LUK 8

Jisugo sapwimeinii nga kanga

1Tinglang shangniikii sou kaleitai Jisunii Namdi ninado nam kacheng hangki maasii, Saraa mah Sating Sazyii mah kabi rasam tei tam ralipyiitu takle; Mpou boumei keariisiinakhii tei mpoutai switakle. 2Sateichii sapwimei kangkii sara kashyii kaswi kalei kito, sateichii ra kataam kataam tiisii kalei kito tii-mbi kalu ahnyii teinii: (Mekdolen sii kalat pei) mpoupei dato sara kashyii sana baatoi kalupei Meri, 3Herot mah Srat kito kadi pung kaleipii Chuza nou Joanna, Susana sateichii sapwimei kaki hangkii swi leile; ahnyiinii seh sana hangpii haisii ahnyiigo tiihale.

Lwi karali mah ndasam

(Met 13.1-9; Mrk 4.1-9)

4Sateichii namdi hangki teito mpouda gongsii meihangkii ndwiwo sek-kii, mpounii ndasam ai tamle.

5“Lwi karalimei hangninanii lwi ralitang karam jangpii tatpat takle. Sateichii mpounii aitiisii lwi rali kapi kito, lwirou kangkanii pwidi kuki takliit takle, sateichii teitei pipiiniido kutakle; sating gam ruinah niido chiitoi aitakle. 6Sateichii kangkanii kuitu phyiiryii takliit takle, sateikii teitei pokpat sek-kii, rangrhii moi kasu jangpiinii khitu takle. 7Sateichii kangkanii tiirat kak takliit takle, tiirat teinii lwikai gotei kaswisii lungpat siinii ghiitrang aitakle. 8Sateichii kangkanii sazyii kabiki takliit takle; sateichii pokpat siinii ati hai haipii matitu takle.” Mpounii ai tamsanii, mpounii saa mpatle, “Shiitang karam jangpii khoi kapungmei hangnii shii matulo.”

Tam ka-ndasam mah kaang

(Met 13.18-23; Mrk 4.10-12)

9Tam ka-ndasam ai kadagokhe sii mpou boumeinii Jisu dato n-nhiile. 10Teito mpounii khekalatle, “Saraa mah Sating Sazyii mah kamakum sam hangtei tiwo kabui mah tei gonyii dakii pyii bam takle; nlenii kakimei dakiinii ahnyiinii ngousii ngousii ngoukasu, sateichii shiisii shiisii tikasu ndasam tiisii tamziile.

Lwi karali mah ndasam go Jisunii tam kamangou

(Met 13.18-23; Mrk 4.13-20)

11“Ndasam tiisii tam kalei sam teinii aile: Lwirou teinii Saraa mah samtam teile. 12Pwidi kuki tak kaliit lwirou teinii, shii kalumei teile, nlenii sara kashyiinii gongsii kabi rasam tei ahnyii lung kito poitoi wole; ahnyiinii malum wosii keika- pyii tei doumatuwo kalak jangpii. 13Kuitu phyiiryii tak kaliit teinii, ahnyiinii kabi rasam tei shiitakle, sateichii ntasii lukaiwo takle. Nlenii maa kaga jangpiinii tinglang shangniikii malumkai takpokii, ajai kaju tinglang gong sek-kii, ahnyii tei koutakle. 14Sateichii tiirat kak tak kaliit lwirou teinii, ahnyiinii shiiwo takpokii, Sazyii pouryii mah swi kito pusii naangsii sateikii kani kahii, sateikii kasamou aihang aipii moijusii ahnyiigo ghiitmai aitakle, sateichii ahnyii mah riiti teinii mwisang mwi leimakle. 15Sazyii kabiki tak kaliit lwirou hangteinii, samtei shiiwo takpokii, katam kaswi ninado kabi lung kikii lukai wosii leh katipanii ati kamati ahnyii aile.”

Thaomi mah ndasam

(Mrk 4.21-25)

16“Mei kaniido Thaomi maseisii razyiipii gom ai leimakle, mak-kii, zyii kangkii kai leimakle. Nlenii tat kaliit meihang teinii kava tei ngouwo kabui jangpii Thaomi tei kadungnikii kai leile.

17“Kadaponii tam mpat lak tang karam kamakum samah kado gale; sateichii tilak tang karam sateichii tam mpat lak tang karam samah kado gale.

18“Teijangpiinii gonyiinii kada takumpii shii leipo, sakailo: kada- ponii kaleimei dakii pyiitangle, satei- chii kagapii dateito mpounii bamlesii maning kalei tei katangpii poitoi tangle.”

