DÂN INHNINA 4
4
Mosia’n thuzôm hrangin Israelhai a ngên
1Atûn chu, Israelhaio, chonginkung le omdân hrang nangni ki irchutir kha uksak unglân, nin nâihai kuang Rengpa nin Pathianin nangni a ipêk ram kha dam taka nin lua theina hrangin zôm roi. 2#Thup 22.18-19 Thu nangni ki ipêk hi nin ibelsa hrang ni ma; Rengpa nin Pathian thu nangni ki ihril kha irhmâi nin inei hrang ni ma. 3#Nam 25.1-9 Peor tânga Rengpa thil tho nin ihmu seng kha, Peor tânga Baal betuhai kha a that zit kha te. 4Nangni Rengpa chel ngittuhai rêk chu atûn ten nin la dam hi te.
5Irngai u ta, thu’nkunghai le om hrang dân ei Pathian Rengpa ni ihril ang dênin nangni ki’rchutira, nin ipan, nin ram dong hrang nin tung tika zôm ngêt roi. 6Hi dânhai hi uksak unglân, zôm khak roi; nam danghaiin an inhriat tika, ‘Hi nam hi nam vâr tak le changkâng tak an lei ni hi te,’ ti an ta, nin vârzia le nin changkâng bîkzia inhria an ti. 7Ei Pathian Rengpa anga a mihai koina lei sâm thiai ngaitu ang hi, nam dang, nam roiinpui takhai khomin, Pathian an nei moa. 8A vuana dân nangni ki izam pe anga dân le thupêk sa khom hi nam roiinpui takhai khomin an inei ma ni? 9Khanchu, irdîn unglân, nin mit ngeia nin thil hmuhai kha nin dam sûnga nin irnghil loina hrangin irnak song unglân, nin nâi le te khom, nin tuhai khom, hrilhai ngai roi. 10‘Mihai kha koi bukin lân, an kuang ki insîr kha inhre sian ki inuam a ni; an dam sûng chu ki thu an zôma, an nâihai khom ni chi lam dân irchu thei an ti,’ a tia; khaang dên khan tânga nin Pathian Rengpa makunga nin ingîr a ni kha irnghil loiin, nin nâihai kha hril ngai roi. 11#Fes 19.16-18; Heb 12.18-19 Tâng chu a kânga, meikhu irsa takin a khu khaka, an thim khaka, irvân dênin an thima, a kôla toi hrangin nin va nâi a ni kha. 12Rengpa khan mei ata nangni a hong chongpuia, a’rhâi kha nin inhriata; khannisian, hmu hrang om ma, a’rhâi vai kêng nin inhriat. 13#Fes 31.18; 34.28; Dhn 9.10 A thuthung kha vong ngit hrangin nangni a hrila, thupêk sôm, lungphêk inhnia a irziak kha zôm ngit hrangin nangni a tia. 14#Fes 21.1 Rengpa khan a dân murdi kha nangni irchutir hrangin a ni ti. Nin omna hrang ram nin tung tika, kha kha nin izôm ngit hrang a ni thuhai nin nâihai nin ihril ngai hrang a ni.
Millim biak loi hrang
15Horeb tânga khan mei ata Rengpa khan nin kuang thu an sîra; khannisian, a tak chu hmu mak chêi kha te. A sân irdîn roi. 16#Fes 20.4; Lev 26.1; Dhn 5.8; 27.15 Millim, nin ibiak hrang siamin irporinche no roi; pasal irlim mani, nupang irlim mani siam no unglân, inchertir sa no roi. 17Irnênga om thilhring tinrêng irlimhai, chung vuang vahai irlim, 18irnênga inbok irvâka fe, irnêng hnuai tuia nga irlim nin biakin, nin isiam hrang ni ma. 19Irvân tiang hong thîr nin ta, misa, tha, ârsihai le irvâna thil dang om tinrênghai khi chubai mûkin a sintho irzuk chin ni; a sân irdîn roi. Rengpa nin Pathian khan khihai khi nam dang biak hrang vaia a isia a ni. 20#Fes 19.5; Dhn 7.6; 14.2; 26.18; Tit 2.14; 1 Pet 2.9 Nangni chu, Aigupta ram, thîr hâl inzôina meipui ata kha, nangni a la suaka, ama dongtum ni hrangin nangni a ihruai suak a ni, atûna nin iom ang hin. 21#Nam 20.12 Kei chu, nangni sikin Rengpa nin Pathianin nin lua hranga a ipêk ram, ram sataka fe hrangin Jordan dung ki ikâi sa hrang phal ma. 22Kei chu Jordan râl kâi loiin hitaka rama hin ki ithi hrang a ni, nangni rêk chu kâi unglân, ram chu nin va ilua hrang a ni. 23Rengpa nin Pathianin thu nangni a inkungpui kha irnghilna lik chin ni. Rengpa nin Pathianin i dûr khom, nin isiam le nin ibiak kha phal ma. 24#Heb 12.29 Nin Pathian Rengpa hi kâng irhmang mei ang a ni, Pathian nunse tak a ni.#Jer 29.13
25Nin ram hranga khan sôt tak nin om hnungin, nâi le te neia tubora, irlo hni irlo thum nin nei tika khom millim rêng rêng i anga irlim khom, nin siama, Rengpa nin Pathian nuam loi lam nin tho tâkin chu, irnêng le irvân sâlin ki insîr a ni, 26Jordan dung kâia nin va inei hrang ram ata kha thi zoi zit nin ti. 27#Dhn 28.36 Rengpa khan nam tin laia nangni indartir a ta, kha khan tômte chu hring suak chu om vi viat nin ti. 28Kha rama khan mihriam kuthai irlim, thing mani lung mani, chong theiloi, inhre thei saloi, hmu theiloi le thil mirim khom inhre thei loiin biak nin ti. 29Khannisianlân, kha ram ata kha Rengpa nin Pathian kha a sân nin chia, lungrîl murdi le ama nin zongin chu hmu nôk nin ti. 30Nikhua hnungkhônhaia chu intak tuang nin ta, a thu zôm ta nin ti. 31Nin Pathian Rengpa hi Pathian khonza thei tak a nia, nangni masan no nia, nangni insiat sa no ni; nin pahai kuang thu an kung ngit kha irnghil sa no ni.
