MARK 9

1Sateichii mpounii ahnyii dakii tamle, “Inii gonyii dakii kasang- pii tam leile, aikito satsii kalei ahnyii mei kangkanii Saraa mah sating sazyii tei teimaham haisii kagong ngou kasuta taiga lakle.”

Jisunii jaitalui kali katu

(Met 17.1-13; Luk 9.28-36)

2Zang-saruknii tai Jisunii Pitar, Jems ninado Jon ahnyiigo roinii pangsii zang kasagoi hangniniiki pile, sateichii mpounii ahnyii doito jaitalui tei kali takle. 3Mpou peimani tei haranousii seilik-lik pat takle, sazyii pouryiimei peimani kakatamei mei hangninii kaniido teiziikii kata maha woleimakle. 4Teito mpoubou- mei hangtum teinii Ilaijah ninado Moses-nii Jisugo riishii kalei tei ngoule. 5Sateichii pitar-nii Jisuda tamle, “Madhiikapyiipii, nyiinii aiki kabam ai bitakle; nyiinii dwipeiki hangtum, gojangpii hangninii, Moses jangpii hangninii sateichii Ilaijah jangpii hangninii tiile.” 6Kadapokii mpounii dapei sam tam tangpo katu tisutakle, dapochiinii ahnyii tei hangkapii hingtakle.

7Teito kamong teinii gongsii ahnyiigo gomnei wotakle, sateichii kamong kiteito lat hangninii mashiile, “Ai ai Inii lungkasyii gunah sapfii mpou teile, mpounii katam tei gonyii swilo.” 8Teito ahnyiinii kalangsii n-nuk nryiisii jule, nlenii ahnyiigo kaswi kalei tei Jisu roisupiinii mei kaki hangninii kado ngoumakle.

9Sateichii ahnyiinii zang gam teito tat kahum tinglang kak, Jisunii ahnyiigo kakhat katwumsii tamle, meinah sapfii mpou teinii katai kito ringkhiiloi kasuta gonyiinii ngou kalu hangtei meida kado tam mati sulo.

10Ahnyiiniimpou sam taiswisii makum wotakle, nlenii ahnyiiroi- napii karashiitu takle, “Katai kito ringkakhii katu ai kadapeipo?” 11Sateichii ahnyiinii Jisuda n-nhiile, “Kadajangpii ajaitingshang kati ojameinii Ilaijah gongrei tanglesii tam leipo?”

12Jisunii ahnyii dakii khekalatle, “Kasangle, Ilaijahnii gongrei tangle amahlyii tiikada tang karam jangpii, nlenii meinah sapfii mpou teinii kamage hangka leh-tangle sateichii mpougo mazhiilakle katu ai kada- jangpii kabi rasam kikii ryiibampo? 13Nlenii Inii gonyii dakii tam leile, Ilaijah teinii gongtakle, sateichii ah- nyiinii mpougo tiikanyii tei tiitakle, mpoumah kaang kito ryiikabam kumpii.”

Sara kashyii kaswi kalei nah sapfiimei hangniniigo tii-mbikapyii

(Met 17.14-21; Luk 9.37-43a)

14Sateichii ahnyiinii mpoubou- meida gong wosek-kii, meimoinii ahnyiigo bangbungsii kalei sateichii ajaitingshang kati ojameinii ah- nyiigo chyii n-gisii kalei tei ahnyiinii ngoutakle. 15Sateichii binasek-kii meimoinii Jisugo ngou wosek-kii hangkapii sung gatakle, sateichii ahnyiinii mpouda pakpi mpougo salam tiile. 16Teito mpounii ahnyiigo n-nhiile, “Gonyii ahnyiigo kadapei sam kakai leipo?”

