LUKE 20

Isu Thuneihna Dawtna

(Mat 21.23-27; Mrk 11.27-33)

1Chun, tihi a hung hi a, Pathien Ho-In a mihaw a sinsak a, Chanchin Pha a gen lai in, Thiempuliente leh Danthuzikte leh, upahaw chuh a hung phut u a. 2a kawmah, “Kuo thu a zie thil haw hi na hih? Kuo thu hun pie? Kei uh nei hilh ah,” ti’n a hung dawng u a. 3Isu’n a kawm u ah, “Ken le nang haw thu kam khat hun dawng ing ka, nei hilh un, 4Johan baptistma kha van a kipan ahim, mihiem a kipan,?” ti’n a dawng a. 5Ziephet chun, amau haw chuh a kingaihtuoh tau a, “Bang I gen ta ding u? Van a kipan tileu hing la, ‘Bang zieka Johan gingcha lo?’ ti’n tin. 6‘Mihiem apat,’ ti leuhing la, zie a mipi chengcheng hin, Johan chuh thiemgau ahi tih a pawm chiet ziekun suongin ei sep un tin,” a tiu a. 7Tichun, a kawmah “Khawilam zaw thu ahih ka he puou hi,” a tiu a.

8Ziephet chun, Isu’n a kawm u ah, “Ken le kuo thu’na zie thil haw hi ka hih, nanguh hun hilh diek puo’ng ka,” a ti a.

Grep Huon Tehkal thu

(Mat 21.33-46; Mrk 12.1-12)

9Chun, Isu’n zie tehkal thu hi mipite kawm achun a gen a: “Kuo a him in Grep huon a bawl a, a ngakte kawm achun thawhlawh dingin a pie a, sawttak châm dingin gam dangah a chieh san ta a.#Isa 5.1 10Tichun, a gah lakkhawm phat a hung hih phet chun, huon a gah chuh a chanvo a na piek dingun, a ngakte kawm achun suok khat a sawl a. Himahleh, a ngakte chun a na zêp u a, khut ngawnin a sawl kit tau a. 11Khutichun, suok dang khat a sawl kit a, zie chule a na zêp kit u a, zahhuoi takin a na bawl u a, khut ngawn mah in a sawl kit zel tau a. 12Chun, a thum tinna a sawl kit a; zie chule, a ngakte chun a na hihliem u a, a paih dawk tau a. 13Ziephet chun, grep huon neipa chun, ‘Bang ka lawh ta die aw? Ka chapa deihtak hi sawl mai ing ka; amah hi a na zah tei un au!’ a ti a. 14Himahlele, a ngakte chun amah chuh a na muh phet un, ‘Zie pa hi go luoh ding chuh ahii; that hitiu, tichun, a go cheng chuh eihaw a ding hi’n a!’ a kitiu a. 15Tichun, grep huon apat chuh a delhdawk u a, a that tau a.

“Ahih leh, grep huon neipa chun ziete chung achun bang a hun hih ta die leh?” ti’n Isu’n a dâwng a. 16“Hung intin, a ngakte chuh that intin, a grep huon chuh huon ngak dangte kawmah pie’n a,” a ti a.

Mipite chun zie chuh a zak phet un, “Ziehaw lâwm lâwm chuh tung kihen!” a tiu a.

17Isu’n amau haw chuh a en a,

“Zie Pathien lehkha thu umzie hi bang ahi?

‘In sate suong deih loh kha,

zie mawng chuh a ning a suong phachuom pên a na hi, a tii,’ tih hi.#Sam 118.22

18Kuole, zie suong chunga puk ta chuh, phieh gawp intin; chun, a delh khâk vang chun, gawt nêl dimdem ina,” a ti a.

Sieh Piek Thua Dawtna

(Mat 22.15-22; Mrk 12.13-17)

19Chun, zie lai tak chun dân thuzikte leh thiempu liente chun, tehkal thu chuh amau haw kawknaa a gen ahi tih a het ziekun Isu chuh zie mun achun mat a guou a, himahlele, mipite chuh a lau u a. 20Khutichun, hun lemchâng a hawl tau a. Tichun, mi huntieng, mipha tak hileh kilawm taka va um dingin a gawlhguu a; Isu chuh Rome gam vaipawpa thuneihna leh, thilhih-theihna khuta a piek theihna ding u a, a thugen khiel chângtha ding leh, man dingin a sawl tau a. 21Chun, amau chun a kawmah, “Sinsakpa, na thugente leh sinsakte hi a dik hi tih ka heu. Nangin mihiemte khenchuom nei lo in, mihingte a dinga Pathien thil deih chuh, diktakin na sinsak sek hi, tih le ka heu hi. 22A leh, keihaw’n Kaisar kawma sieh ka chawih uh a thieng hi, thieng lo?” ti’n a dawng u a.

