MARKA 1

Baptistu Johana thu’nsîr

(Mt 3.1-12; Lk 3.1-18; Joh 1.19-28)

1Pathian Nâipa; Jisua Krista Thurchi Sa irphutna chu;

2Deipu Isaia Lekhabua;

“Irngai ta ki tirtôn ni matona ki tîr ta.

Ama khan ni lampui siam a ti.#Mal 3.1

3Ramchâra mi khêk irhai khan,

‘Rengpa lamlian siam unglân,

A fêna hrangin lam intûn siam roi,’ a ti,”

tia irziak ang khan. #Isa 40.3

4Khasikin, Baptistu Johana khan sual ngaidamna hrangin irletna baptisma chang hrang thu ramchâra a hong hrila. 5Judai ram kil tina mi le Jerusalem khuaa mi murdi khan ama an pana, an sualhai an irphuanga, Jordan dunga khan a lei baptis-hai tâka.

6Johana kha saringsei mul puanin ar bela, savun kha kongkhitin a khita, khaihmimse le ram khuaihlutui bu’n a ngama.#2 Rng 1.8 7Khan, mipuihai laia, “Ki hnunga zuang hrangpu chu keima nêka roiinpui ual ok a nia, kei chu kûna a kekok hrui sût inruk lua khom ni ma ung. 8Keima’n tuiin nangni ki baptisa, ama’n chu Irtha Irthiangin nangni baptis a ti,” tiin a hrila.

Jisua baptisma a changna le thêmna a tongna

(Mt 3.13—4.11; Lk 3.21-22; 4.1-13)

9Kha zoro lai khan Jisua kha Galili rama Nazaret khua ata a honga, Jordan dunga khan Johana’n a lei baptis tâka. 10Tui ata a hong suak le chu irvân ar honga, Irtha, vasu anga ama chunga zuang chum a hmua, 11Irvân ata kha hnuk irhai kha a zuang suaka. “Nang, ki Nâipa, ki lungthung tak ni ni; ni chunga ki lôm tak tak,” a zuang tia.#Irp 22.2; Ipn 2.7; Isa 42.1; Mt 3.17; 12.18; Mk 9.7; Lk 3.22

12Irtha khan ama kha ramchâra a tîr zel tâka. 13Kha khan sûn sômminli Setana inthêmin a oma; ram sahai laia a om sa tâka, Pathian vântîrtônhaiin an zuang changpui ngai.

Jisua’n nga cheltuhai minli a koina

(Mt 4.12-22; Lk 4.14-15; 5.1-11)

14Khan, Johana kha an chel zoiin chu Pathian Thurchi Sa hrilin Jisua kha Galili rama a honga; 15“Zoro a hong tung ta; Pathian Ram khom anai ta; irlet unglân, Thurchi Sa hi iam ta roi,” a ti thiaia.#Mt 3.2 16Galili dîl pang a hro lai khan Simona le a sangpa Andria kha dîla lên vôrin a va hmuhaia, nga chel ngai an nia. 17Khan Jisua’n an kuang “Ni zui roi, khanchu mihriam cheltu’n nangni siam ki ti,” a tia. 18An lênhai an mâksana, ama an zui ta.

19A va fe nôk viata, Zebedaia nâi Johana hai ulenâi kha a hmua, irkuanga lên an phoa, 20Jisua’n, anni khom kha a koihai zôia, an pa Zebedaia le an sinthotuhai irkuanga an mâkhaia, Jisua kha an zui tâka.

Ramilhli ichel indam

(Lk 4.31-37)

21Khan, Kapernaum khua an lûta, Sabat nikhua khan Sinagoka ar chuhai zôia. 22Mi a irchutir dân inhriat murdihai khan ar khêl an ti oka. Dân irchupuhai ang ni loia, thuneina nei taka anni kha ar chuhai sikin. #Mt 7.28-29

23An Sinagoka khan ramilhli ichel mi inkhat a lei oma, a hong khêk suaka. 24“Nazaret Jisua kin chungchânga irrol ni itum ma ni? Nin buai zoi hrangin ni ihong ma ni? Tu mo ni ini nang kin hriat, Pathian mi Irthiang kha ni ni,” a tia. 25Jisua’n a hala, “Dâihrekin lân, a sûng ata hong suak roh,” a tia. 26Khan ramilhli khan deng an theitir bita, inring taka khêkin a sûng ata kha a hong suak tâka. 27An rêngin a’rkhêl an ti tak taka, “Hi hi imo a ini ngai tâk? irchuna thar a ni hi te; ramilhlihai khom irchamnei takin thu a pêka, an izôm hi,” an irti irhlôma. 28Galili le ram dang kil tina a thurchi kha an thang zôi zel tâka.

Mi tamtak indamna

(Mt 8.14-17; Lk 4.38-41)

29Khan, Jisua kha Sinagok ata irthokin Jakoba le Johana hai leh an suaka, Simona le Andria hai ina an lûta. 30Simona tarpi kha inkhurin a lei zâl raka, a thurchi an va hril lata. 31Ama kha a va pana, a kut a chela, a kaithoi tâka, an khur kha a boi zôia, fâk le nêk a siam pehai ta. 32Kha khohloi, misa tâk hnung chu, damloi murdi le ramilhli ichelhai a kuang an hong hruaia. 33An kho pumin inkhâr kôla khan an hong om sup tâka. 34Jisua’n natna tinrênga dam no tamtak an dama, ram khohri ichel tamtak an hnot suaka. Ram khohrihai khan ama an inhriat sikin an chong phal mah.

Jisua’n Galili rama thu an sîr

(Lk 4.42-44)

35Khan zînga khua a la vâr mân a thoia a suaka, hmun fianriala, a va chongchaia. 36Simona le a rualhai khan an zonga; 37an va hmu’n chu, “Mi’n nang an zong sup sup,” tiin an hrila. 38Khan, ama’n “Hmun danga, kho irnai bômhaia fe ei ti, khahaia khom thu ki la insîr thiai hrang a ni; khatak kha ki izuangna bi a ni!” a tia. 39Khanchu, Galili ram murdia an Sinagoka lûtin thu an sîr thiaia, ramilhlihai khom an hnot suaka.#Mt 4.23; 9.35

Phâr indam

(Mt 8.1-4; Lk 5.12-16)

40A kuang phâr a honga, a makunga khûksadela, chubai mûkin indam a ngêna, “Ni nuamin chu ni ni’rthiangtir thei,” a tia. 41Jisua’n a saterengin lung an khama, a hong inbana a tôna, “Ki nuam e, hong irthiang ta ni ti,” a tia. 42A phâr kha a hong dam zôi zela, a hong irthiang tâka. 43Ngar takin thu a pêka, an fetir zôi ta. 44A kuang, “Hi thu hi tûte kuang insîr viat no ro. Khannisian, ochai kuang thengthaiin lân, var en roh, kha hnung chu mi tinin ni’rthiang nôk tâk ti an inhriat infelna hrangin. Mosia’n irbôlna inhlan hranga a iti kha inhlan roh,” a ti pea.#Lev 14.1-32 45Khannisian a fe suaka, kha thu kha an sîr tâka, a puang indarh ual uala, khanchu, an insîr inlum hrai sikin, Jisua chu thangphuangin khua khom lût ta maka, hmun fianriala a om ta, hmun tin ata mi’n an hong pan ngaia.

Currently Selected:

MARKA 1: HRACLBSI

Highlight

Copy