METIU 28

Jisunii ringkakhii

(Mrk 16.1-10; Luk 24.1-12; Jon 20.1-10)

1Bam ntak piinei leimik-tai, hapta kito leimik karei piinei tingchoi varangkii Meri Mekdolen ninado kaki Meri teinii roubam tei jutang karam jangpii maale. 2Sateichii julo, hangkapiinii malyii chyii takle, kadapokii Bangpii mah sating gamlui hangninii teinii sating gamto humsii kuitu tei koktoi aitakle sateichii tei phyiiryiito bam wotakle. 3Ahmah jailui teinii sating kapeek kalei takumle sateichii ahmah peimani tei sabui takumpii hale. 4Sateichii kakoimei teinii ahgo hangkapiinii hingsii nchyiikok koksii kataimei takum takle.

5Nlenii sating gamlui teinii sapwi mpei kana dateikii tamle, “Gonei hing sulo; kadapokii krosh gamkii dhangsii gi kalei Jisu gotei goneinii fiileile katu Inii tile. 6Mpounii aiki gatakle kadapokii mpounii tam kabam takumpiinii, mpounii ringkhii takle; patlo, mpougo kakaini tei julo.” 7Sateichii kalangsii maasii mpou- mah boumei dakii tampyiilo, mpounii katai kito ringkhii takle; sateichii julo, mpounii gonyiidoi reisii Galiliki tat lei takle; gonyiinii mpougo teikito ngoutangle, julo, Inii goneigo tampyii takle.

8Teipiinii ah neinii kahing ninado hangkapii ka-nta tei njasii roubam tei kalangsii toi aisii, mpoumah boumei dakii kalangsii tam tang karam jangpii pak tutakle.

9Sateichii julo, Jisunii mpou- peinago kadousii tamle, “Kamajung tei goneigo kaswi matulo.” Sateichii mpoupeinanii mpouda tat manang pisii, mpou-pi tei jumsii mpougo mata takle. 10Teito Jisunii mpoupeina dakii tamle, “Hingsulo, tat tulo, gukang sanameigo Galiliki tat tulosii tampyiilo, teito ahnyiinii n-gu ngoutangle.”

Kakoimeinii katam

11Sapwi mpei kananii tat lei- bangpii, julo, kakoimei kak kito mei kangkanii namdi kitei liitsii, pat kalei hangtei Tingdimei hang dakii tampyii takle. 12Sateichii ahnyiinii katingmeigo kaswisii gong ndwisanii sam rashii wosii, saryiimei dateikii sanah hangka pyiisanii tamle, 13“Mpoumah boumeinii tinghumkii gongsii, nyiinii zyiikatu taikii mpougo raga wotakle katupii gonyiinii tamlo. 14Sateichii ai ai Governornii shiigong woleponii, nyiinii mpougo hemsii, gonyiigo mah kado tiimatu lakle.” 15Teipiinii ahnyiinii sanah tei poisii, ahnyiigo ralikapyii takum- piinii tiitakle, sateichii rasam ai Jehudimei kak kito tingneishang katangpii tam kahi leile.

Jisunii mpou boumeida kagong

(Mrk 16.14-18; Luk 24.36-49; Jon 20.19-23; Tha 1.6-8)

16Boumei keariisiikankhii tei, Jisunii ahnyiigo tam kapyii Galili kito kalei zang gam kitei tat tutakle. 17Sateichii ahnyiinii mpougo ngou wosek-kii, ahnyiinii mpougo mata takle, nlenii mei kangkanii maning riirhii takle. 18Jisunii ahnyiida manang gongsii tamle, “Sating ninado sazyii pouryii lungto kalei teimaham hangtei gudakii pyiibam takle. 19Teijangpii gonyiinii maasii, lui hang go gutai kaswimei tiipyiilo, Apfii, anah ninado rangii kamatei zei kito dwi mpum pyiilo; 20Inii gonyii dakii pyii kabam kakhatsam hangtei switang karam jangpii ahnyiigo ralipyiilo, sateichii julo, sazyii pouryii nlai katang tei Inii gonyiigo taksupii kaswi leile.”

Currently Selected:

METIU 28: NAG2

Highlight

Copy