Matthew 14

John Baptist di muyena

(Mk 6.14–29; Lk 9.7–9)

1Mirona ituari Herod, Galilee di ourefeidena amiye, yaku Iesu beika regamo di sina neidesi 2ini naivo vene rofu niyo, “Mina bi John Baptist. Ina bi muyena gutuna dadi rae reyo! Mina resi bi mokena vegu di vava ina rofu vata nidedi.”

3Herod yaku mina ago niyo, adina bi sena ago maro ma John moisi ini yuka ukita risi dibura yavari aeyadi, Herodias, kaere bi ini dubuini Philip di rema, dada.#Lk 3.19–20 4Ini adina John yaku nigamo, “Ina meyo bi tabu!”#Lev 18.16; 20.21 5Herod ini ura bi umuyego, idu amiye tau gade rofu ori regamo, adina amiye yaku mokegamadi John bi Sei di ago niyo amiye yokoi.

6Herod di vata niyo medari, Herodias di vefa yaku amiye di nemokori adena uyo, ye Herod bi ada reyo, 7mina resi iniye nivarika resi nitore reyo bi beika usa nigo bi mago.

8Mina rema ofi di nono yaku niyo kana, usa niyo, “Minari mereki odorori John Baptist di ada na ma!”

9Ye kini iriyeduka yaku no niyo, idu ini nitore reyo ago ma okiyadi vene dada, bi ago gira niyo bi maraganedi. 10Ye ini iya redo amiye rofu ago gira maro ma dibura yavari John di ada nu burusi 11ini ada mereki odorori ae moi baesi mina rema ofi maro ma dadisi ini nono maro. 12Ye John di usi dina vene baesi ini roaita maka moisi guri aesi Iesu rofu disi nioteimaradi.

Iesu yaku amiye tau gade gade vana reyo

(Mk 6.30–44; Lk 9.10–17; Jn 6.1–15)

13Iesu mina ago neidegasa bi mina gagani feresi bouti keu risi inaike mafumafu sana yokoiri boyo. Idu amiye tau gade mina neidegasa taoni gutuna yuka dudu usi boyadi. 14Ye bouti feresi soka regasa bi amiye tau gade gade vesi ina rofu iriyeduka resi ini gauka moi buni rigamo.

15Uriyenau niyori, ini usi dina vene ina rofu baesi niyadi, “Mina sana bi autu sana, ma ari bi koina niyo mini. Amiye nifeide kumo rauturi ini iruku voi reyaganedi.”

16Idu nikabai reyo, “Ina vene bi de digedi; ya yaku iruku mafo kumo iriyaganedi!”

17Idu nikabai reyadi, “Unasa bi beredi 5 ma oyena remanu maka.”

18Kamini niyo, “Mina na rofu moi baefa.” 19Ma amiye tau gade rofu ago maro oruma fafau ameinu reyaganedi. Mina beredi 5 ma oyena remanu moisi oma vegasa buni tora gade Sei rofu masi bi beredi okusi ini usi dina vene maro ma amiye tau gade maradi. 20Ye ina tau noibanu iriyadi ma ini uka bere niyadi. Ma ini fereyadi iruku tuta butu risi foroka 12 moi vata baeyadi. 21Ma mina iriyadi vene bi rumana vene 5,000 kana, rema ma mida bi duaiya de reyadi.

Iesu koru fafau nana reyo

(Mk 6.45–52; Jn 6.16–21)

22Ye amiye tau gade nifeidegasa evade ini usi dina vene rofu ago maro bi bouti keu risi ina siko moka daidai tora berou eta rofu boyaganedi. 23Ye amiye tau gade nifeidesi bi inaike omuna ikari usa usa nigika boyo. Uriyenau tumu niyori, ina bi inaike amegamo. 24Ye mina medari bouti kono feresi maike tora niyo, ma ureure yaku bouti moi diga bogasa regamo, aura bi bogamadi sana baegamo dada.

25Ari uvego atafuri, ina vene rofu moka daidai tora fafau nana regasa boyo. 26Idu ini usi dina vene moka daidai tora fafau nana regamo vegasa ori resi niyadi, “Mina bi godiyo!” Resi ori dudu ababa niyadi.

27Idu minari maka ina vene rofu niyo, “Uka gira nifa; na mini. Ori ga refa!”

28Ma Peter yaku nikabai reyo, “Varika amiye ya vonisi bi, na ni kumo koru fafau ya rofu bae negida.”

29Ina yaku niyo, “Baevo!” Kamini Peter boutiri gutuna soka resi Iesu urana koru fafau nana rei boyo. 30Idu ne resi aura tora vegasa ori resi tomu nigasa raka niyo, “Varika amiye, na moi vegu ri!”

31Minari maka Iesu yaku ini vana roto risi moi gira resi niyo, “Ya mokena vari gira keika aedo amiye, beika resi mokei itu reyo?”

32Kamini boutiri keu reyadiri, aura amuta niyo. 33Ye kaere kaere boutiri ameyadi yaku ina#14.33 Bura bedakai ka rofu disi nufa. nivakesi niyadi, “Rama ya bi Sei di mida!”

Iesu yaku gauka vene Gennesaret ri moi buni riyo

(Mk 6.53–56)

34Kamini moka daidai tora ugasi bi Gennesaret gaganiri utae riyadi, 35ma mina gagani vene yaku Iesu vei mama regasa amededi negau gagani vene tau rofu ago nifeideyadi ma amiye yaku ini gauka vene tau ina rofu afei baeyadi. 36Resi guyaguya nigamadi ini varuka metona maka avaka moiyaganedi. Ye kaere tau yaku avaka moiyadi bi buni niyadi.

Currently Selected:

Matthew 14: kqc

Highlight

Copy