17Teito meimoi kak kito mei hangninanii mpougo khekalatle, “Madhiikapyiipii, sara kashyii kaswi kalei lat pat kasu gunah sapfii mpougo Inii goda pang gongleile. 18Sateichii mpougo sara kashyii tei- nii kajumta mpougo sazyiikii chyiido chyii koule, sateichii mpoumwi kito mahom patle, sateichii aghii kagetsii pum ai teikok-kok nkungruru tule; Inii go boumeigo ai sara kashyii ai baatoi seilosii tamle, nlenii ahnyiinii baatoipei wolak kiile.”

19Teito Jisunii ahnyii dakii khekalatle, “Oh, kamalum kagamei ha, Inii gonyiigo kadatakii kaswisii bam tangpo? Inii gonyiigo kaswisii kadatakii pungha tangpo? Mpougo guda pang patlo.” 20Teito ahnyiinii nah sapfii mpou gotei mpouda pang gongle.

Sateichii sara kashyii teinii mpougo ngou wosek-kii, binasek-kii nah sapfii mpou gotei tiimachii tii- manhii pyii takle, sateichii mpounii sazyii koumang ndangtak-taksii mwi kito poktai mahom tourum-rumsii bam takle. 21Teito Jisunii mpou- pfiida n-nhiile, “Mpou gamto aitiisii pat kalei ai kadatakii takpo?” teito mpounii tamle.

“Tiina kaleidouto takle.” 22“Sa- teichii ainii mpougo tiimaga tang karam jangpii, dwi mi kikii toikai- sang toikaile; nlenii nangnii tiikabui leidinchiinii nyiigo lungsyiisii tiihalo.”

23Teito Jisunii mpougo tamle, “Tiibuichiinii, katutei! Kamalum kalei ah jangpiinii mahlyii hangtei tiiwobuile.”

24Binasek-kii nah sapfii mpou mah pfii teinii saasii tamle, “I-ma- lumle; gumah kamalum tang kasu ai tiihalo!”

25Sateichii meimoinii ahnyiida pakpi kalei tei Jisunii ngou wosek- kii, mpounii sara kashyii gotei n-gisii tamle, “Nang, khoi kapang lat kaga rangii, Inii n-go kakhat leile, aipou dato pat tolo sateichii mpouda nlaisang nlailiit loi sulo.”

26Teito rangii teinii saasii nah napou gotei tiimachii tiimanhii pyiisii pat-to takle. Nah napou tei kataimei takum takle, sateichii meimoinii tamle, “Mpounii taitakle.” 27Nlenii Jisunii nah napou gotei bahto jum makhii masat takle, sateichii mpounii tusat-to takle. 28Sateichii Jisunii ki kalung liit sek-kii mpou- boumeinii mpougo makumpii n-nhiile, “Dajangpii nyiinii rangii kashyii gotei baatoipei wolek kiipo?”

29Teito mpounii ahnyii dakii tamle, “Ai kakum ai kariitapii supii- nii kaki hangninii paniido baatoipei lakle.”

Jisunii taitang karam sam tamloi katu

(Met 17.22-23; Luk 9.43b-45)

30Jisu ninado mpouboumeinii teibam tei toi aisii doidoi tat tutakle, Galili tei tat majusii Jisunii mpou kaleini tei meigo kado timatunyii makle. 31Dapochiinii mpounii mpou- boumei dakii ralipyiisii bamle; “Meinah sapfii gotei mei bah kikii pyiitoi tangle sateichii ahnyiinii gi- tangle, nlenii jangtumnii tai mpounii ringkhii tangle.”

32Nlenii ralikapyii samtei kada- peipo katu tei ahnyiinii tisutakle, sateichii ahnyii tei mpougo n-nhii- hing takle.

Tanii kadi disangpiipo

(Met 18.1-5; Luk 9.46-48)

33Sateichii ahnyii tei Kaiparnam ki gongle, sateichii kilung liit sek-kii, Jisunii mpouboumeida n-nhiile, “Gonyii dajangpii pwidi lamto kakai leipo?”

