LUKE 21

Meithainu Thawhlawm Piek

(Mrk 12.41-44)

1Chun, Isu a dâk viel a, mi neizote’n Pathien Ho-In tuoklawm bawma tuoklawm a khiek lai u chuh a mu a. 2Chuleh, meithai, neilah tak, khatin paisa matiek nih a hun khiek chule a mu a. 3Tichun, a kawm u ah, “Tihtakzet a ka hilh na hiu hi, ziehaw chengcheng sang hin, zie meithai neilah cha hin a khie tam pên hi. 4A dang cheng hin, a neih val u apat tuoklawm a khiek uh ahi a; himahlele, amah hin chuh, a hinpih ding, a neih sun chuh a khiek zawh vek a hii,” a ti a.

Pathien Ho-In Sietna ding a Genna

(Mat 24.1-2; Mrk 13.1-2)

5Chun, kuote ahim in, Pathien Ho-In chungchâng leh, a hawih dân leh, a suong hawihdante leh, Pathien kawma thilpiek hawihtak taka kizêm a hih thu a gen lai tak un. 6“Zie na thil muh teu hi, sukchip loh a suong kitieng himhim taka hin um puo’n a, khutibang ni chuh hung tung ina,” a ti a.

Buoina leh Sukgimtheihna

(Mat 24.3-14; Mrk 13.3-13)

7Chun, amau chun a kawmah, “Sinsakpa, ziehaw chuh bangtik leh a hung um die leh? Ziehaw chuh a hung tun ding kuo’n leh melchikna banga um ding?” ti’n a dawng u a. 8Isu chun, “Chingthei unla, thep in um kiu un. Mi tamtakin, ‘Krista chuh ka hi, a hun tung ding ei tai,’ ti’n ka min in hung un au! Himahlele, amau haw chuh zui kiu in. 9Kido thu leh buoina thu na zak tieng u leh, lau kiu; ziehaw chuh a tung masa ding him ahi, tawpna vang chuh tung zieng tadih puo’n a,” a ti a.

10Chun, a kawmah, “Nam chuom leh nam chuom kido untin, gam chuom leh gam chuom kido un au. 11Leiling nasatak in kilîng intin, mun chuom chuom ah kiel um intin, hipi le leng ina; van apat in thil danglam taktak leh tizat-um tak tak hung um ina. 12Himahlele, zie thil haw a hungtun masang chun, hun man untin, hun sugimthei untin uh; kikhawpna In ah na chung thuu tan dingin hun pie dawk untin, suongkul ah hun khum un au; ka min ziekin lengte leh vaihawmte masangah hun pui un au. 13Chun, zie chuh nang haw dingin, tiemtehna hi’n a. 14Khutichun, na dawnna dingun ngaihtuoh khawl masa lo dingin ching thei un, 15na melmateu chengcheng in, a hun do dîl u a, a hun niel theih lohna ding, kam leh chitna hun pie ding ka hi ngâl a. 16Chuleh, na nu leh na pateu, na suohpih teu, na In sak na inthangteu, leh na guol teu inle hun matsak un tin uh; abang hun that un au. 17Chun, kei ziekin mi chengcheng muhdah in um un lau. 18Himahlele, na luchang u a na samzang khat u le mangthai puo’n a. 19Det takin dingun, tichun, na thuokhat nau in na hinnau hukbit un lau.

Jerusalem Sietna Ding Genna

(Mat 24.15-21; Mrk 13.14-19)

20“Amahvang chuh, sepaihte’n Jerusalem a hun ûmkimvel tieng u leh, mangthai ei tai, tih heu in. 21Zie tieng chuleh, Judia gama umte chuh tânghaw achun tai mang u he’n; khawpi a umte chun taih dawk san u he’n kuole gama umte chule khawpi ah tai lut diek kiu he’n. 22Zie nihaw chuh ‘Phuba lak ni’ hi ding ahi, Pathien lehkhathu a kizik chengcheng a tunkimna dingin.#Hos 9.7 23Zie nihaw achun gai leh chasen pawmte chung chuh gik ina! Khawvela hin gimtheihna nasatak a tun ding ziek leh, zie mite chunga hi Pathien gawtna a tun ding ziekin. 24Khenkhatte chuh chemzâma thah in um un na tin uh, khenkhatte chuh, namtin kawma sala puih in um in tin uh; tichun, Jentel te ni a bukim masang sieh, Jerusalem chuh Jentel te tawh den in um ina.

Mihiem Chapa Hungkit na Ding

(Mat 24.29-31; Mrk 13.24-27)

25“Chun, Nisa ale, tha ale, aksi te akhun, melchikna hung intin; Tuisuohgiet kinawk thawm ziek chun, lei chunga gam chengte chuh beidawng a lau leh kilîng in um un au.#Isa 13.10; Ezk 32.7; Jol 2.31; Thp 6.12-13 26Mipite chuh, lei chung pumpi a thil hungtung ding ziek chun lau in thidang untin, vanthamzawl a thilhih theihna umte chuh, suklîng in um ina. 27Zie tieng chuleh, Mihiem Chapa hi thilhih theihna leh lopina nasatak tawh mei laka hung mu ding na hiu hi.#Dan 7.13; Thp 1.7 28Zie thil haw chuh a hung tun kipat tieng chu leh, ding dawk unla, dâk to un, na hukdamna niu chu a naih tâk ziekin,” a ti a.

Theipi Kung Apat Tehkal thu

(Mat 24.32-35; Mrk 13.28-31)

29Chun, Isu’n a kawm u ah zie tehkal thu hi a gen a: “Theipi kung leh thing dang cheng chengte hi en un. 30A nah hung sel dawk na muh tieng u leh, nipi hungtung ding ahi tai tih na heu hi. 31Zie tawbang mah chun, zie thil haw hungtung na muh tieng u leh, Pathien gam chuh a hung nai tai tih heu in.

Kigin zing a Pawimawhna

32“Tihtakzet a ka hilh na hiu hi, zie thil chengcheng hi a tunkim masang sieh, tulai khang thakte hi, mang puo’n a. 33Lei leh van mang intin, himahleh, ka thu vang chuh mang puo’n a.

34“Amahvang chuh, chingthei un! khutilochun, nek vah tâk luot tawh, zukham tawh, damsung khawsak ngaihtuohna tawh, na lungthim uh dim val taluo kha’n tin; zie Ni chu leh, thang âwk guolin thakhat in, na chungu ah hungtung phut ina. 35Thâng pel bangin lei chung pumpi a mi cheng chungah tung ding ahi ngâla. 36Zieziekchun, zie thil hungtung dingte chuh pel tâk leh Mihiem Chapa masanga ding tâka guot na hih theihna dingun, bangtik lai inle paucham kawmin khawningai un,” a ti a.

37Chun, amah chun sun leh Pathien Ho-In ah a sinsak sek a, nitâk lam leh a pawt a, zan leh olive tâng achun a giek sek a. 38Chun, zingkal leh, mipite chuh Pathien Ho-In ah, a thugen ngaitha dingin, a hung khawm sek u a.

Currently Selected:

LUKE 21: GANGBSI

Highlight

Copy