2 THURCHI SUINA 10
10
Hmâr tianga nam tehelna thu
(1 Rng 12.1-20)
1Rehoboama chu Sekem khuaa a fea, kha khan rêng chang hrangin Israelhai, hmâr tianga omhai chu an lei irbukkhôma. 2Nebata nâipa Jeroboama chu Solomona chiin Aigupta rama a rota, a thi thu an hriatin chu a hong kîr nôka. 3Hmâr tianga Israelhai an va pana, Rehoboama kuang khan an fesuama, an kuang, 4“Ni pa khan a sate’n a ni len nang ngaia, kin puak a nin riktir pe ok ngaia, nangin chu ni nin nang khomin kin phur nin zângtir pe’n lân, ni khua le tuia om kin ti,” an tia. 5Ama khan an kuang, “Sûn thum zoia hong nôk unglân,” a tia, khanchu mihai kha an fe tâka.
6Reng Rehoboama chu a pa Solomona dam laia a kôla om ngai ulianhai ar donhaia, “Hi mihai hi itin mo ti pehai inlân nin ni tipui?,” a tia. 7Anni’n chu, “Hi mihai chunga hin khonzâna neiin lân, satakin chongpuihai ro, kumtuangin ni mi ni an ti,” tiin an sâma. 8Ulianhai iti kha irngai nuam loiin, ruatharte, ama rualhai kha ar donhaia, 9ni pa khan kin puak a nin riktir pe hi nin zângtir pe ro, hong tihai hi itin mo ti pehai inlân sa ni?, a tia. 10Ama rual ruathartehaiin, “Hihai hi ni pa’n kin puak a nin riktir pea, khasikin nangma’n chu kin puak nin zângtir pe ro, tihai hi, hiang hin ti pehai ro, ki kutte khom hi ka pa lampui nêkin ngar ual a ti, 11ka pa khan nin puak a inriktir ok a ni’n chu keima’n chu bôk sa nôk ki ti; hrui leh vîkna tonghaiin keima’n chu âinuvêt leh nangni hrem ki ti, ti ro,” an tia.
12Sûn thum zoia chu Jeroboama le Israelhai chu Rehoboama kuanga a ihril angin, an honga. 13Rengin ulianhai chongbe kha irngai nuam loiin mihai kha inhram takin a chongpuihaia. 14Ruathartehai chongbe angin Rehoboama’n, mihai kuang, “Ka pa khan nin puak an riktir hrai ma ni? keima’n bôk sa nôk ki ti. Hrui leh vîkin nangni a hrema, keima’n chu âinuvêt leh nangni hrem ki ti,” a tia. 15Rengin mipuihai thu irngai nuam loiin Silo mi deipu Ahija kuanga Nebata nâipa Jeroboama chungchânga Pathianin a iti kha Rengpa’n hlo a inchuktir theina hrangin Pathianin a intitir a ni.
16 #
2 Sam 20.1
Israel mihaiin rêngin an thu a irngaitua pehai loi a nih ti an inhriatin chu, hiang hin an tia.
“Davida rama imo dongtum kin neia? Jesaia irchihai lai ata dongtum i ual mo kin nei? Davida irchihai chu an omin om ri sehai,” an tia. Israel mihai chu anni in tiang an fe tâka. 17Judai rama om Israel mihai chunga vai khan Rehoboama chu an lal tâka. 18Reng Rehoboama’n Hadorama, sintho inphûthai pâl hruaitu chu Israelhai koi hrangin a va tîra, anni’n lung leh an lei dêng thata. Khasika khan Rehoboama chu a sakor tâlia khan a va chuanga, Jerusalema an tân tâka. 19Khataka irthokin Israel mihai chu Davida irchihai lai ata atûn ten hin tehel an izong tâk a ni.
Currently Selected:
2 THURCHI SUINA 10: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.