23Himahleh, Isu chun, a lungthimbawl ui tih a he a, a kawm u ah, 24“Dangka chuh ei hun etsak tiem u,” a ti a. “Kuo lim leh kuo min a a chuong hih?” a ti a.

Amau chun a kawmah, “Kaisar,” a tiu a.

25Ziephet chun, Isu’n a kawm u ah, “Khutichu ahih leh, Kaisar thil haw chuh Kaisar kawmah pieu inla, Pathien thil haw chuh Pathien kawmah pie tau inla,” a ti a.

26Tichun, zie a mipite masang achun bangmah in a man thei ta puou a, a dawnna chuh maksa’n a thip kêi tau hi.

Thawhkitna Thua Dawtna

(Mat 22.23-33; Mrk 12.18-27)

27Chun, Saddukai, thawhkitna a um puoi tite laka kuote ahim Isu kawmah a hung u a, a kawmah, 28“Sinsakpa, Mosi’n hiti hin dân ei na zik sak hi: ‘Mi kuole, a suohpihpa’n zi nei hen la, cha nei lo in thi ta leh, a suohpihpa’n luoh intin, a suohpihpa ding chun suon a neih sak ding ahi,’ ti’n.#Dann 25.5

29“Aw le, pasal sagih a um u a, a upapen in zi a nei a, cha nei lo in a thi a. 30Zie chuh a nihna chun a luoh kit a, cha neilo in a thi kit a, 31chun, a thumna chun a kichênpih kit ta a. Khutibang chiet chun sagihte chuh cha nei lo in a thi vek tau a. 32A tâwp chun, zie numei chule a thi ta a. 33Khutichun, thawhkitna ni achun, kuo pên zi chuh a hi ta die? Sagihte chun la zi’n a nei chiet ngâl u a,” ti’n a dawng u a.

34Isu’n a kawm u ah, “Tulai khanga mite hi, zi leh pasal in a kineituoh sek u a, 35himahlele, thihna apat a thokit a, hun hung tung dinga hing taka guotte chuh, zi leh pasal a kineituoh kit ding ei ta puou hi. 36Vânsâwlchâkte bang hi tau intin, thi thei ding ei ta puou. Thihna apat a a thawhkit tâk ziekun, Pathien chate a hi zaw tau hi. 37Mosi’n le mithite a thawhkit dân uh, kichien takin a hetsak kha. Nawnglaka meikuong thu a khan, Lalpa chungchâng thu gen in, ‘Abraham Pathien, Isak Pathien, Jakob Pathien,’ ti’n a gen a.#Pdn 3.6 38Amah chuh mithi Pathien ahi puoh a, mihing Pathien ahi zaw ngâla, amah ngaih chun mi chengcheng a hing suok kêi ngâl u a.” a ti a.

39Danthuzikte khenkhat chun, “Sinsakpa, na gen dik zet nai,” ti’n a dâwng u a. 40Khutichun, bangmah a dawt beh ngam ta puou hi.

Krista Chung Thua Dawtna

(Mat 22.41-46; Mrk 12.35-37)

41Chuleh, ama’n a kawm u ah, “Krista chuh David chapa hi ding ahi bangti dana ti sek ahiu hi? 42Pahchakna Labu ah David ngêi in:

‘Lalpa chun ka Lalpa kawmah,

Na melmate na keng ngakna a ka siem masang sieh,#Sam 110.1

43Ka changlam ah chu’n,’ a ti ngâl a.

44David in amah chuh ‘Lalpa’ a tih ngâl chun, bangti’n a, a chapa a hih theih ding?” a ti a.

Danthuzikte Apat Kiveng un

(Mat 23.1-36; Mrk 12.38-40)

45Mi chengcheng in a thugen a ngaihthak lai u chun, Isu’n a sinsakte kawmah, 46“Dan thuzikte apat chun kivêng phau in; amau haw chun puonâk chuol âk a, dawl mun haw a zahum taka kiho chuh a deih chuom sek ngâl un; kikhawpna In a chutphah phapen leh, guolvakna a mun phapen a tel sek u a; 47meithaite sum a neguu a, mi thepna’n sawttak tak a paucham sek ui! Ziehaw gawtna chuh nasa zawsem ding ahi!” a ti a.

Currently Selected:

LUKE 20: GANGBSI

Highlight

Copy