LUK 1
1
1Lungkasyii Theophilas: Nyii kakto pat kalei nha aigo mei moinii ryiisii bamtakle. 2Karei kito mik sekpiinii kangoumei sateichii teisam tamsii kalei meinii nyii dakii tam kapyii tei ahnyiinii ryiisii leile. 3Teipiinii teimaham kadipii, pat kaleihang ai Inii karei reisang kito ti kalu taiswisii, Inii gojangpii adoidoi tiisii ryiikapyii ai bitanglesii ma- ningle. 4Dapochiinii nangnii madhii kaluhang mah kasang tei tiwo kabui jangpiinii.
Jon dwi mpum kapyiipii manaa tang karam sam reipii kamati
5Herotnii Judiya ki sagong pung kalei tinglang kak, Abija hemei, azei Zakaria sii kalat kanat kajum Ating- mei hangninii leile, sateichii mpou nou tei Aron nah sapwi mpei teile; Mpoupei zei tei Ilizabetle. 6Ahnei hangna tei Saraa doito kasang kamajyii tiilung lungsii Bangpii mah Ajaitingshang sateichii Kakhat kapyii samtam hang gotei majaisii lung leile. 7Sateichii Ahnei tei nah gale, kadapochiinii Ilizabet tei Saraa niigale, sateichii ahnei tei hangkapii tingtakle.
8Tingneikii Zakarianii tingnei tingneikii tha tiisii kalei kito mpou leng tei poisii Saraa kilungto kanat kajum Atingmei hangninii tha tiisii leile. 9Kanat kajum Atingmei jai taiswisii, Bangpii mah kakhatbam kitei liitsii makam ranuk karu tei mpou doiki tatakle. Teipiinii mpounii Saraa Bangpii kilungtei liit takle. 10Sateichii makam ranuk tei rukalei kak, mei moinii ki kajangto matasii bamle.
11Sateichii Sating gamlui hang- ninanii mpouda hum, makam ranuk rukalei Saraago kakhatbam ajiilam teito sat takle. 12Zakaria teinii mpougo ngouwo sek-kii, saram takle sateichii hingtakle. 13Nlenii sating gamlui teinii mpougo tamle, “Hingsulo” Zakaria, Saraanii gomah kariita tei shiitakle, sateichii gonou Ilizabet teinii nah sapfiimei hang- ninii mpung tangle, mpougo nangnii Jon sii lat tangle. 14Nangnii daziikii nta ranga tangpo; sateichii kakimei teinii daziikii nta tangpo mpougo lung m-mang sekchii. 15Mpounii Bangpii mah mik doito kadi kathang- mei hangninii mitangle, mpounii Darkhati dwi sateichii Jou saklakle, mpougo lung kalu sekto rangii kamateipii tokryii tangle. 16Sateichii mpounii Isrelmeinah hangkiigo Bangpii ahnyii Saraada pang nlai- gong pyiitangle. 17Sateichii Apfiimei mah lungtei Anahmei dakii pyii matu tang karam jangpii, sateichii katam swikasu meigo kasang mah swirek kikii maning nlaigong matu tang karam jangpii, Bangpii jangpii tiidasii kalei meigo tiida matu tang karam jangpii, mpounii Bangpii doi reisii Ilaijah mah rangii sateichii teimaham kito tat tangle lungka- kalingpii Ilaijah takumpii.
18Zakarianii Sating gamlui dakii tamle, “Kada takumpii teitei Inii titangpo? kadapochiinii I-tingtakle sateichii gu noudo tingtakle.”
19Sateichii Sating gamlui teinii mpougo khekalatle, “Saraa doito sat kalei Gabrel I-le; sateichii karashii tang karam sateichii nha kabi ai godakii punghum tang karam jangpii n-gu lang m-mangle. 20sateichii julo, aihang ai pat kasuta nangnii malhii supii bam tangle, dapokii nangnii gomah tinglangki pat tang karam gu samtam gotei nangnii malum makle.”
21Sateichii meimoinii Zakariago koisii bamle, sateichii mpounii Saraa kamaning kilungto pat kari jangpii ahnyiinii sung gasii bamle. 22satei- chii mpounii pat katu kak, ahnyiigo rashiipeiwo lak kiile, teito mpounii Saraa kamaning ki lungto mah kanii ngouwo taklesii ahnyiinii ngousii ti- takle, teito mpounii ahnyii dakii ajai tiimangoule sateichii lat pat sutakle.
23Sateichii mpou mah tha tiitang karam tinglang tei sang sek-kii, mpounii mpouki gongtu takle. 24Tinglang leimik aihang-tai teikii mpou nou Ilizabet tei mpung takle. 25sateichii ai tamsii mpoupeinii sakhii mangii mbaile, teiteinii, “mei doito gumah ka-nrou ai poitoipyii tang karam jangpii guphyiiryiikii Bangpiinii jumage kapyii leimik sek piinii gudato aitiisii mpatpyii takle.”
