MARK 3

Bah lamkii kataimei hangniniigo tii mbi-kapyii

(Met 12.9-14; Luk 6.6-11)

1Teito mpounii Jehudimei mah ndwibamni nlailiit loile, teiki tei bah lamkii katai mei hangninii leile 2Sateichii mpougo kashyii lwikai pyiitang karam jangpiinii ahnyiinii mpougo shoisii jule, mpounii ntak piinei leimik mpougo tii-tii mbipyii lakposii. 3Jisunii bah lamkii tai kaleipii gotei tamle, “Aiki doi patlo,” 4sateichii mpounii ahnyii dakii tamle, “Ntak piinei leimik kabi katii mak-kii kashyii katii, mei rangii go keikapyii mak-kii kagi ai ajaipo?”

Nlenii ahnyiinii mah kado khesu takle. 5Sateichii mpounii ahnyiigo ra-karhii tei njasii ju magui sanii, ahnyii lung katei jangpii swi kamagesii mpou dakii tamle, “Gobah ntaapatlo,” teito mpounii bah ntaa pat takle, ninado mpou-bah tei bitakle, tchii kasulam takum takle. 6Teipiinii Farasismei teinii Jehu- dimei mah ndwibamni teito tatpat takle ninado Herotgo manoisek-kii kadousii ahnyiinii Jisugo kada takumpii gitangposii karashiitu takle.

Meihangka dwijai kuto

7Nlenii Jisunii mpou boumeigo pangsii Galili dwijai kutei tat liit takle, sateichii meimoinii mpou-tai swi wotakle, ahnyiinii Galili kito ninado Judiya kitole, 8Jerosalem kito, Idimiya sazyii kito, Jordan sazyii leimik kapatlam tuito ninado Tair nei Sidon namdi longkoi hangkito gongle. Ai meihang ainii Jisuda gongle, kadapokii Jisunii katii hangtei ahnyiinii shiitakle. 9Sateichii mei tei moibeidisii Jisunii mpou boumei dakii malyii kacheng hangninii mpou jangpii tiikadalosii tamle, meimoinii mpougo katoklak tang karam jangpii. 10Kadapokii mpounii mei hangkago tii mbipyii takle, sateichii ranisii kalei meihang teinii mpougo deng tang karam jangpii kabaa leile. 11Sateichii matei kasu rangii kaswi kaleimei hangnii mpougo ngou wosek-kii, mpou doito kouhumsii saale, “Nang Saraa nah sapfii mpou teile.”

12Nlenii Jisunii ahnyii dakii teisii kakhatle, “I-tapo katu meida kado tam mati sulo.”

Jisunii mpou-tai kaswimeigo kalai kalu

(Met 10.1-4; Luk 6.12-16)

13Sateichii Jisunii zang gam khiisii mpounii kamarei mei gotei lat magongle, sateichii ahnyiinii abang- piida gongle. 14Sateichii mpounii keariisiinakhiigo kalai wole, Abang- piinii ahnyii dakii tamle, “N-gu kaswitang karam jangpii gonyiigo kalai wotakle.” “Inii gonyiigo kabi rasam tam tat matutang karam jangpii lang mpat tangle. 15Sateichii ara kanimeigo tii ka-mbi ninado sara kashyiigo baatoi katu mah teimaham tei gonyiinii doutangle.”

16Keariisiinakhii kalai kalumei tei: Simon, (Jisunii mpougo Pitar sii latle,) 17Zebedi nah sapfii mpou Jems ninado Jon Bonargis, (Sating katwimeinah sii latle) 18Andru, Filip, Bartholomio, Metiu, Thomas, Alfaiyas nah sapfii mpou Jems, Tadios, Kainan mpfii Simon, 19ninado mpougo ngou karoumei bah kikii schoi-choikai kapyiipii Judas Iskariotle.

Jisu ninado Beelzabul

(Met 12.22-32; Luk 11.14-23; 12.10)

20Sateichii Jisunii ki gongtakle ninado meimoi tei ndwiloi kalu kito Jisu ninado mpou-boumei tei tiigatpii kachii kasak tinglang dousutakle. 21Nlenii mpouki kalungmeinii sam- tei shii wosek-kii, ahnyiinii mpougo jumtang karam jangpii tatpat takle, “Dapochiinii mpou ai swibisu taklesii ahnyiinii poi takle.” 22Jerosalem kito kagongmei ajaitingshang kati ojamei teinii tamle, “Ahnii Beelzabul sarago doutakle, ninado sara kashyii mah aphyii kasatpii mah teimahampii mpounii sara kashyii go baatoile.”

23Teipiinii ahnyiigo mpouda lat magongsii nda tiisii ahnyii dakii tamle, kada takumpii seitan-nii sei- tan go baatoipei wotangpo? 24Sagong sazyii hangninii ai mpou roinapii njairiit-riit aileponii, tei sazyii tei lungpei lakle. 25Mpung hangninii ai njairiit-riit aileponii, tei mpung tei lungpei lakle, 26teipiinii seitan mah sazyii ai njairiit-riit aileponii, lungpei lakle, nlenii gatu tangle.

27Mei kaniido mei katei kamaham mei ki lung liitsii mpouki mah pot tei soupoitu wolakle mpounii mei kateipii gotei reipii reng peirei kasunii, pei aitaklepokii mpounii ki tei ram wobuile.

28“Inii kasangpii gonyii dakii tam leile, Meinah mah kem hangtei ninado ahnyii mah kama hangteinii kaleipyii wobuile, 29nlenii mei kata kangkanii rangii kamatei go tam kamashyii teinii magasang magapyii lakle; dapokii ahnyiinii kalui tiikasu kem tei tiibam takle.” 30Jisunii ai tamle, dapokii ahnyii mei kangkanii tamle, “Ahnii matei kasu rangiigo kaswi leile.”

Jisu pwi ninado mpou sanamei

(Met 12.46-50; Luk 8.19-21)

31Sateichii Jisu pwi ninado mpou sanamei gongle; ahnyii tei ki ka- jangto satsii patlo katupii kilungkii samtei tam maliit takle. 32Meimoipii Jisugo maguisii bamle, ninado ahnyiinii mpoudakii tamle, “Julo, gopwi ninado gosanameinii n-go ki kajangto fiileile.”

33Sateichii Jisunii ahnyii dakii khekalatle, “Gu pwi ninado gusa- namei tei tapo?” 34Mpou ku kabam meigo tei ju maguisii mpounii tamle, “Julo, aiki kalei meihang ai gu pwile ninado gusanameile. 35Dapokii Sa- raanii kamaning kamazhii tiisii kalei meihang tei gusanameile ninado gutaipwi meile ninado gu pwile.”

Currently Selected:

MARK 3: NAG2

Highlight

Copy