MARK 4
4
Lwi karali mah ndasam
(Met 13.1-9; Luk 8.4-8)
1Jisunii Galili dwijai kuto nlai- loisii ralipyii loile, mei gong ndwi katu tei moi katu jangpii mpounii malyii gam tong wosii dwijai phyii- ryiito bam takle, sateichii meimoi teinii dwijai lamkii ju karyiisii sazyiito bamle. 2Sateichii mpounii nda tiisii sam hangka ahnyiigo tam ralipyiile; ninado mpounii rali kapyii sam kiteito tamle:
3“Koikinglo! lwi karalimei hang- ninanii lwi rali tang karam jangpii tatpat takle. 4Sateichii aitiisii pat takle, mpounii lwi rali kalei kito kangkanii pwidiki takliit takle, sateichii sating gam ruinahnii jung gongsii madou kai wotakle. 5Lwirou kangkanii sazyii rangrhii moi kasu tu-tiirou phyiiryii takliit takle, sateichii sazyii rangrii moi kasu jangpiinii binasek-kii pokpat takle, 6nlenii leimik tei sagoitu sek-kii lwi tei raguitu takle ninado taang gatakle; amaa kaga jangpiinii; 7sateichii lwirou kangkanii atu tiirat kak takliit takle, sateichii atu tiirat teinii pokpat sek-kii, giitnei wotakle sateichii ati mati sutakle. 8Nlenii lwirou kangkanii sazyii kabiki takliit takle, sateichii pokpat takle, moibui- buitu takle sateichii atido matitu takle, kangkanii ati tamrhii matile, kangkanii ati reksiirok matile, sateichii kangkanii ati haido matile.”
9Jisunii tamle, “Shiitang karam jangpii khoi pungkalei meihang teinii shii matulo.”
Jisunii nda tiisii katam kaang
(Met 13.10-17; Luk 8.9-10)
10Jisunii mpou roinapii kalei tinglangki mpougo bam maguisii kalei mei teinii Jisu boumei keariisiinakhiigo kaswisii nda tiisii katam samtei dapei goposii Jisu dato n-nhiile. 11Mpounii ahnyii dakii tamle, “Gonyii dakii Saraa mah kamakum tei pyiibam takle, nlenii sabato kalei kakimei goteinii mahlyii hangtei nda tiibamle. 12Teipiinii ahnyiinii jutangle, nlenii ngoulakle, sateichii ahnyiinii shiitangle, nlenii tilakle; kadapokii ahnyiinii tiwo- ngouwo leponii ahnyiinii Saraada nlaigong mpounii ahnyiigo kaleipyii aitangle.”
Jisunii lwi karali ndasam kaang kito ralikapyii
(Met 13.18-23; Luk 8.11-15)
13Sateichii mpounii ahnyii dakii tamle, “Gonyiinii ai ndasam ai timakpo? Teitiileponii gonyiinii ndasam hangtei kada takumpiinii tiwo tangpo? 14Lwi karalipii teinii abangpii samtei rali leile, 15pwidi kukikii ralikai kabam bam kito kalei ahnyii teinii aile: ahnyiinii shii wosek-kii seitan teinii gongsii, ahnyii dakii ralikai kabam sam tei poi toile. 16Tei takumpiinii, shii wosek-kii ntasii lukai kalu mei tei tu tiirou kak-kii ralikai kabam takumle. 17sateichii ahnyii tei amaa gale, teipiinii sat mathang makle, kabi rasam jangpii ajai kaju mak-kii, tiikamage katu tinglang tei gong sek-kii ahnyiinii kousekle. 18Satei- chii atu-tiirat kak tak kaliitmei teinii ahnyiinii kabi rasam tei shii wotaklepokii, 19sazyii pouryiigo kamarei, kani kahiigo kamarei mei ninado kaki kaki kamaning kamarei tei liitsii kabi sam gotei tiimaga kaleimei teinii, atu tiirat teinii pokpat giitrangsii ati mati kasu takumle. 20Sateichii sazyii kabi kikii ralikai kabam ahnyii teinii sam tei shii wosii lungkikii lukai wole sateichii ati tei kangkanii tamrhii, reksiirok, ninado hai katang matile.”
