LUK 8

Jisu tu Kilṭhi Snu rek

1Ava dil tha ambong thida, Mma ngi khuwpii rek leh khuw rek tha, Isowr Kruwngpaam ki kṭha paumin sin da, paryaam da. Ungta Mma ngi sowmlei knii rek ṭhida, 2ungu Mma ngi pthla kṭha kma rek leh omlai mdo pdam pik snu rek angṭhe ruk ṭhida: tarnam tikheu mdo rei pthi pik Magdaleni Mery mdo dit, 3Herod sumdowl ksin Chuya numei Joana, ungu Susanna, ungta mmaan sok lo pik da kpurdon snu rek mii angṭhe ruk am lamda.

Chii Kvar Paupurtol

4Ungta khuwpii ktaiki mii rek mluwngpa ngi klin lang lang ngi Mhin kthuwk kurkuk hin tha Mma ngi pau purtolli theda: 5“Chii kvar khatti kvar ra chet da; ungu mma ngi hanto mvar thungta, angṭhea lam thu tla da, ava khu ngi ther pthii da, ungta kjuwng puwa rekki chom chda. 6Ungta angṭhea lung leenni tla da, marhan mown thungta, mchor ma leiji purvui chda. 7Ungta angṭhea tirliing arlakki tlada; tarliing tu mowng veeda, ungu tarliing ngi archuk youda. 8Ungta angṭhea duldak thu tlada; ungbi mbel tunni arjaa khatti chuida.” Havale mthe chunni Mma ngi owngda, “Taryaak na knaa kthloi ku mii khatti aryaa chso.”

Paupurtol rek Mlei

9Ungta hava paupurtol rek mlei thu siikhu rekki Mhin mkhewl thungta, 10Mma ngi theda, “Naan hinva Isowr Kruwngpaam ki tuprut pau ado dee nraan ado tpiik chaak in; pdainu murson rek hinva do mkheng nga ksuw daatti mdo dee ma nraan, ungu karyaa daatti mdo aryaak pindit ma nraan paupurtol li kurthuwk.

Jisu ngi Chiikvar ki Paupurtol mdo Thethut

11Tunva paupurtol ava hava: Chiimuh ava Isowr pauna. 12Lam thu ktla ava karyaa mii rek; mmaanni rin chda mdo ktlan pik ma nraan, dijabowl thleng da, mmaan plung thungki pauna rek ava mdolo pthii. 13Ungta lung leenni ktla rek mmaan na, pauna maryaak thuwnni kanpa ngi arlaang chlam da, pdainu mmaanna arjuwng ame, mmaanni mpha mruk tummi rin chlam da, ungta kepthleem mpha thung ngi ktluw chlam. 14Ungta tirliing rek arlakki ktla tumva, mmaanna karyaa mii rek, pdainu mmaanni mche in nopa ava lamtha chet lamda, suwang leh rinkhu dongei ava tuk sut lamda, ava ngi archuk youda, ungta thei ruk mpung phame. 15Ungta dul kṭha thungki tumma, mmaan ava pauna karyaa mii rek, plung knet ungu kṭha plung ngi kukjowng mer kcha, ungta mdo diil chaak in tu kilṭhi ngi thei mdo thuwṭhiin.

Tomkal Dokhum Meila

16“Ku mii khat lee ngi meila khat pchuk thida uwm mi khum nime, mata kowm ti ngi thii nime, pdainu klut mii rekki mar awng mdo dee nra, mri na khat leenni kthii ra. 17Mleija mdo pandan ma ra kurdowl daat do khat lee ame, mata mar awng thu kandang kma ra tdee mara tuprut do khat lee ame. 18Naanni tak heppi aryaak in tdit cheek asin chaan; mleija kthloi mii ava hin kheelli kpii ra, ungu kthloi kma mii ava, mma ngi kthloi chaakka dida mdo bin in ava ruk klou pthii ra.”

