LUK 4

Jisugo kahem

(Met 4.1-11; Mrk 1.12-13)

1Jisu Rangii kamateipii tokryiisii Jordan karyii kito nlaipatle, Sateichii Rangiinii mpougo Sazyii Kamarong ki pang gongle. 2Teito mpougo sara kashyiinii leimik rekdai hemle, teitinglang hangki tei mpou- nii mah kado chiimakle, teipiinii teitei, sang sek-kii mpou moi mazyii takle.

3Teito sara kashyii teinii mpou dakii tamle, “Nang Saraa nah lepochiinii, kuitu aigo tiirok ndatlosii mwija pyiilo.”

4Teito Jisunii mpougo khekalatle, aitiisii ryiibamle, “Tiirok roipiinii meinah ringwo lakle.”

5Sateichii sara kashyii teinii mpougo kasagoi gam pangkhii, sazyii pouryii sagong hang mah sazyii hangtei mpougo mik hiitkii kikii mangou takle. 6Sateichii sara kashyii teinii mpouda tamle, “Inii aihang mah teimaham sateichii ahnyii hang mah pumtei kava tei godakii pyiitangle; dapochiinii aihang ai gudakii pyiibam takle, Inii pyii kanyii mei dakii pyiiwo buile. 7Teipiinii nangnii n-gu mata lepo- chiinii, aihang ai gomah tangle.”

8Teito Jisunii mpou dakii khe- kalatle, “Nangnii Go Saraa Bangpii go riita tangle, sateichii nangnii mpougo roinii mata tangle,” katu ai ryiibamle.

9Sateichii mpounii Jisugo Jero- salemki pangliit, Saraa kamaning ki kasagoi goisang gamkii masatsii mpou dakii tamle, “Nang Saraa nah lepochiinii, Nang aikito sok malo; 10Kadapochiinii aitiisii ryiibamle, ‘Saraa nii gojangpii Mpou mah Sating gamluigo tampyiisii, Sating gamluinii n-go jupyii tangle,’ 11sateichii gopi tei kuitu kikii deng kasu tiisii n-go ahnyiinii bahpii chyii makhiipyii tangle.”

12Teito Jisunii mpougo kheka- latle, “Aitiisii tam bamle, ‘Nangnii Go Saraa Bangpii go jai kaju ai tiilakle.’ ”

13Mpounii aitiisii kadat karyiisii hemsang kaleitai, akai kabi tinglang tei dou kasu kathang tei sara kashyii teinii mpou dato tat tutakle.

Jisunii Galili kito mpou tha tiikamakhii

(Met 4.12-17; Mrk 1.14-15)

14Sateichii Jisunii Galili ki nlaigongle ninado Rangii kamatei mah teimaham tei mpougo kaswi leile, sateichii mpou mah tingha tei teiki sazyii bam hang kito tam kahitu takle. 15Mpounii Jehudimei mah Ndwiki lyiito tam ralipyiile, sateichii meihangnii mpougo tam makhangle.

Jisugo Nazaret kito mazhii kasu

(Met 13.53-58; Mrk 6.1-16)

16Sateichii mpougo makot kamakhii bam Nazaret kitei mpounii gongle, sateichii bam ntak piinei leimik Mpou jai taiswisii Jehudimei mah Ndwibam kitei mpounii liitsii kabi rasam tei fiitang karam jangpii gungtu sat takle; 17sateichii Lung- kakalingpii Isaiya mah Larekbung tei mpougo pyiitakle, teito mpounii Larek tei laatle, sateichii ryiikabam sam ai doutakle.

18“Bangpiimah rangii tei Guphyiiryii leile,

Dapochiinii mpounii kagamei dakii kabi rasam tam matu tang karam jangpii n-gu thao manukpyii takle.

Maringpouchyiimei hang go mpou rangra tiimatu katu sateichii mik kachet meigo nlailoisii mik ngou matu tang karam sam ai saa mpatpyii matu tang Karam jangpii,

sateichii kamage kamarhii meigo laat mpatpyii tang karam jangpii,

19sateichii Bangpii mah kamajyii tingkum tinglang tei saa mpat matu tang karam jangpii n-gu lang m-mangle.”

20Sateichii mpounii Tiighii bung tei kajyiisii anga kangamei dakii pyii aisii bamwo takle; sateichii meihang mah Mik hoi tei hangninii tiisii mpougo jule. 21Teito mpounii ahnyii dakii tamtu takle, “Tingnei gonyiinii shii kalu kito kabi rasam ai madougong takle.”

22Sateichii ahnyiihangnii mpou kaang kito kabi tei karashiile satei- chii mpou mwi kito kapat lungkasyii sam gotei shii sii sung gasii tamle, “Ai-ai Joseph nah sapfii mpou tei makpo?”

