LUK 9

Jisu ngi Siikhu rek Sowm lei Knii mdo Sii

1Ungta Mma ngi sowm lei knii rek own purkuk thida tarnam rek mkheng tun ni rutan mdo thloi nraan ungu omlai rek mdo pdam nraan rutan pii lamda. 2Ungta Isowr Kruwngpaam paryaam da, ungu mdo pdam nraan sii lamda. 3Ungta Mma ngi mhin inni theda, “Naanni ache thungki ra do khat lee hur maan, kchung daat don, thowngja daat don, thenpen daat don, sum daat don, dona knii karsak ki kuhur rome. 4Ungta naanni asun duwn khim khai, alu naan inn ava thung ngi am daat in. 5Ungta talu talu thung daat joso mmaanni atupthlun chaak maan ta, khuwpii ava ma da asun in mpha thu mmaan rinpaumin kupsulli, akhuwn arbaat akṭho pthiin.” 6Ungta mmaanni khuw rek mkheng thu kṭha paumin kparyaam ra chet lamda, mmun ktai thung ngi pdam lamda.

Herod Plung Chei Karche

7Tunva hava mdo tlot mkheng ava paam kpupa Herod ti aryaa da, ungu muplung ava chei karche chowp chda, mleija mii angṭhe ngi kdiyou dok Johon kring karheella dida the da. 8Mii angṭhe va Elijah kandang nga dida, mii murson rek nowl va chodu ki khulpu rek arlakki khat kardella dida theda. 9Herod va theda, “Hava mlei mkheng kdo aryaak ava ku da?” Ungbi kdei chra mma ngi thlaam da.

Jisu ngi Mii Pun Parnga mdo Pmaal

10Kenyee rekki kinle lamda mnong tlot in ava Mhin song chlam da. Ungta Mma ngi ṭhi lamda Bethsaida tdit khuwpii khat thung ngi thliir lamda. 11Mii mluwngpa rekki ava mdee in thungta, mdil ṭoi lamda, ungbi Mma ngi kowl chlam da, mhin inni Isowr ki Kruwngpaam the pik lamda, ungu kdam nuwm hin pdam pik lamda. 12Tunva khuw mjiin rui rui thungta, sowm lei knii rekki Mhin arva lamda, the lamda, “Mii luwng rekka apsun chlam, marveel ki khuwpaam rek leh khuw rek tha chet lam sora, miprii chaak nraan leh mdo chaak raan apha chlam so, mleija nenni ta am naan hava munna ktliing.” 13Pdainu Mma ngi mhin inni theda, “Mdo chaak raan do mruk naanni apii chaan.” Mmaanni theda, “Neenni chet da hava mii mkheng tumra then kren kma donle, thenpen parnga leh tuwlva knii kheelli do thloi chmaan ring.” 14Mleija mii rekka mii pun parnga arveel kurthuwk da. Ungta Mma ngi siikhu rek hin theda, “Lop som parnga nga arveelli mko on nraan atloin.” 15Ungta mmaanni anto tlo lamda, mii mkheng nga pkong lamda. 16Ungta thenpen parnga leh tuwlva knii Mma ngi lou da parwaan hansuw da, phowl kṭha pii thida khuida ungu miiluwngpa rek maiṭhuwm mi mdo down nra siikhu rek hin pii da. 17Ungta mii mkheng ngi mpoi in kpa ngi chaa lamda. Ungu mkikleem kṭik ava tomkal sowm lei knii ngi purkuk lamda.

Jisu Mlei thu Pitor do Thethut

18Tunva hanto thuwk da, Mma ngi msangtlaakki mṭhil chaak meek arlaanni, siikhu rekki Mhin thleng lamda; ungbi Mma ngi mhin inni pau khewl lamda, “Mii rek va Nea ku pi mtidit lamda? 19Ungta mmaanni arthawng da, “Baptis kuptlot Johon; pdainu angṭhe rek va Elijah pi di lamda, ungta angṭhe rek nowlva chodu ki khulpu rek thungki khat kring kardel pi dilam da.” 20Ungta Mma ngi mhin inni theda, “Pdainu naanva Nea ku pi atidit inna?” Ungbi Pitor ri arthawng da, “Isowr ki Khrista ava pti.”