34Nlenii ahnyii tei malhiisu takle; dapochiinii ahnyii kak kito ahnyii roinapii pwidilamto “Tanii kadi disangpiipo” katu kaang kito kakaisii leile. 35Jisunii hum bam wotakle, sateichii mpouboumei keariisiinakhii gotei lat magongsii tamle, “Mei kata kangkanii karei reisang tei tiinyii lepochiinii mpounii meihang kakto kana nasang sateichii meihang mah nga-nga matulo.” 36Sateichii mpou- nii nah kacheng hangninii ketsii ahnyii doikii masat takle, mpounii mpou bah teipii nah gotei gaisii ahnyii dakii tamle, 37“Mei kata kangkanii ai kakum nahmei kacheng kak kito hangniniigo gu zei kito lukaipyii leponii, n-gu lukai leile, sateichii mei kata kangkanii n-gu lukai leponii, n-gu lukai makle, nlenii n-gu lang kamagong mpou gole.”

Nyiigo mazhiikasu tiikasu meihang tei nyii jangpiile

(Luk 9.49-50)

38Jon-nii mpouda tamle, “Madhii- kapyiipii, mei hangninanii gozei kito sara kashyiigo baatoi kalei nyiinii ngoule, teito nyiinii mpougo namle, kadapokii mpounii nyii-tai kaswimei makle.”

39Teito Jisunii ahnyii dakii tamle, “Mpougo nam sulo; dapochiinii gu zei kito kamadat tha tiisanii n-gu kalangsii tam mashyiiwo kabuimei mei kado gale. 40Kadapokii kata kangkanii nyiigo mazhii kasu tiika- sumei teinii nyii jangpiiniile. 41Inii gonyii dakii kasangpii tam leile, mei kata kangkanii gonyii ai Krista meile katu jangpii dwi peek kado gonyiigo pyiisak lepochiinii ah mah lang teinii madou kado gasang galakle.

Kem kama kikii chyii kakai

(Met 18.6-9; Luk 17.1-2)

42“N-gu malumsii kalei nahmei kacheng ai kak kito hangniniigo kado mei kata kangkanii ah mah kamalum tei tiimaga aisii kem kama kikii chyiikai aileponii; ah jangpiinii kakaryii kuitu kadi hangninii kagung kikii kuikaisii dwijai kikii toikai kalei teiniipou bibwile. 43Sateichii go bah hangninanii n-go kem tiimatusii leileponii ryiitoi ailo, go-bah hangna pungsii kalui kaga mibam ki liit katu sungnii; go-bah hangninii pungsii karing bamki liit kalu teinii gojangpii bibwile. 44(Mibam kitei ahnyiigo kari kounah matai tei taisang tai leimakle, satei- chii ahnyiigo karu mitei miitsang miitlei makle.) 45Sateichii gopi hangninii teinii n-go kem tiimatusii lei lepochiinii ryiitoi ailo, kadapokii pi hangna pungsii mibam kikii toikai kalei sungnii pi-lipii karing bamki liit kalu teinii gojangpii bibwile. 46(Mibam kitei ahnyiigo kari kounah matai tei taisang tai leimakle, satei- chii ahnyiigo karu mitei miitsang miitlei makle.) 47Sateichii gomik hangninanii n-go kem tiimatusii lei lepochiinii, go-mik tei lat toi ailo; gomik hangna pungsii mibam kikii toikai kalei sungnii mik-lipii Saraa mah sating sazyii bamki liit kalu teinii gojangpii bibwile. 48Mibam kitei ahnyiigo kari kounah matai tei taisang tai leimakle, sateichii ahnyiigo karu mi tei miitsang miitlei makle.

49“Kakarat pot tei athaipiinii tiikamatei takumpii meihang go mipiinii tiimatei tangle.

50“Athai ai kabile; nlenii thai teinii ahmah kakum tei maga aitakleponii kada takumpii nangnii thai tei tiimakumloi wotangpo? Thai takumpii kakum tei gonyii dato leilo, sateichii hangninanii hangniniigo majungsii lunglo.”

Currently Selected:

MARK 9: NAG2

Highlight

Copy