MATHAIA 4

Jisua thêmna a tong

(Mk 1.12-13; Lk 4.1-13)

1Kha zoiin chu Jisua kha Diabola inthêm hrangin ramchâra Irtha’n a hruai zôi zel tâka.#Heb 2.18; 4.15 2Sûn sômminli le zân sômminli bu a nghei zoiin chu a phîng a hong châm tâka. 3Khanchu, Setana kha a honga, a kuang, “Pathian Nâipa ni ni lele’n chu hi lung hi bai chang hrangin thu pe ro,” a tia. 4Jisua’n a sâma, “Bai ringotin mihriam hi an ihring thei hrang ni mah. Pathian bâi ata thu tinrêng suakin kêng an ihring hrang a ni,” tia irziak ang khan, tiin a sâma.#Dhn 8.3

5Kha hnung chu Diabola khan Jisua kha, Jerusalem khopui irthianga a hruai lûta, tempil sîpa an ngîrtira, 6a kuang, “Pathian Nâipa ni ni lele’n chu irchômtha ro,

‘Ni chungchânga teh Pathianin vântirtônhai thu pe a ta,

An kutin nang indom an ti,

khano’nchu ni ke leh lung irfûina ni ti,’

ti irziak a ni,”

a tia. #Ipn 91.11-12

7Jisua’n a kuang, “Rengpa ni Pathian fia no ro, ti irziak a ni sa kêng,” a tia.#Dhn 6.16

8Diabola khan tâng irsâng taka a hruai nôka, rammual ram murdihai le a roiinpuina an entira. 9A kuang, “Khûksadelin chubai ni mûkin lân, hihai murdi hi nang pe ki ti,” a tia. 10Jisua’n a kuang, “Setan, rot pat ro, ‘Rengpa ni Pathian chu chubai mûkin lân ama sin vai tho ro,’ ti irziak a ni,” a tia.#Dhn 6.13 11Khanchu, Diabola khan a rotsana, vântîrtônhai an zuanga a sin an tho pe ta.

Jisua’n Galili rama sintho a phut

(Mk 1.14-15; Lk 4.14-15)

12Johana an chel ti an hriatin Jisua kha Galili rama a fe pat tâka.#Mt 14.3; Mk 6.17; Lk 3.19-20 13Nazaret suaksanin Kapernaum khuaa a zu om ta, kha kha Zebulun le Naftali ram huala Galili dîl panga om a ni.#Joh 2.12 14Deipu Isaia insîr kha a hong itung a ni ta:

15“Zebulun le Naftali ram,

Tuipui panna lam,

Jordan râl,

Jentailhai omna Galili.#Isa 9.1-2

16Inthim hnuaia toihai khan vâr roiinpuitak an hmua,

Thina ram inthim hnuaia toihai chunga a zuang vâr ta,”

tia a lei insîr kha a hong tung indikna hrangin, kha kha a hong iom a ni.

17Kha tena khan Jisua’n, “Irlet roi, irvân Ram chu anai tâk e,” tiin a hril irphut tâka.#Mt 3.2

Jisua’n nga chel ngai mi minli a koina

(Mk 1.16-20; Lk 5.1-11)

18Jisua chu Galili dîl muanga a chai laiin ulenâi inhni, Simon Petera an iti le Andria chu dîla lên vôrin a hmuhaia; nga chel ngai an ni. 19An kuang, “Ni zui roi, khanchu mihriam cheltu’n nangni siam ki ti,” a tia. 20An lênhai kha mâksanin, ama kha an zui zôi zel tâka. 21Khatak ata a fe thiaia, ulenâi inhni, Zebedaia nâi Jakoba le Johana kha a hmuhaia, an pa Zebedaia leh irkuanga an lên an insui insaa, anni kha a koihaia. 22Khanchu, irkuang le an pa kha an mâksana; Jisua kha an zui zôi ta.

Jisua’n ar chutir, thu an sîr, a indam thu

(Lk 6.17-19)

23Jisua’n Galili ram murdi ar fanga, an Sinagokhaia irchutirin, Ram Thurchi Sa chu a hrila, Israelhai laia natna tinrêng le hrât nona tinrêng irveihai chu an damhai thiaia.#Mt 9.35; Mk 1.39 24Khanchu, Suria ram murdia a thurchi an thang tâka; damloi murdihai, damloina le natna tinrêng tuanghai, ramilhli ichelhai, hrisangol le zenginthihai, a kuang an hong hruaia, a lei indamhaia. 25Galili ram ata, Dekapoli khua ata, Jerusalem ata, Judai ram ata le Jordan râlhai ata mipui tamtakin ama an zui ta.

Currently Selected:

MATHAIA 4: HRACLBSI

Highlight

Copy