Jisu ngi Kja kakham mdo phaak rang leh Mdiyo nra mdo The

21Pdainu Mma ngi pau pṭumda hava ku mii khat lee hin mdo the thut ma nraan, mhin inni paureen da, 22theda, “Mii Chapa ava ngi do knempok thu suwkthuw kphara, ungta kver rek, thiimpu kinreel rek, Nowlam chukpu rekki pthlei lam donle, ke eayou ra, ungu nii kdum diltha kring kardel ra.”

23Ungta Mma ngi mii mkheng hin theda, “Ku mii khatti kdil mṭoi nuwm bi, mdaksaa kulro mso ungu mnii ktaiki mkhros alou sora kdil aṭoi chaso. 24Mleija mrinkhu kaktlan nuwm mii ava kmaang chra, ungu kuku daat don Nei ktum mi mrinkhu mapmaan bi, mii ava kaktlan pik ra. 25Mleija mii ava ngi dultipaam mkheng pha sthi sora, mmaan chaak, mata mdaksaa mmaan chaakku ava tak ksi rang da? 26Mleija Nei ungta Kpauna rek tummi ning kja ksoi ku mii khat ava tumva, Mii Chapa ngi mlaarnee ngi ungta Mpah laarnee tung ngi Kchiir Waan tamsii rek tu murjun mpha thu ning kja ksoi psuk ra.” 27Pdainu naan hinni Neiji mkindit kthea, hava thung ngi krip daat mii angṭhe va Isowr ki Kruwngpaam mdee du khim khai kdiyou du nime.

Jisu Rungchen Karthleng

28Tunva hava mdo the naki mnii tret na dil tha Mma ngi Pitor leh Jeems ungu Johon ṭhida, lown leenni kṭhil chra hang lamda. 29Ungta Mma ngi mṭhil chaak slii arlaanni, Mmai rungchen kirthleng da, mdona ava kipleu dang ngi powlda. 30Ungta asuwn, Mousi leh Elijah miilai knii rekki karbiik ṭhida. 31Mmaanni mlaarnee inni ktardet lamda, Jerusalem thu Mma ngi purkhum da, msun chaak nrang ki the pik lamda. 32Tunva Pitor leh mmiiṭhi rekka kdung ngi mmik in khu da kurngui lamda, mkarsaal khot in thungta, Mma laarnee leh miilai knii mbe ngi krip daat dei lamda. 33Ungta Mma hinki miilai knii ava msun slii arlaanni, Pitor ri Jisu hin theda, “Chukpu, hava thung ta am daat inna kṭha a, nenni buw inn kdum sa in che, Nah atumra khat, Mousi tumra khat, ungu Elijah tumra khat” mma ngi mdo the ava dei chme. 34Mma ngi hava mthe arlaanni, armei khat kurjung ngi arjiil dok lamda, ungta armei thung ngi mlu dok lei inni mmaanni ṭi lamda. 35Ungta armei thungki krowl khat kthleng ngi theda, “Hava Nei Kchapa, Nei Kdo kchol dok; Mhin ni aryaan!” 36Ungta krowl ava ngi mthe dok le Jisua mthi ndaatti pha lamda. Ungu mmaanna rim kdi am lamda, ungta ava nit rek lim thungva, mmaanni mdo dee in ava ku mii khat lee hin do khat lee pre song lamme.

Jisu ngi Pthla Kṭhakma Pselnao Khat mdo Pdam

37Mupduk nii ngi mmaanni lown leenki murjun in thungta, klin langlang khat mii rek mluwngpa ngi kurdut ṭhi lamda. 38Ungta asuwn, mii mluwngpa thungki miilai khatti ṭap da, “Chukpu, kchapa mhai sut pik cha dinu akaktham chaakka, mleija mma knao mkhat chrel; 39ungta asuw, pthla khatti kjowng da, ungu tun kat daatti owngda, mhuwn mṭhut du khim khai tnok da, ungta lim tlit kchok da, mrow kparsa ngi ma kchok da. 40Ungta ava mdo trei pthii pik nlamra asiikhu rek hin kaktham kcha ping, pdainu pchaang lam mda.” 41Jisu ngi arthawng da, “O, krin dei kma ungu karmak charuwl rek, tak hep pang roi ksotti Neiva aṭhiin nik don adiil ṭhiin nik da? Hava tha achapa ava arvan ṭhi.” 42Mma ngi marvan slii arlaanni tarnam mi tnok ptluwda. Pdainu Jisu ngi pthla ktobor ava raida, ungta pselnao ava pdam da, ungu mpah hinni pii pinle da. 43Ungbi mii mkheng nga Isowr kullaar ava tun ngak chda.

