Matthew 15

Tutubena vene di oteimana ago

(Mk 7.1–13)

1Mina usi Pharisee vene ma ago gira oteimana vene bi Jerusalem gutuna Iesu rofu baesi nikaiteyadi, 2“Beika resi yi usi dina vene bi uni aufakai di toutou ukero vau rededi? Adina bi vana de koitesi iruku iridedi!”

3Ma nikabai reyo, “Ye ya bi beika resi yi aufakai di toutou dada Sei di ago gira ukero vau rededi? 4Adina Sei yaku niyo, ‘Yi nono baba emagui re,’ ma ‘Kaere yaku nono o baba nikiraini rego, bi umuyeyaine.’#Ex 20.12; 21.17; Lev 20.9; Deut 5.16 5Idu ya yaku nidedi bi, ‘Amiye kaere ini sogona amededi vonisi, bi mina yaku ini baba o nono aedegedi. Idu nido, Mina bi Sei di sogona resi 6ini baba#15.6 ini baba; bura bedakai ini nono o baba nufa. rofu bi kikifa ga reyaine.’ Ye yi aufakai di toutou rededi dada Sei di ago moi no ridedi. 7Ya ofarosi vene! Isaiah bi rama nisi ya vene dada Sei di ago niyori:

8‘Mina vene bi#15.8 Bura bedakai ka ini vena dudu na negau baesi nufa. ini afiye dudu na kikifa rededi,#Is 29.13

idu ini uka bi na rofu bi maike tora.

9Na nivakei kava rededi;

adina ina yaku mokededi bi, amiye di oteimana ago bi Sei di ago gira kana!’ ”

Gugura dudu amiye moi kino ridedi rofu niyo

(Mk 7.14–23)

10Kamini amiye tau gade raka niegogo resi niyo, “Neidesi diba nifa! 11Beika amiye di vena ideri nedo bi moi kino de rido; idu beika ini vena ideri gutuna yakudo mina yaku amiye moi kino rido.”#15.11 amiye moi kino rido: mina bi Sei di nemokori.

12Kamini ini usi dina vene baesi nikaiteyadi, “Pharisee vene mina ago neidegasa uka kenoka reyadi, bi diba niyo ba ide?”

13Idu nikabai reyo, “Yabo tau nai Baba omari yaku de variyo bi ini darusa kurugo. 14Mina vene bi ferei tavoi refa; ina bi ne taufa ourefeidena vene.#15.14 ne taufa ourefeidena vene bura bedakai ne taufa amiye di ne taufa ourefeidena vene nufa. Ye ne taufa amiye yaku ne taufa amiye ourefeidego vonisi, bi ina remanu sokuri gogo abougedi.”#Lk 6.39

15Idu Peter yaku niyo, “Mina mokena ago ini rama una rofu nirorotari re.”

16Ye nikaiteyo, “Ya ka bi toga ada yora de ba? 17Diba de nidedi ba, beika vena ideri dui resi rivori gutuna nesi bi roaita yakudo? 18Idu beika bi vena gutuna yakudo bi uka mekori gutuna baedo, ye mina yaku amiye moi kino rido.#Mt 12.34 19Adina mokena no, amiye umuyena, mena vene koa rena, mena de vene koa rena, duma duma rena, ofa sina nina ma amiye di roka moi no rina bi ukari gutuna yakudedi. 20Mina vegu yaku amiye moi kino ridedi; idu vana de koitesi iruku irina yaku bi de moi kino ridedi.”

Rema yokoi di mokena vari gira aena

(Mk 7.24–30)

21Mina usi Iesu mina sana feresi Tyre ma Sidon adina gaganiri diyo. 22Ye mina gaganiri amedo Canaan rema yokoi ina rofu baesi raka nisi niyo, “Varika amiye, David di tutubena mida, na iriyeduka re! Vima no yaku nai vefa di roaitari dui reyo ma esika esika tora gade mado.”

23Idu nikabai de reyo, dada ini usi dina vene yaku baesi ina rofu usa usa niyadi, “Toga una usi digasa imuna nido, ye nifeide kumo diyaine!”

24Kamini nikabai reyo, “Na bi Israel vene, kaere bi mamoe boiyo reyadi kana, ina rofu maka nifeideyo.”

25Idu mina rema baesi ini budari nivakesi niyo, “Varika amiye, na aede!”

26Idu nikabai reyo, “Bi buni de mida mida di iruku moisi auna rofu makugiya.”

27Kamini niyo, “Varika amiye, rama nisa, idu auna ka ini varika amiye di teiborori iruku bubudo yarededi ka iridedi.”

28Ye nikabai reyo, “Rema, yi mokena vari gira aena bi tora gade! Yi beika mokegasa nisa bi ya rofu vata nigo.” Ye mina meda nemokori ini vefa bi moi buni riyo.

Iesu yaku amiye tau gade moi buni riyo

29Iesu mina sana feresi Galilee moka daidai tora seriri nana resi omuna odorori bosi ameinu reyo. 30Kamini amiye tau gade gade ina rofu baesi yuka no, ne taufa, yuka kevo, babo vene ma amiye be tau gade afei baesi ini yuka adinari aeyadi ma moi buni riyo. 31Ye mina amiye tau gade bi babo ago nigamadi, yuka kevo buni nigamadi, yuka no nana regamadi ma ne taufa dudusa vegamadi, mina vegasa tururu resi Israel di Sei di roka moi odoro riyadi.

Iesu yaku amiye tau gade gade bi vana reyo

(Mk 8.1–10)

32Kamini Iesu ini usi dina vene raka niegogo resi niyo, “Na bi mina vene tau gade rofu iriyeduka reida, adina bi nasa sena meda regodenu ameyadi ma irigedi iruku bi koina. Na ura de reida rauna nifeidegida ma digedi, bi idau muyei tamatama regedi baebu.”

33Ye nikaiteyadi, “Una bi goidu mina gagani autu sanari beredi tau gade moisi mina amiye tau gade gade vana regifa?”

34Ma nikaiteyo, “Ya bi beredi bado gokaisanu be nufa?”

Ma nikabai reyadi, “7 ma oyena keika keika maka.”

35Ye ina yaku amiye tau gade konori ameinu reyagane vo niyo. 36Resi bi beredi bado 7 ma oyena moisi buni tora gade Sei rofu masi beredi okusi ini usi dina vene maro ma amiye rofu rau reyadi. 37Ma ina vene tau vakoi iruku iriyadi ma uka bere niyadi. Ye tuta fereyadi bi foroka 7 moi vata baeyadi. 38Mina iruku iriyadi vene bi rumana vene 4,000; rema ma mida mida bi duaiya de reyadi.

39Kamini amiye tau gade nifeidesi boutiri keu risi Magadan#15.39 Magadan; bura bedakai Magdala nufa. gaganiri neyo.

Currently Selected:

Matthew 15: kqc

Highlight

Copy