METIU 27
27
Jisugo Pailat sagongdoi pang kakhii
(Mrk 15.1; Luk 23.1-2; Jon 18.28-32)
1Tingchoi nukii, tingdimei ninado katingmei hangteinii Jisugo gitang karam jangpii sam rashiile; 2sateichii ahnyiinii mpougo reng peisii, pangpatsii Governor Pailat dakii pyii aitakle.
Judasnii katai
(Tha 1.18-19)
3Schoi-choikakaipii Judasnii Jisugo malesii tam mashyii aitakle, katu tei ngou wosek-kii, mpounii lungkali takle sateichii sanahgyii tamrhii tei tingdimei ninado katingmei dakii poi nlaigongsanii tamle, 4“Inii kama kagamei zai gotei schoi-choikakai kito Inii kem tii aitakle.” Ahnyiinii tamle, “Teinii nyii timakle, teinii nangroinapii jumatou wolo.”
5Sateichii Saraa kamaning ki niteikii sanahgyii hangtei toikai aisii tat tutakle, sateichii mpounii maasii mpouroinapii siikak-tai takle.
6Nlenii tingdimei hangteinii sanahgyii hangtei poisii tamle, ai ai Saraa kamaningki sanah kakai nikii kakai ajai makle, kadapokii ai ai zai mah sanahle. 7Sateichii ahnyiinii sam rashii wosii siisangmeigo poigoi tang karam jangpii li-karakimei mah lubam tei sanah teipii lyii wotakle. 8Teijangpiinii teimah lubam tei zai mah lubam sii tingnei katangpii lat leile.
9Sateichii Isrelmeinah kangkanii mpoumah-mai teimah ret kabam sanahgyii tamrhii tei ahnyiinii poi wotakle. 10Sateichii Abangpiinii n-gu kakhatsii katam takumpii, ahnyiinii li karakimei mah lubam teijangpii teitei pyii aitakle, sii katam Lungka- kalingpii Jerimaiyanii tam kabam tei kasangpii gong matwi takle.
Pailatnii Jisugo sam kachyiinhii katu
(Mrk 15.2-5; Luk 23.3-5; Jon 18.33-38)
11Aitoinii Jisunii Governor doi sat-to takle, sateichii Governor teinii mpougo n-nhiile.
“Nang Jehudimei mah Sagongde?” Jisunii tamle, “Nangnii tam takle.” 12Tingdimei ninado katingmei hangteinii mpougo dzyii nuisii kalet katii tinglang kaktei mpounii samah kado khekalat makle.
13Teito Pailatnii mpou dakii tamle, “Ahnyiinii go phyiiryiikii sakchyii kadaziika pyiisii kalei tei nang shii makpo?”
14Nlenii Jisunii mpougo samkang hangninii kado khela kasu jangpiinii Governor tei hangkapii sung gatakle.
Jisugo kagi
(Mrk 15.21-32; Luk 23.26-43; Jon 19.17-27)
15Kaakamaju mah hang-ngi ki Governor teinii meihangnii kamarei kabang kilungto bang kabam mei hangniniigo ahnyii jangpii laat mpat kapyii tei mpou-jaile. 16Sateichii ahnyii mah kabang kilungkii bang kabam “Jisu Barabas” sii zei kalat mei hangninii tei tinglang kak tei leile. 17Teipiinii ahnyiinii gong ndwi kalu tinglang kak, Pailatnii ahnyii dakii tamle, “Inii gonyii jangpii tapiigo gonyiinii laat mpatsei matu- nyiipo? Barabas gomanii, Krista sii kalat Jisu gopo?” 18Kadapokii ahnyiinii Barabas go ngou karou jangpiinii pyiitoi takle katu tei mpounii tile.
19Pailatnii samtak katiibamki bam kalei tinglang kak, mpou-nounii mpou dakii sam tam magongsii tamle, “Kasang kamajyiimei gotei nangnii mah kado tiisulo, kadapokii ndazyii tinghum manglam pangto mpou jangpii I-hangkapii kamage katu kadou takle.”
20Tingdimei ninado katingmei hangteinii Barabas go mpatseilosii khang wosii, Jisugo tiimaga maleilo katupii meihang gotei katwisii tam takle. 21Governor teinii ahnyiigo n-nhiiloile, “Ai hangna kak ki aito Inii tapiigo gonyiinii gonyii jangpii laat mpatsei matunyiipo?” Teito ahnyiinii tamle, “Barabas go,”
22“Teitiileponii Krista sii kalat Jisu aigo Inii kadapei tiitangpo?” Sii Pailatnii ahnyii dakii tamle.
23Ahnyiihangnii tamle.
