LUK 16

Kindit Kma Sum Vaiklou

1Jisu ngi siikhu rek hin rukva theda, “Sum vaiklou khat kthloi suwangpa khat amda, ungu sum vaiklou mii ava ngi mdo thloi ava mpartlai kre thutta kdingi mhin son pik lamda. 2Ungta suwangpa ngi mma ava own thida theda, ‘Nah mlei thung ngi kdo aryaak hava talu da? Nang ngi ado phaak leh ado plu mkheng apindit dok, mleija nang ngi sumvai lou nowl nimti.’ 3Ungbi sum vai klou ava ngi mthi na ngi theda, ‘Neiki chukpu ngi sum vai kdolo ava mlo pthii bi, neia tak tlo nik da? ktou rang ruk kru tang me, ungu kdo ktham rang ruk kning kakjak ka. 4Neiji sum vai ava kdolo thung ki mtiknen pthi mpha thu, mii rek ava ngi mi inn thaanni mdo tkowl chaak lam nra, neiva tak tlo nikdamma.’

5“Ava leiji mma ngi mma ki chukpu lei ktuwl rekka khat khatti own thida, ru kri ava hin mma ngi theda, ‘Neiki chukpu hinki lei tija atuwl da?’ 6Mma ngi theda, ‘Tpartena ava arjaa khat thao.’ Ungta mma ngi mhin theda, ‘Ado kjitta alou pthii, ungu ku ong tengra som parnga adira akjit.’ 7Ava dilli mma ngi ktlok khat hin theda, ‘Ungu nangva tija atuwlda?’ Mma ngi theda, ‘Tpartena ava arjaa khat kehu.’ Mma ngi mhin theda, ‘Ado kjit ava alou pthii ungu som tret adira akjit.’ 8Chukpu ava ngi plung kseeng kma sum vai klou hin paureen da; mleija hava dultipaam naoleva kleng mar awng naole hinva mmaan charuwl rektu ksing ngi diil ṭhida.”

9“Ungta Neiji naan hin kthea, rinkindit kma alrou rektu adaksaanki ra plap atlo chaan, anto mkurthut bi naanni apchaan maan mpha thu, mmaanni kṭuw knai kma ma am naan thung ngi akukowl chraan. 10Kdil suwn thung ngi trin chaak kro mii ava klinpa thung rukva trin chaak kro; ungta kdil suwn thung ngi plung ktobor mii ava klinpa thung rukva plung ktobor. 11Naanni kindit kma alrou thung ngi trin chaak kro akurthut maannu, kindik suwang thuwna ava ku ngi aksil nraan? 12Ungta naanna ktlok mii hinni trin chaak kro akurthut maannu, tak heppi naan adak saanna ku ngi akpii raan?

13“Sra owr ku khat lee ngi chukpu rek knii soklo nime; mleija mma ngi khat pder chthi donle, khat wonsat klora, mata khat hin plung plut bet thi donle, khat ava kleek psuk ra. Naanni Isowr leh alrou sok klou pchaang ni maan ti.”

Jisu Dothe kcholu

14Hava mkheng nga sum wonsat klo Pharisi rek ki aryaa lamda. Ungta mmaanni ning punṭhuwm psuk lamda. 15Pdainu Mma ngi mhin inni theda, “Mii rek do sut na thung ngi naanni adak saanna pandit chaan tinu, mleija tdet in tinu, pdainu Isowr va aplung ril in mdo dee dok; mleija mii rek do sut na thung ngi kunton rek rek ava Isowr do sut na thungva tipder chaak kurhui.

16“Nowlam leh khulpu rekka Johon mpha kpha dekki ka am lam, mpha ava thungki kupṭhun ni Isowr Kruwngpaam ki kṭha paumin ava mdo paryaam, ungta mii pum ktaiji plung kngarri klut cha. 17Pdainu Nowlam thungki bindu khat mkurlo dok hinva parwaan leh dulti mmaan chaakki ko ol sii ra.

18“Numei rek bowr tlo pthii thida numei khat klou mii pum ktai ava losang mṭhia; ungta mi innpu ngi bowr mdo tlot pthii snu ava klou mii rukva losang mṭhia.

Suwangpa Khat leh Lasar

19“Mpha khat thung ngi suwangpa khat amda, mma ngi dona kning ngi ksen kparneem hiil naada, ungta mnii ktaiji then kdi chaa nee da. 20Ungta mdak mkheng ngi kpaan mmiing Lasar tdit miilai khat ava mma paltong bulli amda. 21Mma ngi suwangpa tebol tun ki bu ktla ava chom chnuwm da; ava daat kma ui rek rukva arva da kpaan rekka pliik da.

22“Sra miilai ava diyouda, ungbi waan tamsii rekki mma ava Abraham plung tun ni hun ṭhi da. Suwangpa ruk diyouda ungbi alruwl lamda; 23ungta sim thung ngi kja langlang ngi, mmik pkhap da khuw hansuw da, ungta lam kla ngi Abraham leh mma plung tun ni Lasar han deida. 24Ungbi mma ngi ownda, ‘Apah, Abraham, plungnee mhai tdet cha, ungu Lasar mju sii pik ra, kto owr kṭong kdo pdai chaak nra, mkhut chelli dii mruk mhai pchai pik chaso; mleija hava mei kṭuwng thung ngi neia kja kchaam ping.’

25“Pdainu Abraham mi theda, ‘Kchapa, nang ngi arin mpha thu do kṭha arlaang chtinu, ungta ava lulu ngi Lasar rukva kṭha kma arlaang chda; pdainu tunva mma ngi kanpa mphaak chaakka, ungu nah kja im pti, ava nang ngi abin phaak. 26Ungta ava daat kma, hava ki ngi naan kphara kjung mdo pchaan ma nra, ungu ava ki ngi neen mdo tphaak pchaan ma nraan, nen narlak inni khurpii khat ka am. 27Ungta, suwangpa ngi theda, ‘Akaktham chaakka, apah, nei kpah le inn tha mju sii pik cha, 28Mleija knaopa le miilai parnga ka am lam, hava suwk kthuwk mun thung ngi mmaanni mthlen ma nraan, mma ngi pau akham pik lamso.’ 29Pdainu Abraham mi theda, ‘Mmaan hinni Mousi leh khulpu rek ka am lam, mmaan hinki aryaa chlam so.’ 30Ungbi mma ngi theda, ‘Anto pme, apah, Abraham, pdainu kdiyou rek thung ki ku mii khat mjunbi, mmaanni plung ren kuhur ro lamra.’ 31Mma ngi mhin theda, ‘Mmaanni Mousi leh khulpu rek dothe maryaak maanbi, kdiyou rek thungki ku mii khat ring kinle daat joso, mmaanni plungren hur pchaang lam nime.’ ”

Currently Selected:

LUK 16: LAMKBSI

Highlight

Copy