Jisu Nuh leh Mnaopale

19Ava dilli mnuh leh mnaopale Mhin ni arva lamda, pdainu mii mluwngpa ngi mlei kurthuwk da kurdut ṭhii pchaang lamme. 20Ungta Mma the pik lamda, “Nah nuh leh anaopale ngi duwn tha rip daat lamda, atkurdut ṭhii chaak nuwm lamma.” 21Pdainu Mma ngi mhin inni theda, “Nei knuh leh knaopale ava Isowr pauna aryaa da ktlo mii rek ava kurthuwk.”

Jisu ngi Tchangkhuw mdo Pdaai

22Nii khatti Mma ngi msiikhu rek tu arkuwng khat leen tuwng lamda, ungu Mma ngi mhin inni theda, “Nenni duwm raalpha khat ktong tha vang arkaan inche.” Ava tha mmaanni vang lamda, 23ungta mmaanni anto mvan slii arlaan inni Jisua iip dok da. Ungta duwm tuwnni tchangkhuw raangda, ungu dii kakna ngi pleeda, sulkurnul lam rang ngi tloda. 24Ungta mmaanni Mhin pha lamda, the lamda, “Chukpu, Chukpu, kmaang chra ntheenna!” Ungta Mma ngi kardelda tchangkhuw kraang ngi dii kakna ava rai da; ungu down dok da, pum daaiji daai dok chda. 25Mma ngi mhin inni theda, “Ado rin chaak inna tu ungda?” Ungta mmaanni ṭi lamda, ungta ngak chlam da, khat leh khatti the lamda, “Tchangkhuw leh dii hin Mma ngi pau mreenna mdo pṭoi daat in hava Mma ava ku aen daat rang da?”

Jisu ngi Tarnam rek Doṭhi Miilai Khat mdo Pdam

26Ava dilli mmaanni Galil raalpha khat ki Gerasinis khuwpaam thlung lamda. 27Ungta Mma ngi laan tun kal mkhiin daat le, khuwpii ava thung ngi tarnam rek doṭhi miilai khat kurdut ṭhida; mleija mpha roi ksot thung ngi mma ava mdo mna knaa kma am chda, ungu inn thung rukku ame, pdainu thlaan rek arlakki am da. 28Mma ngi Jisu mdee thungta,owng da mdu sukki tluw da, ungta krowl kparyaa ngi theda, “Kparthaang sii ki Isowr Chapa Jisu, nea talu mhai pardit chna di? Neiji akaktham chaakka, mhai pja chma.” 29Mleija mii ava thungki marvan thuw dok nra Jisu ngi pthla ktobor hin paureen da. Mleija mma ava mii ngi mpha maknem thung ngi kjowngda; kseel rek kurdu ngi thii da, thiir rii ngi bowl lamda, ungta mkhut ktu lamda, pdainu kpot pthiida, ungta mma ava tarnam mi kbowklaiji howl pthii da. 30Jisu ngi mhin pau khewl da, “Amiing nga ku da?” Ungbi mma ngi theda, “Nei kmiing nga mpunpa”; mleija tarnam knempok mthung ngi lut da. 31Ungta Mma ngi paureen da ungbi sim thung ngi mdo psun pthii ma nlamra mmaanni Mhin ktham chlam da. 32Tunva vak rek ava mluwngpa ngi kham kukki maal meek lamda, avale thung ngi mlu chaak nraan Mhin ktham chlam da. Ava leiji msun chaak nraan Jisu ngi rot pik lamda. 33Ava dilli tarnam rekki miilai ava thungki thuwk lamda, vak rek thung ngi lut lamda, ungta vak mluwng rek ava kham kukki arjun jaam lamda, duwm thung ngi tla you tir chlam da.