Jisu ngi Mdiyo nra Mlei thu mdo The Nowl

Pdainu Mma nong tlotti mii mkheng mnga chaak slii arlaanni, msiikhu rek hin Mma ngi theda, 44“Hava pauna rek ava aknaa khur in thung ngi aplut in; mleija Mii Chapa ava mii rek khut thung ngi kparlaan pthii ra.” 45Pdainu mmaanni hava mdo the ava dei pandi chlam me, ungu mmaanni mdo dee pandit ma nraan, kurdowl kcha a; ungta hava mdo the mlei ava Mhin mdo khewl raanna ṭi chlam da.

Ku ngi Klin sii

46Ungta mmaan arlakki ku ngi klin sii kdingi karteen nlam da. 47Pdainu muplung thuwnni mdo reel in ava Jisu ngi deida, Mma ngi nao khat louda, msiir ri thiida, 48ungu mhin inni theda, “Ku mii khatti hava nao marlaan chaak bi Nei mdo tarlaan chaak, ungta Nei mkarlaang kcha ku mii khat va Nei mju ksi Mma mdo arlaan chaak; mleija naan arlakki kdil sii mii ava ngi klin khat ra.”

Naan Akahal Kmaan Mii ava Naan Atum

49Johon ni arthawng da, “Chukpu, Nah amiing ngi tarnam rek krei pthi neenni dei innu, ungbi pdown pthiinnu, mleija mma va nen ndil ṭoi mda.” 50Pdainu Jisu ngi mhin theda, “Pdown maan; naan akahal kmaan mii ava naan atum.”

Samaria Khuw Khatti Jisu Mat da mdo Kowl ma

51Jisua mdo arjuk arlaan chaak nra nit rek mnai thungta, Mma ngi Jerusalem ktong tha Mmai tarngai da. 52Ungta Mma ngi mdu thang ngi tamsii rek haisiida, Mma tummi kpurchuwl pik rang ngi Samaria khuw khat thung va lut lamda; 53pdainu mii rek va arlaang chlam me, mleija Mma ngi Jerusalem ktong tha Mmai tarngai da. 54Ungta Mma siikhu rek Jeems leh Johonni ava mdee in thungta, Mhin the lamda, “Mukpu, parwaan ki mei arjung ṭumda mmaanna mukbun chaak nraan neenni kdo own raan angeija?” 55Pdainu Mma ngi kinle da rai lamda. 56Ungta khuw murson tha mmaanni va lamda.

Jisu dil Kṭoi rek rang

57Mmaanni hanto lam thu mche slii arlaan inni, miilai khatti Mhin theda, “Nah ache na ktai thung ngi aju ṭoi chni.” 58Tkei rekka mkhur ka am, kjuwng puwa rekka mbuw ka am; pdainu Mii Chapa ngi mluw thiida mkarngat chaak nra mun khat lee amme.” 59Ktlok mii khat hin Mma ngi theda, “Kdil aṭoi cha.” Pdainu mma ngi theda, “Mukpu, ru kri ngi vang nira kpah alruwl chdok ni.” 60Pdainu Mma ngi mhin theda, “Kdiyou rekki mdaksaa in diyo mdo alruwl chaak nlamra ama pthi; pdainu nah tumva vangra Isowr Kruwngpaam aparyaam.” 61Ktlok mii khatti theda, “Nah dil ṭoi chnik di, Mukpu; pdainu inn tha ka am mii rek hin ru kri ngi thaan chlam ni.” 62Jisu ngi mhin theda, “Mdo hoi nrang leen khut kikhiing dokki, kinle da khuw ksuw ku mii khat lee ngi Isowr Kruwngpaam kirang nga kurhui me.”

Currently Selected:

LUK 9: LAMKBSI

Highlight

Copy