JON 15

Kasang darkha bangtei Jisule

1“Kasang darkha bangtei I-le, sateichii darkha toipyiilu katiipii tei gu Pfiile. 2Gudato kalei ti mati kasu kha hang gotei mpounii tat toileile, sateichii ti kamati kha hang gotei kisii ti mati matutang karam jangpii mpounii tiimateile. 3Inii gonyiigo ralikapyii teipiinii gonyiigo tiimateipyii aitakle. 4Gudato taksupii leilo, sateichii Inii gonyii dato taksupii leitangle. darkha bang kiteito kha teinii taksupii lei sule- ponii, ah roinapii ti matipei kalak takumpii, gonyiinii gudato taksupii lei suleponii, gonyiido ti matipei wolakle.

5“Darkha bangtei I-le, kha hang- tei gonyiile, gudato taksupii kalei ninado Inii ah dato taksupii kalei ahteinii ti hangniikii matile; kada- pokii I-haisupiinii gonyiinii samah kado tiipei wolakle. 6Mei kata hang- ninanii gudato taksupii lei suleponii, ahgo kha takumpii toido toile taido taiga tule; sateichii ahnyiinii teigo tei poi nkom wosii mi sumkii toikaisii rutoi leile. 7Gonyiinii gudato taksupii leileponii, sateichii gumah samkang hangtei gonyii dato taksupii leileponii; gonyiinii kamarei hangtei khanglo, sateichii teitei gonyii dakii pyiitangle. 8Gonyiinii ti hangniikii matisii, aitiisii gonyiinii gumah boumei tiikatu aipiinii gu Pfii mah pumtei kava tei mangoule. 9Pfiinii n-gu lungkasyii takumpii, Inii gonyiigo lungsyiile; gonyiinii gumah lungkasyii kito taksupii leilo. 10Inii Pfii mah kakhatsam hangtei swi wosii, mpoumah lungkasyii kiteito kalei takumpiinii, gonyiinii gumah kakhatsam hangtei swiwo leponii, gonyiinii gumah lungkasyii kito taksupii leitangle.

11“Gumah ka-nta ai gonyii dato leimatu tang karam jangpii; sateichii gonyii mah ka-nta tei matwi mashang matutang karam jangpii, sam hang ai Inii gonyii dakii tam takle. 12Inii gonyiigo lungkasyii takumpii gonyiido hangninanii hang- niniigo kalungsyiilo katu ai gonyii dakii pyiikalei kakhatsamle. 13Mei kata hangninanii mpou mah kangmei jangpii tai kapyii; aidoito mei kado lungkasyii dikaki gale. 14Inii gonyii dakii kapyii kakhatsam hangtei gonyiinii swileponii, gonyii ai gu kangmei hangle. 15Nlailoisii Inii gonyiigo ki kaleimei latloi lak takle, kadapokii ahmah pumpiinii katii tei kikaleimeinii timakle; nlenii gonyiigo kangmei lat takle; kadapokii Inii Pfii dato shii kalu hangtei Inii gonyii dakii mati takle. 16Gonyiinii n-gu kalai makle, nlenii gonyiinii mangsii ti mati matutang karam jangpii ninado gonyii mah ti tei leimatu tang karam jangpii sateichii gonyiinii gu zei kito Pfii dato kakhang hangtei mpounii gonyiigo teitei pyii matutang karam jangpii, Inii gonyiigo kalai takle ninado bam kaipyii takle. 17Gonyii hangninanii hangniniigo kalungsyii matutang karam jangpii kakhatsam ai Inii gonyii dakii pyii leile.

Sazyii pouryii mah ngoukarou

18“Sazyii pouryiinii gonyiigo ngourou leponii, gonyiigo ngourou kasunakii n-gu ngourou takle katu gonyiinii tilo. 19Gonyii ai sazyii pouryii mah leponii; sazyii pouryiinii mpou mah sek takumpiinii gonyiigo lungsyii tangle. Nlenii gonyii gonii sazyii pouryii aito Inii kalai wotakle, sateichii gonyiinii teimah makle; teijangpii sazyii pouryiinii gonyiigo ngourou leile. 20Kikaleimei teinii ahmah apumpii sung kisii dibwi maklesii Inii gonyii dakii tam katu samtei maning gonglo, ahnyiinii n-gu tiikamage leponii; gonyii godo tiikamage tangle, ahnyiinii gusam swileponii, gonyii samdo switangle. 21Nlenii gu zei jangpii ahnyiinii aihang ai gonyii dakii tiitangle; kadapokii n-gu lang kamagong ah gotei ahnyiinii timakle. 22Inii gongsii ahnyii dakii tam suleponii, ahnyii mah kem tei leilakle, nlenii aitoinii ahnyii mah kem magapyii tang karam gatakle. 23N-gu ngoukarou meihang teinii gu Pfii godo ngouroule. 24Mei kaniido tiikasu tha tei Inii ahnyii kak kikii tiimangou suleponii, ahnyiimah kem tei leilakle; nlenii aitoinii ahnyiinii n-gudo gu Pfii godo ngoudo ngoutakle sateichii ngoudo ngourou takle. 25Ai ai ahnyiinii akaang gasii n-gu ngourou takle sii ahnyii mah ajaitingshang bung kikii ryii kabam samkang tei gong matwi matu tang karam jangpiiniile.

26“Nlenii Pfii dato lang magong tang karam tiikahapii tei; katunii Pfii dato kagong kasang mah rangii teinii kagong tinglang kak; ahnii gumah kaang kito sakchyii pyii tangle; 27sateichii gonyii hangdo sakchyiile, dapodinchii saroisekto gonyiinii n-gu kaswisii leile.

Currently Selected:

JON 15: NAG2

Highlight

Copy