“Mpougo krosh gamkii dhangsii gi ailo;” Sateichii mpounii tamle, “Ka- dajangpii?” Mpounii kadapei kashyii tiitakpo? “Nlenii mpougo krosh gamkii dhangsii gi ailo sii tamsii ahnyiinii kisii kisii saatu takle.”
24Teipiinii Pailatnii mahkado kabi dousutakle, nlenii meimoi teinii khoi nrung moi kapat tei ngou wosek- kii, mpounii dwi poisii meihang doi- teito bah baitek aisii tamle, “Kasang kamajyii mei aipou zai mah kaang kito gumah kama gale, gonyiinii gonyii roinapii rashii matou wolo!”
25Sateichii meihang teinii kheka- latle, “Mpoumah zai tei nyii phyiiryii sateichii nyii nahmei phyiiryii takliit matulo.”
26Teito mpounii Barabasgo ahnyii jangpiinii laat mpatpyii aitakle, sateichii Jisugo dat datsii kapyii taito krosh gamkii dhangsii gimatu tang karam jangpii pyiitoi aitakle.
Jisugo Romki saryiimeinii hoksii kanui
(Mrk 15.16-20; Jon 19.2-3)
27Teito Pailatmah saryiimei teinii Jisugo Governor mah sagongki kalungtei pangliit takle sateichii saryiimei hangtei mpou doito gong ndui wotakle. 28Sateichii ahnyiinii mpou-pei mani tei ratoi pyiisanii, mpou gamkii pei kaghang bakaipyii takle. 29Sateichii ahnyiinii tu-phyii- hung hangninii tiiwosii mpou phyiigamkii choikai pyiisanii, mpou bah ajiilam pangkii koktui hangninii kaipyii takle. Sateichii ahnyiinii mpou doito kok-kumsanii mpougo hoksii nuisii tamle, “Mata leile, he Jehudimei mah Sagong!” 30Sateichii ahnyiinii mpou gamkii poktai maswikai pyiisanii, koktui tei poisii mpou-phyii kikii lak takle. 31Satei- chii ahnyiinii mpougo hoksii nuisii, mpougamto pei kaghang tei loktoi pyiisanii mpou mah peimani tei kai- pyiisii Krosh gamkii dhangsii gitang karam jangpii mpougo pangpat takle.
Jisugo krosh gamkii dhangsii kagi
(Mrk 15.21-32; Luk 23.26-43; Jon 19.17-27)
32Sateichii ahnyiinii aitiisii tat kapat tinglang kak, Saimon sii kalat Sairen mpfii hangniniigo kadou takle, ahnyiinii mpougo pumtei tiisii Jisumah krosh tei pung malu wo- takle. 33Sateichii ahnyiinii Golgotha sii kalat bam, katunii Phyiibungrou bam kitei gong sek-kii, 34ahnyiinii mpougo kaheng mouka dwi gonei ryii nja katu jou tei saklosii pyiitakle, sateichii mpounii teitei masei kaju kak, mpounii teitei sakmhii takle.
35Sateichii mpougo krosh gamkii dhangsanii kagi kak, ahnyiinii ahnyii kak kito doikabi tei jukama- gasanii mpoumah pei mani tei njai wotakle. 36Sateichii ahnyiinii teikito bamsii mpougo koisii bamle. 37Sateichii mpoumah phyiibung phyiiryiikii mpougo tam kamashyii sam ryiikabam kamati tei ahnyiinii kaipyii takle: “Ai ai Jehudimei mah sagong Jisu teile.” 38Teito Jisugo kaswisii ahnyiinii karagamei hang- nago, hangniniigo abilamkii sateichii hangniniigo ajiilamkii krosh gamkii dhangsii gile.
39Sateichii teiki ku tat kapat tat kaliitmei hangteinii phyii kangumsii, dzyii nuisii tamle, 40“Saraa kama- ning ki tiimagasii leimik hangtum lung kikii tiimakhii kabuipii nang, goroinapii n-go kei wolo, nang Saraa nah sapfii mpou lepochiinii, krosh gam teito hum wolo.”
41Teitakumpii tingdimei hangteinii ajaitingshang kati ojamei ninado katingmei hang go kaswisii, mpougo hoksii nuisii tamle, 42“Kakimei gonii mpounii keipyiile, mpouroinapii mpougonii keipyiipei womakle, mpounii Isrel mei mah sagongle, aitoi mpounii krosh gamto hum matulo, teito nyiinii mpougo malum tangle. 43Mpounii Saraa go malumle, sateichii Saraa nah sapfii mpou lesii tamle, bitakle, teitii leponii Saraanii mpougo aitoi keikapyii nyiinii jude.”