Thaomi mah ndasam
(Luk 8.16-18)
21Sateichii mpounii ahnyii dakii tamle, “Thaomi tei maseisii razyii kangkii mak-kii azyii kangkii kai leipo? Thaomi tei mpoumah kadung bamnikii kai leimakpo? 22Kadapokii mangou supii poi kabai wotang karam samah kado gale, sateichii makum wotang karam samah kado gale; nlenii poi kamakum hangtei kava kikii poi mpat tangle. 23Shiitang karam jangpii khoi pung kalei mei hangnii shiilo.”
24Sateichii mpounii ahnyii dakii tamle, “Gonyiinii shiikalu tei tiigat- piinii lukai wolo, nangnii meigo ma- dhii kapyii teipii n-godo madhiipyii tangle, kisiido pyiitangle. 25Kadapokii kalei mei dateikii kisii pyiitangle, nlenii kagamei dateitonii ah dato kalei hang teido poitoi aitangle.”
Pokpat kalei lwirou mah ndasam
26Mpounii tamle, “Saraa mah sating sazyii teinii mei hangninanii sazyiikii lwi marou kalei takumle. 27Sateichii tinghum zyiitu takle ninado tingchoi gungtule, sateichii lwirou teinii kada takumpiinii pokpat takpo katu tikasu takumle. 28Kadapokii sazyii teinii karei reisang kito arhiibang sateichii arhiibwi, ninado arhiibwi kikii ati mati matule. 29Sateichii arhiibwi tei mwi sek-kii ahnii kadao poisii arhii tei gat tule, kadapokii karachet tinglang tei gongtakle.”
N-jang gaiti lwirou mah ndasam
(Met 13.31-32, 34; Luk 13.18-19)
30Sateichii mpounii tamle, “Nyii- nii Saraa mah sating sazyii tei kada takumle tangpo? Mak-kii nyiinii kadapei nda poisii tam tangpo? 31Teithiinii sazyiikii rali kalei sazyii pouryii hang kakto cheng kaki n-jang gaiti lwirou takumle. 32Nlenii n-jang gaiti lwirou tei ralikai wosii pokpat sek-kii sagei hiinhii hang kakto ditupiile, sateichii kaa nrangpat tule, sating gam ruinahniido ahmah khii kangto matiit chyii wole.”
33Sateichii ahnyiinii shii wokabui tiisii Jisunii aikakum ndasam hangka tiisii ahnyii dakii samtei tam ralipyiile. 34Nlenii mpounii tam ndasupii ahnyiigo sam tam leimakle, sateichii ahnyii roinapii kalei tinglang kak mpounii mpou-boumei dakii kalai kaga tam ralipyiile.
Tingkai tingrotdo Jisunii katam swile
(Met 8.23-27; Luk 8.22-25)
35Teipiinei leimik tei tingkhii liitsek-kii, mpounii mpouboumei da- kii tamle, “N-je nyiinii dwijai lugang kaapat tule.” 36Toinii ahnyiinii meimoi gotei kaibamsanii tatpat takle. Jisunii bam kalei malyii gam- tei Jisutai kaswimei teinii tongwo takle, sateichii malyii kacheng kakido mpougo kaswisii leile. 37Binasek-kii tingkai katei gongsii dwi ka-nlem teipii malyiilung rot-tu takle, teipiinii malyii tei dwipii tokryii pilei takle. 38Nlen ii Jisunii malyii tailampang teito zyiikum gamkii aphyii makum bamsii zyiisii bamle, mpou boumei teinii mpougo makeng matusii tamle, “Madhiika- pyiipii, Nyiigo magale kajyii ai bangpiinii tisei lakde?”
39Teito mpounii gungtu satsii tingkai ninado dwijaigo tamle, “Majung tulo, nkam tulo!” Sateichii tingkai katei tei tou aisii majung makung takle. 40Nlenii mpounii ahnyii dakii tamle, “Kadajangpiinii gonyii hing leipo? Toi katangpii kamalum tei gonyiinii gapo?”
41Teito ahnyiinii hingbeidiju aisii, hangninanii hangninii dakii tamle, “Mei aipou ai tapo? tingkai tingrot katangpiinado mpousam swile.”
Currently Selected:
MARK 4: NAG2
Highlight
Share
Copy
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
