LUK 7
7
Saryiimei hai mah aphyii kasatpii ki kaleipiigo tii mbi kapyii
(Met 8.5-13)
1Jisunii sam ai meidakii tamsang sek-kii, mpounii Kaiparnam ki liitle. 2Sateichii saryiimei mei hai mah Aphyiikasatpiinii hangkapii lungkasyii mpouki kaleimei hang- ninii bamle, mpou tei arani mahung- sii taina nasii bamle. 3Teito mpounii Jisu kagong tei shii sek-kii, mpounii gongsii mpou ki kaleipii gotei tii mbisei matu tang karam jangpii, Jihudimei ki katingmeigo mpou dakii langkaile. 4Sateichii ahnyiinii Jisu- da gong sek-kii, ahnyiinii tiigatpii khangle, “Mei aipounii gomah tii- kaha kasangpii doukajyiile. 5Kada- pochiinii mpounii nyii luigo lung- syiile, sateichii mpounii nyii Ndwiki tiipyiile.”
6Teito Jisunii ahnyiigo kaswisii tat tutakle, Nlenii mpounii ki teito dhiisutakle sek-kii, Saryiimei mei hai mah Aphyii kasatpii teinii mpou kangmeigo lang magongsii mpou dakii aitiisii tam matu takle, “Bang- pii kamage seisulo; dapochiinii Inii n-go guki kalungkii lukai kajyii makle; 7Teijangpiinii gupum katang piiniido godoi gongjyii makle, nlenii nangnii kakhatpyiilo; sateichii guki kaleipiigo bimatulo. 8Kadapochiinii I-katangpiinii apum katii hangni- niile, gukangto saryiimei leile; sateichii Inii ahnyiigo mwija pyiisii, ‘tat tulo’, sii tamsek-kii, mpounii ‘tat tule;’ kakimei hangninii dakii, ‘aiki patlo,’ sek-kii mpounii patle; satei- chii guki kaleimeigo ‘ai tiilo,’ sek-kii mpounii teitei tiile.”
9Jisunii sam ai shii sii sung ga- takle, sateichii mpounii nryii gongsii mpoutai swi kaleimei moi dakii tamle, “Inii gonyii dakii kasangpii tam leile, Isrelmei kak kitodo ai kakum kamalum ai Inii ngoumakle.” 10Teito langtoi kalei mei teinii ki nlaigong sek-kii, kikaleipii tei raga kalu ahnyiinii doutakle.
Jisunii kamipwimei nah hangniniigo tii mbi kapyii
11Sateichii mpounii mpou boumei sateichii mpoutai swi kalei meimoi gotei kaswisii Nain Namdi mah bung kitei gongle. 12Teito mpounii teiki Namdi mah Takam kutei gong sek- kii, julo, mei kataimei hangniniigo tiigoi tang karam jangpii pangpat takle; tai kaleipii tei kamipwimei nah sapfii mpoule; sateichii teiki namdiki meimoi teinii mpoutai swi leile. 13Sateichii bangpiinii mpou- peigo ngou wosii mpou lungtei mpou- peigo lungkasyii piinii tokryiisii mpoupei dakii tamle, “Hatsulo”. 14Teito mpounii tatkhii routing gotei dengle, sateichii routing kasi kalei- mei teinii ntak takle. Teito Jisunii tamle, “He nah napou! Inii n-go tam leile, gungtulo.” 15Teito kataipii teinii gungtusii bamdo bamtakle, samdo rashiitu takle; teito mpounii mpou pwi dakii pyiitakle.
16Teito ahnyii hang teinii kahingpii tokryiisii Saraa go toile; “Lungkakalingmei hangninii nyiikak ki gongpyii takle; sateichii Saraanii mpoumeigo kaleipyii tang karam jangpii gongpyii takle,” sii ahnyiinii tamle. 17Sateichii mpou mah nha tei Judiya sazyii hangki ninado teiki sazyii kanamda namdi hangki tam kahitu takle.
