LUK 15

Kmaang kcha Jao

1Tunva khasna klou rek leh pnu kirvei rekva Mhin karyaa chra nai lamda. 2Ungta Pharisi rek leh Nowlam chukpu rekki tuprutti karseel psuk lamda, the lamda, “Hava miilaiva pnu kirvei mii rek kowl lamda mmaal ṭhi lamma.”

3Ava leiji Mma ngi hava paupurtol li mhin inni theda: 4“Naan ku mii khatti jao arjaa khat mdo thloi thungki khat mmaan chaakku, som tku lei tku ava kbowk laiji mapthii donle, kmaang cha khat ava mphaak du khim khaiji mdil ṭoida thlaam ni memo? 5Ungu mma ngi mphaak thungbi, kanpa da, mlukou leen thiida. 6Ungta mma ngi inn thlungda maplap rek leh mveen rek own purkuk da, mhin inni theda, ‘Mhai kanpat ṭhi chaan, mleija kmaang dok kcha nei kjao ava pha chnu.’ 7Neiji ahin thaanni kthea, hava hep hep daatti, plung ren mdo hur nra arleek setti ka am kma, rinkindit dok rek mii som tku lei tku hinva pnu kirvei khatti plung ren mdo hur ava tummi parwaan tha kanpa ka amra.

Thiir Sum Kmaang

8“Mata snu miilai khatti thiir sum sowm mdo thloi thungki khat mmaan leiji meila pchuk da innruwt da mphan du khim khai ktippi suwda thlaam ni memo? 9Ungta mma ngi mphaak thungta maplap rek leh mveen rek own purkuk da theda, ‘Mhai kanpat ṭhi chaan, mleija neiji kdo pmaan chaak dok thiir sum ava pha chnu.’ 10Neiji ahin thaanni kthea, anto hep daatti, pnu kirvei khatti plung ren mdo hur leiji Isowr waan tamsii rek maiṭhuwm mi kanpa ka am.”

Kmaang kcha Chapa

11Ungta Mma ngi theda, “Chapa knii kthloi miilai khat amda. 12Ungu mnaopa ava ngi mpah hin theda, ‘Apah nei ktum alrou ava mhai pii cha.’ Ungta mdo thloi rek ava mikniing inni them pik lamda. 13Ungu nii mruk diltha mchapa kmova mtum mkheng purkuk thida, khuwpaam lamkla tha pveet chda, ava tha mma alrouva do kipsit kma partlai tir krep da. 14Ungta mma ngi do khim khai mpartlai dok diltha, khuwpaam ava thung ngi poi tham klin langlang khat amda, ungta mma ngi kikriing pṭhunda. 15Ava leiji mma ngi chetda khuwpaam ava thungki miilai khat hinni am chda; mma ava bil thung ngi vak kapmaal siida. 16Ungta vak rek do chaak vak then ava kdung ngi chaa chnuwm da; ungu mma ava ku mii khat lee ngi do khat lee pii chme. 17Pdainu mma mthi na ngi hanto theda, ‘Knemmi kpah dovai sra owr rek va thenpen kekleem lut lutti chaa lam imde, pdainu nea hava tha poi kthammi kmaang chra kthea. 18Neiji kurlou nira kpah hin vang nira ungu mhin the chni, Apah, parwaan leh nah amaiṭhuwm mi neiji pnu kirve chaakka; 19nah achapa rang nga kurhui chmaang, asra owr rek khat lulu ngi mhai kowl cha.’ 20Ungta mma ngi rip daat da mpah hinni arvangda. Pdainu mma ngi arvang da leer khatti ma am daat arlaanni, mpah ngi deida ungu wonsat lo chda, ungta mma ngi vachenda arpom thida put da. 21Ungu mchapa ngi mpah hinni theda, ‘Apah, neiji parwaan leh nah amaiṭhuwm mi pnu kirve chaakka; neia nah chapa rang nga kurhui chmaang.’ 22Pdainu mpah ngi msra owr rek hin theda, ‘Kbeiji dona kṭha arvan sin inra, mleen apnaak in; ungta mkhut leen panthla khat apnaak in, ungta mkhu tun ni khu kok rek apnaak in; 23thiinra silsuwn kmar dam khat arvan sin inra, akihe you in, nenni chaa in chera kanpa inche; 24mleija kchapa hava kdiyou kcha thungki kring nowl; mma ava kmaang kcha thungki kdo phaak chaak.’ Ungta mmaanni kanpa pṭhun lamda.

25“Tunva mchapa kver ava bil tha am daat da; ungu mma ngi arvangda inn mnai thungta, khung kdum leh kardaam aryaa da. 26Ungta mma ngi sra owr rek thungki khat ownda, hava talu lei kida kdingi paukhewl da. 27Ungbi mma ngi mhin theda, ‘Anaopa thlungda, apah ngi silsuwn kmar khat eayou da, mleija mma ngi kuhui deekki pha chda.’ 28Pdainu mma ngi plung pthit da vanglut nuwm mda. Mpah ngi arva da theem da, 29pdainu mchapa ngi mpah hin theda, ‘Asuw, hava kum tija thung ngi neiva sok alo chnu, apaureen rekka neiji leek liit maang, anto daat joso neiji kaplap rek kdo kanpat ṭhira keelsuwn khdaat ruk mpii mti. 30Pdainu achapa khatti ado thloi ava ko ok kma rek tu partlai dok thida, marvanna silsuwn kmar khat eayo pik chti nu!’ 31Ungbi mpah ngi mhin theda, ‘Kchapa, mpha ktai thu nangva ado ta am ṭhi daat, ungta nei kdo thloi mkheng ava nah ado. 32Ungu plung kngammi tkanpat kat raan, mleija hava anaopa ava kdiyou thungki kring, mma ava kmaang kcha thung ki tphaak chaak.’ ”

Currently Selected:

LUK 15: LAMKBSI

Highlight

Copy