Jisu pwi sateichii kangsanamei

(Met 12.46-50; Mrk 3.13-35)

19Jisu pwi ninado mpou sanamei teinii mpouda gongle, nlenii meimoi kalei jangteipiinii ahnyiinii mpougo kadouwo lak kiile. 20Sateichii mpou pwi sateichii mpou sanamei teinii ki kajangto satsii mpougo kadou lesii mpou dakii sam tam maliit takle.

21Nlenii mpounii ahnyii dakii khekalatle, “Saraa mah samtam tei shiiwosii swi kalumei hangtei gu pwile ninado gu sanameile.”

Jisunii tingkai tingrotgo kanam

(Met 8.23-27; Mrk 4.35-41)

22Tingneikii mpounii mpou bou- meigo kaswisii malyii lungtei tatliit takle. Mpounii ahnyiigo tamle, “Nje nyiinii dwijai lugang kaapatle,” teito ahnyiinii tatpat takle. 23Ahnyiinii malyii hoipat kalei kiteito, Jisu tei ziit tutakle; teito tingkai tingrot katei tei dwijai phyiiryii gongsanii Malyiilung tei dwipii tokryiipi ziitakle, sateichii ahnyii tei sadoi kashyii kadoutang karamki leitakle. 24Teito ahnyiinii mpouda gong mpougo makengsii tamle, “Pumpii, Pumpii, nyiinii tailezii takle!” Teito mpounii gungtusii tingkai ninado tingrot gotei mwija pyiisii nam sek- kii, tingkai ninado tingrot hangtei matou takle sateichii manoisii majung takle. 25Sateichii mpounii mpou boumei dakii tamle, “Gonyii mah kamalum tei kadaki leipo?” Nlenii ahnyii tei khiikapat ninado kahingpii, hangninanii hangninii dakii tamle, “Tingkai ninado tingrot go katangpii mwija pyii sek-kii, swikalei mpou ai tapo?”

Sara kashyii kaswi kalei mei hangniniigo tii mbikapyii

(Met 8.28-34; Mrk 5.1-20)

26Jisu ninado mpou boumei teinii Galili dwijai lugamto kalei Gerasani sazyii kitei Malyii hoipatle. 27Jisunii Sazyii katangki pat sek-kii, sara kashyii kaswi kaleimei hangninanii namdi kiteito tatpatsii mpougo kadou takle. Mpounii tinglang ka- thangkii peimanido kaisu takle, sateichii kitodo bamsu takle; Nlenii roubam hang kiteito bam leile. 28Mpounii Jisugo ngou sek-kii, saasanii mpou doi koumang lat sagoisii tamle, “He kasagoi goisang Saraa nah sapfii Mpou Jisu! Nangnii n-gu dapei tiimatu nyiipo? Inii n-go khang leile, n-gu tii kamage seisulo.” 29Mpounii ai-ai tamle, dapokii Jisunii kashyii rangii gotei mpou dato pat tolosii mwija pyiile. Dapochiinii tinglang kaleita kashyii rangii teinii mpougo jumle, mpougo pi bah sagyiirengpii peisii bah sagyii rangkatpii kaisii meigo koibam matule. Nlenii mpounii sagyii reng ninado sagyii rangkat hang teido tiitak wole, sateichii kashyii rangii teinii mpougo sazyii kamarong kikii baa baatoile.

30Sateichii Jisunii mpougo n-nhiile, “Go zei tapo?” Teito mpounii tamle, “Amoi;” kadapokii sara kashyii hangkii mpouda liit takle. 31Teito sara kashyii hangteinii, Nyiigo nlai kaga kathok sazyii kang liit tang karam jangpii kakhat seisulo, sii mpou dato khangle.

32Nlenii zang ku teito bak koi hangninii tok chiisii bamle; sateichii ahnyiinii ahnyiigo bak hang dateikii maliit seilosii mpou dato khang takle, teito mpounii ahnyiigo mazhii- pyii takle. 33Sateichii sara kashyii hangteinii mei teipou dateito pat tosii bak hangda tei liit taklepokii, bak koi teinii pangshok kiteito kachot liitsii dwijai kiteito nlum takle.

