1 THURCHI SUINA 26
26
Tempila pulis
1Levi irchia, tempil pulis a ihmang mi da danghai chu hiang hin a ni. Kora irchi laia mi Kora nâipa, Asafa in mihai laia mi Meselemia khan 2nâipasal sari a neia, a ulian dônin hihai hi an ni, Zekaria, Jediaela, Zebadia, Jathniela, 3Elama, Jehohanana le Eliehoenaia. 4#2 Sam 6.11; 1 Tsn 13.14 Obed-edoma khom Pathianin sat a vura, nâipasal sari a neia. A ulian dôna irziakin Simeia, Jehonadaba, Joa, Sakara, Nethanela, 5Amiela, Isakara, Peulethaia hai, 6Obed-edoma nâipasal ulian tak Semaia hai nâi kiruk Othnia, Refaela, Obeda, Elzabada, Elihua, Semaia hai an nia. 7An irchihai laia mi ingîk, mi isong tak tak an ni. A nâipang ual inhnihai vâng hi chu mi hrât ichiom tak an ni. 8Obed-edoma irchihai ata anni sinthoa fel tatak mi sômruk inhni an om. 9Meselemia irchi laia mi hlo chuk sômhleiriat an om. 10Meraria irchi Hosa’n nâipasal minli a neia, Simria, 11Hilkia, Tebalia, Zekaria hai. Hasa irchihai laia tempil pulis sômhleiringa an om.
12Tempil pulishai chu an irlo fe dân angin pôl da dangin an oma, Levi irchihai ang dênin tempila sintho hrang zoro an indang pehaia. 13A tha tin tam le tôm thu ni loiin, khô mikot kha mo an ihrung hrang ti inhriatna hrangin tâ an sân ngai. 14Selemia haiin nisua tianga mikot an changa, a nâipa Zekaria’n hmâr tianga mikot a changa, Zekaria hi roirêl pôlhai laia vâr tak a ni. 15Obed-edoma haiin sim tianga mikot an changa, a nâihaiin tempila thil siakhômna in kha an changa. 16Supima le Hosa chu nitâk tianga mikot an changa, lampui kôla Saleket mikot an iti khom an hrung sa. Sin chu an irsem irhlôm ngai a ni. 17Nisua tianga mikota khan a sûn tin mi kiruk an ngîr ngaia, hmâr tianga khan mi minli, sim tiang khom mi minliin an hrunga, thil siakhômna hrung khom a sûn tin pasal minli, thil siakhômna inkhat hi mi inhniin an ihrung ngai a ni. 18Nitâk tianga tentan hai, lampui kôla mi minli, tentan sûnga mi inhni an siahaia. 19Ama hi Kora le Meraria irchihai hrung hranga a ni.
Tempila sin dang
20Levi irchi, mi senkhat chu tempil tholôm kok le thilpêk bukkhômna tentan enkoltu an ni. 21Gersona nâipasal inkhat Ladana chu ama nâi Jehiela irchihai le Gersona hai hruaitu tak a ni. 22A nâipasal hni Zethana le Joela’n tempil tholôm kok le thilpêk bukkhômna an enkola. 23Amrama irchihai, Izhara irchihai, Hebron irchihai le Uziela irchihai chôitum an tuk pehaia.
24Gersoma nâipa Sebuela, Mosia tupa chu tempil sum enkoltu lutak a ni. 25Gersoma urêngpa Eleazara sikin Selomit-hai le in sûng khat mi angin an oma, Eleazara’n Rehabia a neia, ama hin Jesaia a neia, ama hin Zikria a neia, Zikria hin Selomita a nei a ni. 26Selomita leh a nâihaiin rêng Davida, in sûng mi hruaitu hai le irchi da danga hruaitu le mipui hruaituhaiin Pathian hranga thilpêk irfuang hai kha an en infela, tempil sinna’n irdoinaa râllâk sumhai kha an hong ipêk ngai a ni. 27Selomita le a nâihaiin tempila hmang hrang mihai hong ipêk murdi an enkola, 28deipu Samuela hong ipêk hai, rêng Saula ipêk hai, rêng Davida ipêk hai le Nera nâipa Abnera ipêk, Zeruii nâipa Joaba ipêk hai khom an enkol sa a ni.
Levi irchi senkhathai tho hrang
29Izhara irchi laia mi Kenania le a nâihai chu khopui pên tianga ram opna sin an inthotirhaia, thurchi vong insa, Israel mihai thubuai an irfûktir ngai a ni.
30Hebron irchihai laia mi Hasabia le a in mihai mi sângkhat irzasari chu Jordan nitâk tianga optuin a siaa, sakhua le vântâng thil ngaitua ngai a ni. 31Hebron irchi hruaitu tak chu Jeria a ni. Davida rêng kum sômminlinaa Hebron irchihai thurchi kha an suia. Hi irchia mi sipai hrâttak tak Gilead bial Jazer khuaa an oma. 32Jeria urênghai laia rêng Davida in mi sânghni irzasari, hruaitu fel tak tak an thang suakhaia, Jordan tui nisua tianga bial sûnga, Reubena irchihai, Gada irchihai, le nisua tianga Manasea irchihai omna bial sakhua le khotâng thila optuin a sia ta.
Currently Selected:
1 THURCHI SUINA 26: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
