LUKE 2

Isu Pienna Thu

(Mat 1.18-25)

1Chun, zie lai chun, Kaisar Augusta’n Rome gam a awpna sung pumpi achun, minzik ding thu a pie a. 2Zie chuh Suria gama Kurinias gamvaipuo a hih laia minzik na masapen chuh ahi.

3Tichun, mi chengcheng chuh a min uh zik dingin, amau khawpi chietah a chieh uh a.

4Chun, Joseph le, David inkawte leh suon a hih ziekin, 5Galili gama Nazareth khuo apat in Mari a zi huol gaiham set chu tawh, min zik dingin Judai gama David khawpi Bethlehem a tih u achun a chieh tau a. 6Chun, tihi ahi a, taka a um lai u chun, a nau neih hun a hungtung ta a. 7Tichun, nautil in chapa a nei a, chun, puon nem in a tuom a, khuolbûk a chuh amau dinga mun a um loh ziekin, gankuong achun a siel ta a.

Belam Chingte leh Vânsâwlchâkte

8Chun, zie gam mah mun khat achun, belam chingte khenkhat, belam chinga gama giek a um u a. 9Lalpa vânsâwlchâk a kieng u ah a hung kilak a, Lalpa lopina’n a kimvel uh chuh a hun khawh vak a. A lau mah mah tau a, 10Himahleh, vânsâwlchâk chun a kawm u ah, “Lau kiu inla, ngaiun, mitin a dinga Chanchin Pha kipah-um mah mah ka hun puoksak na hiu hi! 11Tuni hin nanguh dingin David khawpi ah Hukdampa chuh a pieng tai, Lal Krista chuh!#Mik 5.2 12Chun, ziehi nang u dingin melchikna ding ahi; nausen puona tuom, gan-an piekna kuong a kuol mu’n lau!” a ti a.

13Ziephet chun, thakhat in, vânsâwlchâk kawm achun van a mihaw, mipite chuh a hung kilang phut uh a, Pathien pahchak na la a hun sau a:

14“Chungnung pên ah Pathien lopi takin um hen la,

Lei chunga a kipahna mah mah mihiemte kawmah cham thu leng hen!”

a tiu a.

15Chun, tihi ahi a, vânsâwlchâk chun van lama a taihsan kit phet chun, belamchingte chun, “Tuhin, Bethlehem khuo tiengin. chieh hi tingun, Lalpa’n thu ei hilh hungtung chuh en hitiu,” a kitiu a. 16Tichun, a chieh mengmeng uh a, Mari leh Joseph chu tawh, gan-an piekna kuong a nausen kuol chu tawh a va muu a. 17Chun, belamchingten amah a va muh phet u chun, nausen chanchin vânsâwlchâk in a kawmuh a a gen khah amau haw a hilh tau a. 18Belamchingte thugen za taphawt chun mak a sa tau a. 19Mari chun vang zie thil chengcheng chu a hezing a, a lungthim in nasatak in a ngaihtuoh a. 20Chun, belamchingte chun, vânsâwlchâk hilh guol ngeia bangakai a muh-uh a, a het ziekun, Pathien pakcha kawma lasa’n a vaikit tau hi.

Isu Pathien Ho-In a Puihna

21Chun, a zektanna ding ni giet a hung tin phet chun, a min dingin, sûl a a um ma apat vânsâwlchâk in a na gen sa, ISU a sau a.#Tpd 12.3

22Chun, Mosi dân guola a kithiensakna ding niu a hungtung ta a. Khutichun, Lalpa dân thu a kizik: “Cha pasal sulhawng taphawt chuh, Lalpa dinga thiengtho hiding ahi,” tih zik guol khan.#Tpd 12.1-4 23Lalpa kawma piek dingin Naupang chuh Jerusalem ah a pui tau a.#Pdn 13.2, 12 24Chuleh, Lalpa dân thu a kizik guolin, vakhu tuok khat ahim, vapal no nih ahim kithawihna ding a lân dingin a chieh u a.#Tpd 12.2-8