Jon dwi mpum kapyiipii dato kagong sampao kapungmei
(Met 11.12-19)
18Jon tai kaswimei teinii sam aihang ai mpou dakii tam sek-kii, mpounii mpoutai kaswimei hangna- go lat takle; 19sateichii sam n-nhii tang karam jangpii Bangpii dakii mpounii lang matu takle: “Gongtang lesii Jon dwi mpum kapyiipanii tam kalei tei nang manii mak-kii, nyiinii kakimeigo koitangpo?”
20Ahnyiinii Jisuda gong sek-kii, ahnyiinii tamle, “Jon dwi mpum kapyiipanii nyiigo sam n-nhiilosii langkai bamle, ‘gongtang lesii mpou- nii tam kalei tei nang manii mak-kii, nyiinii kakimeigo koitangpo?’ ”
21Sateichii ahnyiinii kalei tinglang kaktei Jisunii ra kataam kataam tiisii kaleimei, sara kashyii kaswi kalei meigo tii mbipyiile, satei- chii mik chetsii kaleimei hangkiigo mik ngou matule. 22Mpounii Jon mah sampao kapungmeigo tamle, “Nlai tulo, sateichii gonyiinii ngou kalu hangtei Jon dakii tampyiilo: mik kachet mei teinii ngouwo takle, pi katwi mei teinii tat totakle, mpara tiisii kalei mei teinii biwo takle, khoi pangsii kalei mei teinii shiiwo takle, kataimeigo tiimaringpyii takle, sateichii kabi rasam ai mah kagamei dakii tam ralipyii takle. 23Kada- ziikapiinii sadoi bipo gu kaang kito mah kado maning kariirhii kaga meitei.”
24Jon mah sampao kapungmei tei nlaitu sek-kii, mpounii Jon mah kaang kito meimoi dakii tamtu takle: “Gonyiinii Mahpwizyii ki tat kapat kaktei, gonyiinii kadapeigo julesii maapo? Tingkainii gwi nlai kalei tinghiinhii gopo? 25Sateichii gonyii- nii kadapei ngoutang karam jangpii maapo? Peimani ngoukabi kabamei hangninii gopo? Julo, tei katii ngou- kabi natkai kai kaleimei sateichii kasamou tiilung lung kaleimei teinii, Sagongmeinii kabam nito leile. 26Sateichii gonyiinii kadapei julesii maapo? Lungkakalingmei hangninii gopo? Nle, Inii gonyii dakii tam leile, Mpounii Lungkakalingmei hangninii sungdo kile; 27ai-ai Mpou teile, mpoumah kaang kito ryiibamle, ‘Julo, Inii Gusam kapungmei godoikii lang m-mangle; mpounii godoi reisii gopuidi tiikadapyii tangle.’ 28Inii gonyii dakii tam leile, sapwimeinii lung kalu hang kak kito Jon sung dikakimei kado gale; nlenii Saraa mah sating sazyii kito kacheng chengsangpii teinii mpou sung dibuile.”
29Sateichii sam ai shii kalu meihangnii sateichii ha kahamei hangdo Jon dato dwi mpum wosii, Saraago kasang lesii lukai takle. 30Nlenii kabijai katiimei ninado ajaitingshang kati ojamei teinii Saraa mah kamaning tei ahnyii roipii mazhii sutakle, sateichii Jon dato dwi ka-mpum tei poisu takle.
31“Teijangpiinii meilui meiha aimeigo Inii kadapeigo poi nda tangpo, sateichii ahnyii tei kadapeigo reipo? 32Ahnyii teinii, salikijangto bam kalei nahmei takumle,
sateichii hangninanii hangniniigo kasaasii tamle,
‘Nyiinii gonyii jangpii levii kongkii,
gonyiinii rale tiimakle;
nyiinii mei katai lhii tiikii; gonyiinii hatmakle.’
