MARKA 2

Zenginthî indam

(Mt 9.1-8; Lk 5.17-26)

1Khan, sûn iza tena mani chu Kapernaum a hong lût nôka, ina a om tih thu an thang tâka. 2Khanchu, pên tiang khom mikot kôl sip khakin mi tamtak an lei pungkhôma, an kuang thu a hrila. 3Zenginthi inkhat, mi minliin an hong irzôna, a kuang an hong panpuia. 4Mipui sika khan nâi thei mahaia, a omna irdîna a zâlna pumin an zun thâka, 5Jisua’n an iamzia a hmu’n chu zenginthî kuang khan “Ki nâipa, ni sualhai ngaidam a ni ta,” a tia.

6Dân irchutirtu senkhat toi sahai khan an lungrîlin an ngaituaa, 7“Hi mi hin itho sika mo hianga a iti; Pathian a ihril insiat a ni hi te; Pathian ni no’n chu, tu mo sualhai ngaidam thei?” tiin. 8Khaang khan an ngaitua tih Jisua’n an hriat zôia, an kuang, “Itho sikin mo lungrîla khaang kha nin ingaitua? 9Zenginthi kuang khan, ‘Ni sualhai ngaidam a ni tah ti le thoiin lân, ni zâlna kha lan lân, ke’n fe roh,’ ti hi, a kho hi mo a ol ual? 10Rammuala hin Mihriam Nâipa hin sual ngaidam theina a nei ti nin inhriat theina hrangin nangni ki hong inhriattir a ni,” a tia; zenginthi kuang khan, 11“Thoiin lân ni zâlna kha lan lân, ni in tiang kîr roh, nang ki hril,” a tia. 12Khanchu, a thoia, a zâlna kha a lâka, an rênga mit hmua a suak zôi tâka; an rêngin ar khêl an ti tak taka, “Hiang hi ei la ihmu ngai viat loi kêng,” tiin Pathian an inpâk tâka.

Jisua’n Levia koi thu

(Mt 9.9-13; Lk 5.27-32)

13Khan, dîl tiang khan a fe nôka, mipuiin an hong pan sup supa, ama’n a lei irchuhaia. 14Khan, a fe malamin, Alfaia nâipa Levia kha khâzana irfuangna hmuna toi a hmua, “Ni zui roh,” a tia. Ama khan a thoia a zui tâka. 15Khan Jisua chu Levia ina khalâi a ota, irchutirhai kha khâzana irfuangtuhai le mi sual tamtakin Jisua le irchutirhai an hong otpuia. Khan ama zuipuhai chu tamtak an nia. 16Farisaihai laia Dân irchutirtuhai khan khâzana irfuangpuhai le mi sualhai khalâi otpui an hmu’n chu a irchutirhai kuang, “Itho sika mo khâzana irfuangpuhai le mi sualhai laia a iot sa?” an tia. 17Jisua’n kha kha an hriatin an kuang, “Mi hrisêlhaiin daktor innang ngai mahaia, mi irveisiahai kêngin an innang ngai a ni. Mi felhai donsui hranga zuang ni ma unga, mi sualhai donsui hranga zuang kêng ki ini,” a tia.

Bu nghei chungchâng thua irdonna

(Mt 9.14-17; Lk 5.33-39)

18Johana irchutirhai le Farisaihai bu nghei ni khan mi tuhai manni an honga, a kuang, “Itho sika mo Johana irchutirhai le Farisai irchutirhaiin bu an ngheia, ni irchutirhaiin chu an inghei loi?” an hong tia.

19Jisua’n an kuang, “Irneinaa mikhualhai kha bu nghei an ti, nin itûng ma ni? Ni thei no ni! Moineipu an kuang a om sûng kârka chu bu nghei no nihai. 20Khannisian, Moineipu kha an kuang ata hruai zoro la om a ta, kha tika chu la nghei an ti.

21“Tukhomin puan milui phoa, puan thar irhlek leh pho ngai mahai, pho ta sianlân, a thar khan puan milui kha kai set a ta, chet nôk ual ual a ti. 22Tûte’n Uain thar khom savun kok miluia thun ngai mahai, thun ta sianlân, uain thar khan savun kok kha mût set a ta, uain le savun kokhai kha hmanghmunboi chang zit a ti. Khasikin, uain thar chu savun kok thara thun an ti,” tiin a sâma.

Sabat chungchânga irdonna

(Mt 12.1-8; Lk 6.1-5)

23Jisua chu Sabat niin bubil hmunhai a hroa, a irchutirhai khan fe malamin bu vûihai kha an kai dûka.#Dhn 23.25 24Farisaihai khan a kuang, “En ta, itho sika mo Sabat dân iphal loi an itho?” an tia. 25Jisua’n a kuang, “Davida’n, a rualhai le phîngchâma fâk hrang an nei loi laia a thil tho kha nin itep loi mo?#1 Sam 21.1-6 26Abiathara Ochai inlaltak a ni laia Pathian ina a lûta, Ochaihai vai fâk thei bai kha a fâka, a rualhai khom a ipêk sa thu kha?” a tia.#Lev 24.9

27Jisua ngêtin, “Sabat hi mihriam ta hranga siam a nia, mihriam hi Sabat ta hranga siam ni mah. 28Khasikin, Mihriam Nâipa hi Sabat chung tena khom hin Rêng a ni,” a tia.

Currently Selected:

MARKA 2: HRACLBSI

Highlight

Copy