔi woo dasi Lafɛ̃ɛ Jesu naanɛ ŋau í nyi í kɔ̃ɔsi má.

25Si anyiɛ ŋɔi í bɔ Sɔlu ku dɛdɛ ikpa Taasi. 26Iyi í yɔɔ ŋɔi í bɔòɛ Antiɔsi. Adɔ̃ akãi aŋa minjiu à ce bɛ à ya tɔtɔɔ do inɛi igbɛi Jesu ŋa nɔ à ya kɔa inɛ nkpɔ si cioi idei Ilaaɔ̃. Antiɔsi bɛi à sinti ku kpe inɛ ŋa iyi à waa too kpãai Jesuu inɛi Kirisi ŋa.

27Waati bɛɛbɛ walii gɔ ŋa à bɔ Antiɔsi hai Zeruzalɛmu. 28Inɛ akã nŋa iyi à ya kpe Agabusi í dede í leekĩ nɔ í ce walii do sobii Hundei Ilaaɔ̃ í ni ari nla nla á ce si andunya fei. Bɛɛbɛ mɔi ariu í nɔ í ce si waatii Kolodu ilaalu nlai Romuu. 29Si bɛi inɛ ŋa iyi à waa too kpãai Jesuu à gbɔ bɛɛbɛ ŋɔi à dasi idɔ aŋa a samba amua ŋa zaka bɛi inɛ fei í nɛ, ku ba ku sobi kpaasi nŋa ŋa iyi à wa ilɛi Zudee. 30Ŋɔi à ce bɛɛbɛ, nɔ à jɔ̀ Baanabasi do Sɔlu à kooò amuau bi inɛ ngboi kpaasi nŋa ŋau.

Currently Selected:

Woo bɛ ŋa 11: MKL

Highlight

Copy