32Tianlai nin suak mân, Pathianin irnênga mihriam a siam ata kha sui u ta; rammual pumpui hi irdon suak unglân, nin thil hmu ang le nin thil inhriat ang hi an inhriat ngai mo irdonhai u ta. 33Tu nam mo mei ata Pathian thuhril inhriat ngai, a’rngaituhai dam suak sa ngai? 34Aigupta ram ata nin Pathian Rengpa khan a mi hrangin nangni a ihruai suak angin tu Pathianin mo hmun khat ata a mi hrang nam hruai suak ngai an iom? Nangni chu, nin Pathian khan, a sinthotheizia le irdoinahai inomtira; thilirkhêl le irsinsiana irkhêl tak tak a thoa; thil ichiom tak takhai an tungtir a ni kha te. 35#Mk 12.32 Rengpa hi Pathian a nia, ama no hi Pathian dang zel om mahai ti nin inhriat theina hrangin khahai kha nangni a inhmutir a ni. 36Nangni a’rchutir theina hrangin irvân ata a’rhâi nangni a inhriattir a ni, irnênga ngêt a mei roiinpui kha nangni an hmutira, khatak ata kha nangni a zuang ichangpui a ni kha te. 37Nin pahai kha a sân a’rngaiinnat sikin an irchihai chu nangni an thanga, Aigupta ram ata ama ngêtin inhnê’n nangni a ihruai suak a ni. 38Nin matona, nin irthûla nam lian ual le sinthothei ualhai a’rzûlpaia, an omnaa nangni a hruai lûta, nin ram hrangin an ram kha nangni a ipêk hrang a ni. Atûn ten kha ram kha nin ta a la ni mai. 39Khasikin, a vuan hin inhre roi, irnghil viat no roi: Rengpa hi chung tiang irvân le hnuai tiang irnênga Pathian omsun a ni, Pathian dang rêng rêng om mahai. 40Khasikin, a thu’nkunghai le a thupêkhai kha zôm roi, nin ta hrangin sa a ta, nin nâi le tehai ta hrangin sa a ti; kumkhuaa nin inei hranga nangni a ipêk rama khan dam insôt nin ti.
Mi thata, intânna hrang khua
41 #
Jos 20.8-9
Jordan dung sak tianga mi thata, intânna hrang khopui inthum an kunga. 42Kha khuaa khan, mi’n a râl khom ni loi, mi a that palin chu intân thei a ti; an lei inzôk hrang a ni. 43Reubena irchihai rama, Gilead biala om Ramot khua hai, Manasea irchihai rama Basan bial Golan khuahai kha an kunga.
Dân pêk thua thumahruai
44Hi hi Israelhai ta hrangin Mosia’n dân a itârinlang kha a ni. 45Hi chongbehai le thu’nkunghai le om hrang dânhai hi Aigupta ram ata Israelhai an hong suak lai khan Mosia’n a ihril a ni. 46A hrilna hmun kha Beth-peor tâng dep, Jordan dung sak tiang, Amor rêng Sihona ram sûnga a ni, ama hi Mosia le Israelhaiin an izoi a ni kha te. 47Kha ram kha an lua pea, Basan rêng Oga ram khom an lua pe saa. Hi Amor rêng inhnihai hi Jordan dung sak tianga om a ni.
48An ram lua pe chu Arnon dung irhôr chung, tânga om Aroer khua ram hi a ni. 49Jordan dung sak tiang ivakam phâi khom Tuipui Thi dênin tâng pang leh a huam a ni.
Currently Selected:
DÂN INHNINA 4: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