34Pat kaleihang tei bak kakoimei hangteinii ngou wosii namdi kito sateichii teiki sazyii kito kaleimei hang go ahnyiinii pak mang tampyii takle. 35Teito pat kalei hangtei jutang karam jangpii meimoinii tat- pat takle. Sateichii ahnyiinii Jisuda gong wosii, sara kashyii hang pat kalupii teinii peimanido kaisii swido swilingsii Jisu pibang kabam tei ngou wosii hingtakle. 36Sateichii ngou kalumei hang teinii sara kashyii kaswi kaleipii gotei kada takumpii tii mbiwopo katu tei ahnyii dakii tam takle. 37Sateichii Gerasani sazyii baang kiteito kaleimei hangteinii ahnyii dato tat tuseilosii mpou dato khangle. Dapochiinii ahnyii hangtei hangkapii hingtakle; teipiinii mpou- nii Malyii lung liit takle ninado nlaitu takle. 38Sateichii sara kashyii pat kalupii teinii mpougo kaswisii tat lesii mpou dato khangle. 39Nlenii Jisunii mpougo aitiisii tamsii langtoi aitakle: “Go kilam nlai tulo, sateichii Saraanii gojangpii kadaziikii tha kadi tiipyii takpo katu tampyiilo.” Teito mpou jangpii Jisunii kadaziikii tha kadi tiipyiipo katu tei namdi hang kito tamtat tutakle.

Jairus nah sapwi mpei ninado Jisu peika kadengpei

(Met 9.18-26; Mrk 5.21-43)

40Jisunii dwijai lugamto nlaipat sek-kii, meimoinii mpougo bisii lu- keipyiile, dapochiinii ahnyii hangtei mpougo koisii bamle. 41Sateichii Jairus katupii sapfii mpou tei gongle. Mpou ai Jehudimei mah ndwi kito kadimei hangniniile. Mpounii Jisu pibang koumang kok kumsii Jisugo mpouki gong seilosii khangle. 42Dapochiinii mpou nah sapwimei hangniniisang hangninii roinii kalei tingkum keariisiinakhii kashang pei tei tailesii bamtakle. Jisunii pwidi tatsii kalei kak, meimoi teinii mpougo bangbing takle. 43Meimoi kaktei sapwimei hangninii tingkum keariisiinakhii zai humsii kaleipei tei swileile. Mpoupeinii mpoupei mah kabam hangtei Peimhii meida maasii ra juleibangpii tiimaga aitakle. Nlenii mei kaniido mpoupei mah ra tei tii mbiwo lak kiile. 44Sateichii meimoi kak teito mpoupeinii Jisutai tatpi takle, sateichii mpoumah peika tei dengtakle; teito mpoupei gamto zai humsii kalei tei binasek-kii bitakle. 45Teito Jisunii n-nhiile, “Tanii n-gu dengpo?”

Teito meimoinii dengmak lesii katam kak, Pitarnii tamle, “Pumpii meimoinii n-go bang maguisii katok leile.” 46Nlenii Jisunii tamle, “Mei kanii n-gu dengtakle, dapochiinii gugamto teimaham kapat tei Inii titakle.” 47Sateichii sapwi mpei teinii kabaipei wolak takle katu tiwo sek-kii, mpoupeinii nchyiidung dung- sii tatpat takle, sateichii mpoupeinii Jisu pibang koumang takle, teiki meimoi doi teito; Sateichii mpougo dajangpii dengpo, ninado kada takumpiinii mpoupeinii binasek-kii biwopo katu tei tam takle. 48Jisunii mpoupeigo tamle, “Gunah sapwi mpei, gomah kamalum teipiinii n-go tii mbipyii takle, majungsii tat tulo!”

49Jisunii ai tam leibangpii, Jehu- dimei mah Ndwi kito Kadipii kito sampao kapungmei gongsii tamle, “Gonah sapwi mpei tei taitakle” sii mpounii Jairus go tamle, “Madhii- kapyiipiigo tii kamage loisulo.”

50Nlenii Jisunii teitei shii sii Mpounii Jairus dakii tamle, “Hing- sulo, malumpao malumlo, sateichii mpoupei biwo buile.”

51Mpounii ki gong sek-kii, Mpounii Pitar, Jon, Jems sateichii nahnapei pwi nei pfii teisupiinii, mei hangninii kagodo ki kalung maliit sutakle.

52Teikito kaleimei hangteinii mageesii hatsii bamle, Teito Jisunii tamle, “Hatsulo, dapochiinii mpou- peinii taimakle, nlenii zyiileile!” 53Teito meihang teinii mpougo hoksii nuile, kadapokii nah tei taitakle katu ahnyiinii tile. 54Nlenii Jisunii mpoupeigo bahto jumsii latle, “Gunah tulo.” 55Teito mpoupei mah rangii tei nlaigong takle; sateichii mpoupeinii binasek-kii gungtu wotakle, mpoupeigo mah kachiipii pyiichiilo sii Jisunii ahnyiigo mwija pyiitakle. 56Teito mpoupei pwi nei pfii teinii hangkapii sung gatakle, nlenii pat kalei hangtei meida kado tam sulosii mpounii ahnyiigo teisii kakhatle.

Currently Selected:

LUK 8: NAG2

Highlight

Copy