MATHAIA 5

Tâng chunga thu’nsîr

1Jisua’n mipuihai kha a hmu’n chu tânga a kâia, a toia, a irchutirhai an hong irbukkhôma; 2khanchu, thu an sîra, a’rchutirhaia.

Vânsatna diktak

(Lk 6.20-23)

3“Irthaa inrianghai chu an vân a sa e,

irvân Ram an ta a ni sikin.

4“Irtha’nvâihai chu an vân a sa e,

irtharngam la ni an ti.#Isa 61.2

5“Thuhnuairôlhai chu an vân a sa e,

Pathian chonginkung kha an la hmu hrang sikin.#Ipn 37.11

6“Felna sika phîngchâma tuiinhrâlhai chu an vân a sa e,

an la ikhop hrang a ni.#Isa 55.1-2

7“Lungkhamna nei mihai chu an vân a sa e,

lungkham an la ihlo hrang a ni.

8“Milunga irthianghai chu an vân a sa e,

Pathian an la ihmu hrang a ni.#Ipn 24.3-4

9“Irngeina siamtuhai chu an vân a sa e,

Pathian nâihai ti an la ni hrang sikin.

10“Felna sika dengtheina tuanghai chu an vân a sa e,

irvân Ram an ta a ni sikin. #1 Pet 3.14

11“Keima sika mi’n nangni an hala, deng nangni an intheia, dikloi taka sual tinrêng thoa nangni an bê’n chu nin vân la sa ti.#1 Pet 4.14 12Lôm unglân, raifân takin om roi, irvâna nin lômman a om intama; khaang dênin tiana deipuhai khom kha deng an intheihai kêng.#2 Tsn 36.16; Tîr 7.2

Michi le vâr

(Mk 9.50; Lk 14.34-35)

13“Irnêng michi nin ni, khannisianlân michi hi dong ta ngân sianlân, itina inaltir nôk hrang ma ni? Pai suaka, sirpha chian ti no chu ia khom hmang inruk ni ta no ni.#Mt 9.5; Lk 14.34-35

14“Rammual vâr nin ni, tâng sîpa kho om chu thup thei ni mah.#Joh 8.12; 9.5 15Mi’n meiser hâlin khamphulu hnuaia sia ngai mahai, a sianaa kêng an sia ngai; khanchu, in sûnga mi murdi a êl invâr ngai.#Mk 4.21; Lk 8.16; 11.33 16Khaang dênin nin vâr kha mi mit hmu’n vâr ri se; khanchu, nin thil tho sahai kha hmu an ta, nin Pa irvâna mi chôiindôm thei an ti.#1 Pet 2.12

Dan chungchânga irchutirna

17“Dân thua mani, Deipuhai thua mani, insiat hranga zuang ni iam no roi, insiat hrang ni loiin irkiptir hranga zuang kêng ki ini. 18Thudik nangni ki hril, irnêng le irvân hi a om sûng chu Dân thua om inchuk dap mani, kaipit mani a rêngin a tung irkip zit mâka chu inkhat lua hi boi no ni.#Lk 16.17 19Khanchu, hi thupêk laia poimo loitak inkhat khom hi ngainêpa, khaanga mihai irchutir ka chu irvân Rama mi chîn tak ti an ti; aniachu, tukhom, zôma irchutir ka chu irvân Rama mi lian ti an ti. 20Nin felna’n Dân irchutirtuhai le Farisai felna a khêl no’n chu irvân Rama lût viat no chin ni, ti nangni ki hril a ni.

Ningmur chungchânga irchutirna

21“Tianlai mihai kuang, “Mi ni ithat hrang ni ma, mi that rêng rêng chu an chungthu rêl ni a ti,” ti thu nin inhriat.#Fes 20.13; Dhn 5.17 22Keima’n chu nangni ki hril, mâni urêng chunga ningmur chu a chungthu rêl ni a ti; a urêng “hmangnaboipa” ti chu Sanhedrin-ah rêl ni a ti; a urêng “invêtpa” ti lenvâng chu hremhmun meia fe inruk a nih ti nangni ki hril a ni. 23Khanchu, ni thilpêk maichâma nin hlan hranga khan ni urêngin ni chunga lunghoi nona a nei ti nin hriat suakin chu, 24maichâma ni thilpêk kha masanin lân, fe’n lân ni urêng kha irngeipui bakin lân, kha zoiin ni thilpêk kha inhlan roh.

25“Ni irdoipui kha lampuia nin fe suam laiin irngeipui lat roh; khano’nchu, roirêltu nang incheltir a ta, roirêltu’n chu sipai kuang nang inhlan a ta, intângna ina nang khumna lik an ti. 26Thudik nang hril ki ti, poisa inkhat khom ni pêk irkip mâka chu, kha hmun ata kha suak viat no chi ni.