Jisu lungtang karam reipii kamati
26Sateichii Ilizabet moi kampung sakhii saruk kasang tinglang kak, Saraanii Sating gamlui Gabrelgo Galili kito Nazaret Namdi kikii lang m-mangle. 27Devitki mpung kito Joseph sii kalat sapfii mpou hang- ninii kikii n-nhiitak kaleipei kamatei ralhiipei datei mpou gongle, sateichii ralhiipei zei teinii Merile. 28Sating gamlui teinii mpoupeida patsii tamle, “kamajung tei nangnii doulo, Bangpiinii n-go kaswi leile, sateichii nang ai doi kabi peile!”
29Teito Merinii sating gamlui mah sampao tei shii wosii lungnyii lunghaotu takle, sateichii mpounii tam kalei sampao ai kadapeiposii mpoupei lung kito maningtu takle. 30Sating gamlui teinii mpoupei dakii tamle, “Hingsulo Meri! Saraanii n-go jumage pyii takle. 31Julo, nangnii mpung tangle sateichii nah sapfiimei hangninii lung tangle, sateichii nangnii mpougo Jisu sii lat tangle. 32Mpounii kadimei hangninii tii- tangle sateichii sagoi kaki Saraanah sapfii mpou sii lat tangle, mpou pfii Devitgo takumpii, Saraa bangpiinii mpougo sagong tiimatu tangle; 33Sateichii mpounii Jakobki atat areng phyiiryiito kalui gasii sagong tiisii lung tangle; mpou mah sagong sazyii tei kalui tiisang tiilakle.”
34Teito Merinii Sating gamlui dakii tamle, “Inii sapfiimeigo kaswi supiinii, dakumpiinii ai ai pat tangpo?”
35Teito Sating gamlui teinii mpoupei dakii tamle, “Rangii kama- tei teinii go phyiiryii humpyii tangle, Sateichii sagoi kaki mah teimaham teipii n-go akhii lakpyii tangle; teijang teipii lungtang karam nah tei Saraa nah, kamatei sii lat tangle. 36Sateichii julo, goki kalungmei pwi Ilizabet teinado tingsii taipei kalei kito nah sapfiimei hangninii mpung takle; sateichii Saraa niiga lesii tam kalei pei teinii mpung kalei tei sakhii saruk takle. 37Kadapochiinii Saraanii samah kado tiipei kalak gale.”
38Merinii tamle, “Inii Bangpii ki kalei meile, nangnii katam tei takumpii gudato pat matulo.” teito Sating gamlui teinii mpoupei dato tat tutakle.
Merinii Ilizabet da kagong
39Sateichii Merinii tinglang ailungkii gungtu ada tiisii kalangsii, azang gamto kabam Judah namdi kitei tat tutakle. 40Mpoupeinii Zakaria ki tatliitle, sateichii Iliza- betgo matale. 41Merinii kamata khoi tei Ilizabetnii shiiwo sek-kii, nah teinii mpoupei lungto nsaktu takle, sateichii Ilizabetnii rangii kamateipii tokryii siinii, 42lat sagoisii saale, “Nangnii sapwimei hang mangto adoi kabi peile, sateichii go moilungto kalei nah tei doibile! 43Gu bangpii pwinii guda kagong, gudato doi kabi ai kada kitopo? 44Kadapochiinii julo, gomah kamata khoitei shiiwo sek-kii, gulungto nah teinii ntasii nsaktu takle. 45Sateichii Bangpii dato mpoupei dakii tam kapyii samtei gong matwi tang lesii malum kalupei tei doibile.”
Merinii tam kamatoi lhii
46Merinii tamle,
“Gulungnii Bangpiigo toile,
47Sateichii n-gu Keikapyiipii Saraa dato gu rangiinii ntale,
48kadapochiinii mpounii n-gu maningpyiile,
mpouki kaleipei kasanapeigo;
kadapokii julo, aitoisekpii meihangnii n-gu doi kabipeisii lat tangle;
49kadapochiinii Saraa kadi teinii gu gamkii tha kadi tiipyii takle.
Mpou zei teinii kamateile.
50sateichii mpougo sadzyii ngariit katiimeigo aha-hato mpounii lungsyii kati tei mangoupyiile.
51Mpoubah teipii tei maham mangoupyii takle,
mpounii ahnyii lungtei ti kalu kito det katiimei hang go tii marou maruk toipyii takle.