44Sateichii mpougo kaswisii krosh gamkii dhangsii kagimei teiniido mpougo teitakumpii dzyiinui takle.
Jisunii katai
(Mrk 15.33-41; Luk 23.44-49; Jon 19.28-30)
45Sateichii pung siiruk sekto pung sokchyii katang tei sazyii pouryii hang kamyii teipii gomnei wotakle. 46Sateichii pung sokchyii tinglang doukii Jisunii rok sagoisii saale, “Eli, Eli lama sabachtani?” katunii “Gu Saraa, gu Saraa nang dajangpiinii n-gu toi aitakpo?”
47Sateichii dato sat kalei mei kangkanii teitei shii wosii tamle, “mei aipounii Ilaijah go lat leile.” 48Sateichii teisek-kii ahnyii kak kito meihangninanii pak pat Sponze#Sponge: tamget alhii karyii jaja katu. hangninii poisii, teitei kaheng dwi kikii sumwosii, koktui hangninii toikikii teitei kaiwosii mpougo sak matutang karam jangpii pyiitakle.
49Nlenii kakimei teinii tamle, “Koilo Ilaijahnii mpougo keipyii tang karam jangpii gong gonglakpo nyiinii jude.” Sateichii kakimei hangninanii angii hangninii poisii mpou-kalaat huitakle sateichii dwi nei zai longpat takle.
50Sateichii Jisunii nlailoisii rok sagoisii saasanii, mpou chyiingai gatakle.
51Teito Saraa kamaningki lungkii lam kabam peira tei aphyiito akang katang tei hangna tiisii hetriit ai- takle; sazyiido nlaile, sateichii kuitu kadido pak takle; 52roubam hang teido laat takle sateichii zyiitu kalei kamateimei mah pumrong hang gotei ringkhii malu wotakle, 53sateichii mpoumah ringkakhii-taito ahnyiinii roubam hang kiteito pat tosii kamatei namdiki tei ahnyiinii liitle, mei hangkanii ahnyiigo ngoule.
54Sateichii saryiimei mei hai phyiiryii kasatpii nei mpougo kaswisii Jisugo koikalei mei teinii malyii kachyii ninado pat kalei hangtei ngou wosek-kii, hangkapii hingsii tamle, “Kasangpii mpou ai Saraa nah sapfii mpoule!”
55Sateichii teiki tei sapwimei hangkado kak dhiihaisii jusii leile, ahnyii teinii mpougo nga ngahasii kalei Galili kito Jisutai swi kagong meile. 56Ahnyii kak kitei Meri mekdolen sateichii Jems ninado Joseph pwi Meri sateichii Zebedi-nou haile.
Jisugo kagoi
(Mrk 15.42-47; Luk 23.50-56; Jon 19.38-42)
57Tingkhii lam liit sek-kii Ari- matiya kito mah kanimei hangninii gongle, sateichii mpoudo Jisu mah boumei hangniniile. 58Mpounii Pailatda liitsii Jisumah pumrong tei khangtakle, teito Pailatnii teitei mpougo pyii ailo katupii mwija pyii- takle. 59Sateichii Josephnii pumrong tei poisii, kamatei kamajyii kounah mai peipii kajyiisii, 60mpounii kuitu kadi kikii biit tosii tiikabam mpoumah roubam kasatai kikii teitei kai aitakle, sateichii teimah roubam mah takam kiteikii kuitu kadi hangninii kok kaisii tat tutakle. 61Sateichii Meri Mekdolen ninado kaki Meri teinii roubam gotei ju kadousii tei kito bamle.
Roubam kakoimei
62Adoi piinei katunii tiikakada piinei leimik taitei tingdimei ninado Farasismei hang teinii Pailat doito gong ndwi wosanii tamle, 63“Oja, kachuipii teinii ringkalei tinglang kak leimik hangtum taito Inii ringkhiiloi tangle sii tam kabam tei nyiinii mangai makle. 64Teipiinii leimik hangtum katang roubam ai tiigatpii koi matutang karam jangpii mwija pyiiseilo; suleponii mpoumah boumeinii gongsii mpougo ragasii, mpou ai katai kito ringkhii taklesii, meidakii tamtudo malahle, sateichii chui karei sung chui kana teinii kisii shyiibuitu tangle.”
65Pailatnii ahnyii dakii tamle, “Gonyiinii kakoimei poi wolo, tat tulo, gonyiinii tiikabuita teitei tiigatpii koi mbi wolo.”
66Teito ahnyiinii tat tutakle sateichii maasanii roubam tei nlai kasu tiisii Seal kai aitakle sateichii kakoimei kaisii tiigatpii koi malu wotakle.
Currently Selected:
METIU 27: NAG2
Highlight
Share
Copy
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