34Vak rek kseel cha rekki kthuwk nong ava mdee in thungta, mmaanni chen lamda, khuwpii leh khuwpaam thu song lamda. 35Ava dilli mii rekki kthuwk nong ava ksuwra arva lamda, ungta mmaanni Jisu hin arva lamda, ungta tarnam rek sun ndok miilai ava rukka Jisu khuther ri plung kinditti, dona naa da kuk ong daat ti mphaak in thungta, mmaanni ṭi chlam da. 36Ungta tarnam rek doṭhi mii ava tak heppi kdam tdit kdei mii rekki mhin inni song da. 37Ava dilli Gerasinis arveel ki khuwpaam ki mii rek mkheng ngi, mmaan hin ki msun dok nra Mhin ktham chlam da, mleija kdung reenni mmaanni ṭi lamda; ava leiji arkuwng leen tuwngda mdil kinle da. 38Mma ngi tarnam rek mdo rei pthii pik miilai ava ngi aju ṭoi chni dida Mhin ktham chda; pdainu Jisu ngi sii thida, the da, 39“A inn tha vang kinle, ungta tija pang Isowr ri ata tlot pik tdit athe thuw cha.” Ungta mma ngi vangda, mma tummi Jisu ngi tija pang mtlot pik tdit ki pau ava khuwpii mkheng thu paryaam da.

Jairas Chanu leh Jisu Buwmor kthowng cha Snu Khat

40Tunva Jisu ngi mkinlet thungta, mii luwngpa ngi Mma arda da kowl chda, mleija mmaan mkheng ngi Jisua arda daat lamda. 41Ungta Synagog kpu khat, mmiing Jairas tdit miilai khat arvada; Jisu khu ther ri tluw da, minn tha mhai nra Mhin ktham chda. 42Mleija kum sowm lei knii arveel, mchanu khat chrel mma ngi thloi da, ungu ava kdiyou chra theda.

Mma ngi hanto mhai slii arlaanni mii rek va klop dok da. 43Ungta kum sowm lei knii lik thung ngi hii ngi kjaan ungu ku mii khat lee ngi mdo pdam pik pchaan ma snu miilai khat amda. 44Mma ngi mdil pangtha arhang da, ungta mbuw mor nor chda; ungbi tun kat daatti mhii kjaan ava down dok da. 45Ungbi Jisu ngi the da, “Nei mhai kthowng nga ku da?” Mii mkheng ngi nei kme dida mmat sap arlaanni Pitor ri the da, “Chukpu, kurtuwl mii rek va nam kurduwl da aklop dok da!” 46Pdainu Jisu ngi theda, “Ku miilai khat var ple mukthowng nga: mleija Nei kthungki rutan khat kthuwk kdea.” 47Ungu snu ava ngi kukurdowl ronime tdit mdee thungta, mma ngi kunchun ni arvada Jisu du sukki tluw da, mii mkheng maiṭhuwm mi talu lei mma ngi mdo nor ungu tun kat daatti tak heppi kdam cha tdit thethuw chda. 48Ungbi Jisu ngi mhin theda, “Kchanu, ado rin chaakki kdam kcha im pti; kdaaiji vang cha.”

49Mma ngi hanto mpau slii arlaanni, synagog kpupa inn thungki miilai khat karva ngi theda, “Achanua kdiyou dok cha a, Chukpu ning tpumul bong ma.” 50Pdainu hava karyaa daatti Jisu ngi mhin theda, “ṭi ma, arin chdaat, mma ava kdam chdaat ra.” 51Ungu Jisu ngi inn ava thu mvan thungta, Pitor, Johon, Jeems, ungu nao ava pah leh mnuh daat kma donle, ku mii khat lee ngi mdo lu ṭhi raan ro me. 52Ungta mii mkheng nga kurnung karbaang da mma ṭat da; pdainu Mma ngi theda, “ṭap maan, mleija nao hava kdiyou pme, pdainu ki iip kcha ngaal.” 53Ungta mma ava kdiyou dok tdit mdo dee lei inni, mmaanni Mhin pnii chaak lamda. 54Pdainu mkhut tha kjowngda own thida, theda, “Nao nang ekardel.” 55Ungta mraothla kinle da, ungu kardel tengda; ungta mdo chaak ra then mruk mdo piik chaak lam nra Jisu ngi the pik lamda. 56Ungta mpah leh mnuh lea ngak chlam da, pdainu kthuwk nong ava ku mii khat lee hin mdo son ma nraan Jisu ngi pau pṭum da.

Currently Selected:

LUK 8: LAMKBSI

Highlight

Copy