33Kadapochiinii Jon dwi mpum kapyiipii teinii tiirokdo chii supii joudo sak supii gongle; sateichii ‘gonyiinii mpougo sara kashyii swi leile’ sii tamle. 34Sateichii Meinah Sapfii Mpou teinii chiisii saksii gongle, sateichii gonyiinii tamle, ‘Julo, Apok kadi jou kasak, ha kahamei ninado kem kama katiimei hang go kang katiimei hangninii!’ lesii. 35Katalyii tiikido, Saraa mah swirek kabi gotei lukai kalumei hang teinii kasangle katu tei mangoupyii takle.”
Jisunii Simon ki kagong
36Sateichii Kabijai katiimei hang- ninanii mpougo kaswisii tak chii njoitang karam jangpii Jisugo latle. Sateichii mpounii Kabijai katiipii kitei gongsii chiitang karam jangpii bamtakle. 37Sateichii Julo, teiki Namdi kitei kem kama katii sapwi- mei hangninii leile. Jisunii Kabijai katiipii kiteito chiitang karam jangpii bam takle katu ai tiwosii mpoupeinii, thao kamanuk rangrhii bung hangninii kai manam kabi thaopii tokryiisii poigong; 38Jisu pibang teito satsii, hatsii mpoupei mah mikdwi teipii Jisu pi tiimatum tutakle, sateichii mpoupeinii mpoupi tei matwumsii manam kabi thao teipii manuk kaipyii takle. 39Teito Jisugo lat kamagongpii Kabijai katiipii teinii ngouwo sii mpou lungto mpou roinapiinii tamle, “Sapfii mpou ai lungkakalingmei lepochiinii, mpougo deng kalei ai tapo katu sateichii kada takum katu meipwipo, katunii kem katii peile, katu ai titang karamle.”
40Teito Jisunii mpougo kheka- latle, “Simon Inii n-go mah ching- niikii tamtang karam leile.” Teito mpounii tamle, “Madhiikapyiipii tampyiilo;”
41Jisunii tamtu takle: “Sana jum kaleimei hangninii dato mei hang- nanii sana siipok wole; mei hang- ninanii sana haimangii sateichii mei hangninanii sana rekngii pung leile. 42Sateichii mpoupiinanii rui kaleipei kalak kito; mpounii mpoupiina hangnamah pow tei magapyii takle. Teijang teipiinii mpoupiina tapiinii mpougo kisii lungsyii tangpo?”
43Teito Simon nii khekalatle, “Inii kamaningnii mpounii kisii maga kapyiipii teiniile.” Teito Jisunii mpou dakii tamle,
“Nangnii kasang tei khepyii takle.” 44Sateichii mpounii sapwi mpei lam tei nryiigongsii Simon dakii tamle, “Nangnii sapwi mpei aigo ngou- makpo? Inii goki gongle, nangnii gopi jangpii dwi seimakle; nlenii sapwi mpei ainii mikdwipii gopi tiima- twumsii mpoupei taampii tiimathang pyiile. 45Nangnii n-gu matwum katupii kadoumakle, nlenii mpoupei- nii, Inii gongliit kalu sekto gupi kamatwum matou makle. 46Nangnii gupi kikii thao manukpyii makle, nlenii mpoupeinii gupi kikii thao manukpyii takle. 47Teijangpiinii Inii godakii tam leile, Mpoupeinii lung- kasyii kadi tiikamangou aipii mpou- pei mah kem kama kadi hangtei magapyii takle katu tei mangoupyii takle. Nlenii kata kangkiigo ching- niikii magakapyii teinii, lungkasyii chingniikii mangoule.”
48Sateichii Jisunii mpoupei dakii tamle, “Go kem kama hangtei maga- pyii takle.”
49Teito mpougo kaswisii chiitang karam jangpii bam kalei meihang teinii, ahnyii roiniipii karashiitu takle, “Kem kama katangpii maga kapyii ai tapo?”
50Nlenii Jisunii sapwi mpei dateikii tamle, “Go mah kamalum teipii n-go keipyii takle; majungsii tat tulo.”
Currently Selected:
LUK 7: NAG2
Highlight
Share
Copy
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
