NAMBAR 35
35
Levi irchihai omna hrang khua inkung a ni
1 #
Jos 21.1-42
Khanchu Jeriko irdîn Jordan ivapang, Moab phâizôla khan Rengpa’n Mosia a chongpuia, 2“Israel irchihai kha thu pehaiin lân, an ramhaia khan Levi mihai omna hrangin khopui senkhathai kha pe ri sehai. Khakhêla sa vâina hrangin khopui kôlhai khom kha an ipêk sahai hrang a ni. 3Hi khopuihai hi Levi mihai ta hrang ni a ta, khataka khan om an ti, hloisûl satnahai khom kha an sial le an sa danghai ta hrang ni a ti. 4Khan hloisûl satnahai khom kha khopui ata mûk sângkhata hla a ini hrang a ni, 5Khan kul pên tiang ata irkhî ni ta, nisua tiang mûk sânghni, nitâk tiang mûk sânghni, sim tiang mûk sânghni le hmâr tiang mûk sânghni ni a ta, khopui chu a laitaka om a ti. 6Khan Levi mihaiin kutkechâiin mi an thata, an zôkna hrang, irbîkna khopui hrangin khopui kiruk ni ipêkhai hrang a ni. Khabana khopui dang sômminli inhni pehai sa ni ti. 7Hloisûl satnahai khom pe ni ta, an rêngin khopui sômminli kiriat a ini hrang a ni. 8an ram lua a lian le a chîn dungzuiin nam tinin Levi mihai chu khopui an ipêkhai hrang a ni,” a tia.
Zôkna khopuihai
(Dhn 19.1-13; Jos 20.1-9)
9 #
Dhn 19.2-4; Jos 20.1-9 Rengpa’n Mosia kuang, 10“Israel mihai kuang hrilin lân, ‘Jordan dung nin kâia, Kanaan ram nin lût tika, 11nin kutkechâiin mi an thata, a’rbîka a zôk theina hrangin zôkna khopuihai inthang suak roi. 12Kha khopuihai kha phuba lâktu kuang ata zôkna ni a ta, mi thattu chu vântâng laia a chungthu rêl a ni mâka chu, that a ni loina hrangin. 13Khopui kiruk inthang suak nin ta, 14Jordan râla khopui inthum inkunghai nin ta, Kanaan rama khopui inthum ngêt nin inkung hrang a ni. 15Israel irchihai le ram dang mi an kuang omhai ta hrangin zôkna khopuihai ni a ta, mi tukhomin kutkechâiin mi a lei thata ni’n chu, hitaka hin lûtin zôk a ti.
16-18“Khannisian mi’n thîr mani, lung mani, thing mani hmangin mi a thata ni’n chu, ama chu mi that chang a ti, mi thattu chu that a ini ngêt hrang a ni. 19Thata omtuhai in mi chu phuba kha la an ta, an hmu’n chu thatpai zôi an ti. 20Khan, mi’n hmumâkna sikin nam inthekin mani, idêngin mani, 21aninole kut leh irchûmin mani a lei thata ni’n chu, a thattu kha mi that a nia, that ngêt hrang a ni, Thata omtuhai in mihai khan phuba la an ta, an hmu tena chu that zôi an ti.
22Aniachu, roi irlaloi sika khom ni loiin, châiirpala tu’n mani, a nam thuta, a thatin mani, khan, inruang ni kher loia dêng mani, 23an om ti khom inhre loia, a ikhôkmâk khom ni loia, a poi tho pe khom ni ual loia, lungin mani a dênga, mi a lei ithi mani a ni’n chu, 24pungkhômhaiin hi roirêlna dân ang hin a thattu thisen phuba lâktu roi kha a irêl pe hrang a ni. 25Pungkhômhai khan mi thattu kha thisen phuba lâktua irthokin hrung an ta, pungkhômhai khan a thâna, zôkna khuaa khan inomtir nôk an ta, sahriak irthianga nâl, ochai inlal a thi mâka chu khataka khan a iom hrang a ni. 26Aniachu, itiklai khomin mi thattu chu an tâna, zôkna khua ramri pên tiang a fea, 27thisen phuba lâktu’n a zôkna khua pêna a hmua, thisen phuba lâktu’n a thatin chu thisena khan thiamno chang no ni. 28Ochai inlal a thi mâka chu kha zôkna khuaa khan a om mai hrang sikin; ochai a thi hnunga rêk chu mi thattu kha a omna rama khan a ikîr nôk hrang a ni.
Mi that thua inhrepuitu le irtanna dân
29Hi thil hi nin irchihai ten khom nin omna kipa nin roirêl dân hrang chu ni a ti.
30 #
Dhn 17.6; 19.15 Tukhomin mi a thatin chu mi thattu chu inhretuhai bâi ata thu suakin that hrang a ni; aniachu, inhretu inkhat vaiin chu, thatna hrang dân chuk mah. 31Khan, mi thattu kha ni irtan hrang ni ma, thina hrang dôra thiamno chang a nia, that ngêt hrang a ni. 32Khan, ochai thi mâka chu zôkna khuaa intân, a rama om nôk hrang irtanna chu nin ilâk hrang ni mah. 33Khanchu, nin omna ram kha, porinchetir hrang ni ma, thisen khan ram kha nin porinchetir tâka, thisen suakna ram porinche sôpna hrang khan thisen insuaktu thisen ringot no chu hmang thei ni mah. 34Nin omna ram, ki omna hi nin iporinchetir hrang ni ma, kei Rengpa hi Israelhai laia hin ki oma,’ ti ro,” tiin.
Currently Selected:
NAMBAR 35: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.