Uirena chungchânga irchutirna

27“ ‘Ni uire hrang ni mah,’ ti nin inhriat.#Fes 20.14; Dhn 5.18 28Keima’n chu hiang hin nangni ki hril, tukhom, nupang indit ena en ka chu, a lungrîla a iuire chian tâk a ni. 29Ni mit chang tiangin nang an tûktirin chu kêlsuakin lân, pai rak roh; ni taksa pumpui hremhmuna pai nêkin chu taksa mit kiangkhat boi chu ni ta hrangin a sa ual.#Mt 18.9; Mk 9.47 30Khan, ni kut chang tiangin nang an tûktirin chu, tanpaiin lân, pai rak roh; ni taksa pumpui hremhmuna pai nêkin chu, ni taksa kut kiangkhat boi chu ni ta hrangin a sa ual.#Mt 18.8; Mk 9.43

Irmâkna chungchânga irchutirna

(Mt 19.9; Mk 10.11-12; Lk 16.18)

31“ ‘Tukhom dôngma mâk chu irmâkna lekha pe ri se,’ ti a ni sa.#Dhn 24.1-4; Mt 19.7; Mk 10.4 32Keima’n chu hiang hin nangni ki hril, uire sika ni loia dôngma mâk ka kai chu, a dôngma kha an iuiretir a ni, kha zoia nei nôk khom an iuire a ni.#Mt 19.9; Mk 10.11-12; Lk 16.18; 1 Kor 7.10-11

Khomâksâm chungchânga irchutirna

33“Tianlai mihai kuang, ‘Milakin khomâk irsâm no unglân, Rengpa kuang ni khomâksâm kha ni isua hrang a ni,’ ti nin inhriata.#Lev 19.12; Nam 30.2; Dhn 23.21 34Keima’n chu hiang hin nangni ki hril, khomâk rêng rêng irsâm no roi; irvân sâlin sâm no roi, kha kha Pathian rêngtoihmun a ni;#Jak 5.12; Isa 66.1; Mt 23.22 35irnêng sâlin irsâm sa no roi, kha kha a ke irnghatna a ni; Jerusalem sâl khomin irsâm no roi, kha kha rêng roiinpui tak khopui a ni.#Isa 66.1; Ipn 48.2 36Ni lu sâlin ni isâm hrang ni ual ma, sam malkhat khom ni inngoiin, ni invom thei ni mah. 37Ni thu’nsîr kha “A ni” nin iti chu a nih ni ri se, “Ni mah” nin iti chu, ni mah ni ri se, khaban kha chu sual ata suak a ni.

Phuba lâk chungchânga irchutirna

(Lk 6.29-30)

38“ ‘Mit irthûla mit; ha irthûla ha,’ ti nin inhriat;#Fes 21.24; Lev 24.20; Dhn 19.21 39Keima’n chu hiang hin nangni ki hril; mi sual irdoipui no roi; ni biang chang tiang inbêntu kuang chu vei tiang khom do roh; 40Tukhomin ni chunga thupoi siamin ni songkol lâk an tumin chu ni puan khom inlatir sa roh. 41Khan, mêl khat nakhrâta nang hruaitu chu mêl hni zui roh. 42Nang an nghi’n chu pe’n lân, ni kuanga pûk nuampu chu irheisan no roh.

Râlhai lungthung hrang thu

(Lk 6.27-28,32-36)

43“‘Ni bômhai lung ni ithung hrang a ni, ni râl chu ni ikhôkmâk hrang a ni,’ ti nin inhriat.#Lev 19.18 44Keiin chu nangni ki hril; ni râlhai kha lungthungin lân, deng nangni intheitirtu chu chongchai pe ro, 45nin Pa irvâna mi nâihai nin ni theina hrangin; Ama’n chu mi sualhai le mi sahai chunga misa an suaktira, sin sa sinhai le sin saloi sinhai chunga khom rua an thotir ngai. 46Lung nangni thungtuhai vai lung nin thungin, lômman imo nin ihmu hrang? Khâzana irfuangtuhai khomin khaang khan an tho ngai! 47Khan, nin urênghai vai chubai nin imûk hin imo ni itho inhliak ual? Jentailhai khomin khaang khan an tho ngai! 48Khanchu, nin Pa irvâna mi a sa irkip angin nangni khom nin isa irkip ngêt hrang a ni.#Lev 19.2; Dhn 18.13

Currently Selected:

MATHAIA 5: HRACLBSI

Highlight

Copy