23Mpounii ahnyii dakii tamle, “Madousupii gonyiinii samtam ai gudakii tam tangle, ‘Peimhiipii, goroipii tii mbiwolo, Kaiparnam kito tiikaluhang nyiinii shii kalu tei, go nam aikitodo tiilo.’” 24sateichii mpounii tamle, “Inii kasangpii gonyii dakii tam leile, Lungkakalingmei hangninii kagodo mpou mah Sazyii kito lukaipyii makle.

25“Nlenii kasang kito Inii go- nyiigo tam leile, Ilaijah haki tingkum hangtum sakhii saruk ai tingryii supii sazyii hangki hangkasii taak kateeng kaktei Isrel ki Kamipwimei hangninakii leile. 26sateichii ahnyii- hang kak kito mei hangninii dakiido Ilaijahgo lang m-mangpyii makle, Nlenii Sidon mah Zarephat kito Ka- mipwipei dakii lang m-mangpyiile. 27sateichii Lungkakaling Ilaijah mah tinglang kitei Isrel ki Tiigyiira tiisii kalei mei hangkii leile; sateichii ahnyii kak kito mei hangninii kagodo tiimateipyii makle, nlenii Sairiya mpfii Naman go roiniile.”

28Teito Jehudimei mah ndwibam kito bam kalei mei hangnii, sam hang ai shii sek-kii, rakarhiipii tokryii takle; 29Teito ahnyiinii gungtu sat tosii, mpougo namdi kiteito chyiipat takle, zang gam tu-taghii kiteito toi m-mangtang karam jangpii ahnyii mah namdi tiikabam zangtoi kitei pangpi takle; 30Nlenii mpounii meimoi sum teito tatpat tosii mpou pwidiki tat tutakle.

Sara kashyii kaswi kaleimei hangninii

(Mrk 1.21-28)

31Sateichii Jisunii Galili kito kalei Kaiparnam namdi kitei liitle, sateichii bam ntak piinei leimik mpounii ahnyiigo tam ralipyiile. 32Teito mpounii ralikapyii tei ahnyiinii sung gatakle, dapochiinii mpounii teimaham haisii ralipyiile. 33Jehudimei mah ndwiki lung tei sara kashyii kaswi kaleimei hang- ninii leile. 34“Oh! Nazaret ki Jisu, nangnii nyiigo kadapei tiileziipo? Nang nyiigo tiikamage tang karam jangpii gong leipo? Nang tapo katu tei Inii tile, Nang Saraa mah kamatei sam katam meile.”

35Jisunii matei kasu Rangii gotei mwija pyiisii tamle, “Malhii sulo, sateichii mei dato tatpat tolo,” teito sara kashyii teinii mpougo meimoi doikii toi m-mangpyii takle, sateichii mpou dato tatpat totakle mahkado tiimashyii supii.

36Meimoi teinii sung gasii hangninanii hangninii dakii tamle, “Ai kadapei sampo dapochiinii mpounii tei mahampii matei kasu rangii hang gotei kakhatle, sateichii ahnyiinii tatpat tole.” 37Sateichii teiki bamhang ki teito Jisu mah kaang kito tam roitu takle.

Jisunii mei hangkiigo tii-mbi kapyii

(Met 8.14-17; Mrk 1.29-34)

38Sateichii mpounii Jehudimei mah ndwi ki teito tatpat tosii Simon ki kalung tei liit takle, sateichii Simon hnei tei riirhii mahungsii bamle, teito ahnyiinii mpoupei jangpii Jisudakii tamle, 39teito Mpounii mpoupei kutei satto takle, sateichii mpounii kariirhii gotei kakhatsii namtakle; teito mpoupeinii kariirhii tei bitakle, sateichii mpoupeinii gungtusii ahnyiigo anga ngatu takle.

40Sateichii leimik liit kaleitai ahnyiinii ra kataam kataam tiisii kaleimei gotei mpouda pang gong takle; teito mpounii mei nsang nsang phyiiryiikii bah poikai pyiisii ahnyiihang go tii-mbipyii takle. 41Sara kashyii hangtei niido, “Nang Saraa nah sapfii mpou teilesii saasii meihangkii dato tatpat totakle.” Sateichii Jisunii ahnyiigo mwija pyiisii malhii matu sutakle, dapochiinii mpou ai Kristale katu tei ahnyiinii tile.

Jisunii Jehudimei mah ndwi kito rali kapyii

(Mrk 1.35-39)

42Sateichii tingva liit sek-kii, mpounii tatpat tosii kamakum bam hangniniiki tat tutakle. Sateichii meimoinii mpougo fiisii fiisii Abangpiinii kalei nitei gong sek-kii, ahnyii dato mpougo tat mpat sutakle. 43Nlenii mpounii ahnyii dakii tamle, “Inii Saraa mah Sating Sazyii mah kabi rasam tei kaki nam meigodo tam ralipyii tangle, dapochiinii n-gu aijangpii lang m-mangpyiile.” 44Aitiisii Jisunii Judiya sazyii ki Jehudimei mah ndwi ki hangki tei liitsii kabi rasam tam ralipyiile.

Currently Selected:

LUK 4: NAG2

Highlight

Copy