52Mpounii katei kakhangmeigo sagong bam ki teito tiisanapyii takle,
Sateichii kasanamei hang go poi sagoipyii takle;
53Mpounii mazyii kaleimeigo kabi hang teipii tii tokryii pyiitakle,
sateichii kanimeigo mpounii bah marongpii mpatpyiile.
54Mpounii Abraham sateichii mpoutaa mpou nahmei dakii kalui kaga tiisupiinii lungsyii kapyii tei maning matu tang karam jangpii,
55Nyii pei nyii paomei dakii tam kabam takumpiinii,
mpouki kaleimei, Isrelmeinahgo tiiha takle.”
56Sateichii Merinii Ilizabet go sakhii tumkii kaswisii bam takpokii, mpoupeiki nlaitu takle.
Jon dwi mpum kapyiipiigo kalung
57Ilizabetnii manaa tang karam tinglang tei gong takle, sateichii mpoupeinii nah sapfiimei hangninii lungtakle. 58Mpoupeigo Abangpiinii jumage kapyii kadi tei mpoupei ki tiinamei sateichii ki kalungmei hangnii shii sek-kii, ahnyiinii mpou- pei go kaswisii nta njoile.
59Sateichii jang siisatnii takle sek-kii nah gotei Jehudimei kanat taiswisii ahnyiinii tiigyii malem tang karam jangpii gongle, sateichii ahnyiinii mpou gotei mpou pfii zei katou tak tang lesii bam takle. 60Nlenii mpou pwinii tamle, “Makle, Mpou zei ai Jon tak tangle.”
61Ahnyiinii mpoupeida tamle, “Nlenii ai zei ai goki sadung kilungto mei zei kado gale.” 62Sateichii ah- nyiinii mpou pfiigo ajai tiimangousii n-nhiile, mpou nah gotei zei kadapei tak katu mareiposii; 63Zakaria nii Atukok hangninii khangle, sateichii ryiipyii takle, “Aipou zeinii Jonle,” teito ahnyii hangnii sung gatakle. 64Teisek-kii Zakaria nii lat pat takle, sateichii mpounii Saraa go tam matoi tutakle. 65Teito ki tiinamei hangtei kahingpii tokryii takle, sateichii ai mah nha ai zang gamto kalei Judah nam hangki tam roitu takle. 66shii kalumei hangteinii maningsii n-nhii- tule, “Ai nah ai kadapei mitangpo?” Kadapokii mpouda Bangpii mah teimaham tei leile katu ai kasang takle.
Zakarianii doisam tam ka-mpat
67Sateichii mpou pfii Zakarianii rangii kamateipii tokryiisii mpounii aitiisii Saraa sam tam mpatle: 68“Nje nyiinii Bangpii go tam matoile, Isrelmei mah Saraa gotei. Kadapokii mpounii mpoumeigo gong tiihale sateichii
ahnyiigo kaleipyii takle.
69sateichii mpou kikaleipii Devit mah atat-areng kito Keikapyiipii hangninii nyiijangpii pyiitakle.
70Ndouto mpounii mpou mah
Lungkakalingmei paito riishii tiipyii takle:
71Nyiigo ngoukaroumei sateichii jukaroumei bah hang kito nyiigo keipyii tangle.
72Nyii pei nyii paogo jumage kapyii tei mangou tang karam jangpii,
sateichii mpoumah sat tang karam karanu samtam hangtei maning matu tang karam jangpii,
73Sateichii nyii pfii
Abraham dakii riishii tiikabam taiswisii;
74Nyiigo nyiimah ngou karoumei bah kito keipyii takpokii,
mpou doito kahing gasii,
75kamatei kito,
kasang kamajyii kito,
nyii tiilung mata mpougo kahing gasii nga ngakabui jangpii tiipyii takle.
76Gunah, N-gonii sagoi kaki Saraa mah Lungkakalingpii sii lat tangle.
Kadapokii nangnii mpou pwidi tiida tang karam jangpii
Bangpii doi reisii tat tangle.
77Mpoumeigo ahnyii mah kem kama tei kaleipyiisanii Keipyii tanglesii tam mangou matu tang karam jangpii.
78Nyii Saraa teinii Jumage kati sateichii manoi kabi teile,
Mpounii nyii phyiiryiikii Keikapyii mah tingchoi kava tei sagoi gamto vapyii tangle.
79Sateichii katai mah kamyii khii kito lung kalei meihang go
Sating gamto vapyii tangle, nyii pikang ai
kamajung pwidi kikii chyiitat pyiitang karam jangpii.”
80Nah tei pumpot sateichii rangii dipat takle sateichii mpounii Isrel- mei machii doikii mangou kasuta tei mapwizyii kito lungle.
Currently Selected:
LUK 1: NAG2
Highlight
Share
Copy
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