25Chun, ngaitie, zielai chun mi khat, Simeon kiti chuh Jerusalem achun a cheng a. Zie pa chuh mi takkhan tak leh, Pathien ngaihsak tak ahi a, Israel te lungmuontu ding chuh ngak in a na um zing a. Thagau Thiengtho in a umpih zing a, 26Chun, Lalpa tiem, Krista chuh a muh masang sieh thi puo’n a, ti’n a na tiem ta him a. 27Chun, Thagau puih in Pathien Ho-In ah a va lut a. Nausen Isu chuh a nu leh a pa’n, dân ngeina guola a chunga hih dinga a hun puih lut lai u chun ana pawm a, Pathien a pakcha a, 28Simeon chun a khut in a na pawm a, Pathien kawmah kipahthu a gen a:

29“Lalpa tuhin, na thu guol zelin,

Na suok hi lungmuong takin chieh sak ding na hi a!

30Na hukdamna, mitin muh a na siem khah,

31Ka mit in a mu ta ie:

32Jentel te salhvak ding vak leh,

Na mi Israel te lopina ding chuh!” a ti a.#Isa 42.6; 49.6; 52.10

33Chun, a thugen chuh nausen nu leh a pa chun mak a sa ten tau a. 34Khutichun, Simeon in amau chuh a vangsak a, a nu Mari kawmah, “Ngaiin, zie nausen hi Israel te laka mi tamtak pukna ding leh, dindawkna dinga guot ahi; melchikna haw niel dingin tawh,#Isa 8.14, 15 35Ahi, nang lunggil le chemzâm in sunlet ina; mi tamtak in a lunggil u a a ngaihtuoh hawu chuh a lat na dingin.”

36Chun, mi khat amin Anna kiti, thiemgau Phanuel chanu, Aser nam a mi a um a; amah chuh têk tak ahi ta a, a nungak thatin apat a pasal kawmah kum sagih a um a, tuhin kum sawmgiet leh kum li a meithai a.#Châng 36 na ahi, “Kum sawmgiet leh li meithai a hi tai” tihna le ahi thei hi. 37Amah chun Pathien Ho-In taihsan lo hiel in, asûn-azan in anngawl banga paucham in Pathien a ho seka. 38Chun, zielai tak chun amahnu chuh a hungtung a, Pathien kawmah kipahthu a gena, Jerusalem khuo tatna ding kinem taphawtte kawm achun Isu chanchin chuh a gen ta a.

Nazareth Khuo a a Kilehkitna

39Chun, Lalpa dân guola thil chengcheng a hih zawh phet u chun, Galili gama, amau haw khuo Nazareth achun a kilehkit tau a. 40Tichun, naupang chuh a hung khang lien a, a hung hât deuh deuh ta a: chitna’n a hung dim ta a, Pathien vangsakna chuh a chungah a um a.

Isu Pathien Ho-In ah

41Chun, kum cheng leh Chiehkân Kut mang dingin a nu leh a pa chuh Jerusalem ah a chieh sek uh a.#Pdn 12.1-27; Dann 16.1-8 42Chun, Isu chuh kum sawm leh kum nih a hihin, dân ngeina guolin, guolvakna achun a chieh u a. 43Chun, kut a kichaih phet chun, in lama kilehkit dingin a kipan tau a, himahleh, naupang Isu chuh Jerusalem achun a um den ta a; a nu leh pa chun zie chuh a he puou hi. 44Khutichun, a lawite laka um kha sa’n, ni khat lam a chieh nung un, a inkawteu leh, a guolteu lak chuh a hawl tau a. 45A muh loh phet u chun, hawl kawm zelin, Jerusalem lam ah a vaikit tau a. 46Chun, tihi ahi a, a ni thum ni chun, Judate sinsak haw laka chu a, a thuu na ngaitha a, dawng humhal in a va muu a. 47Chun, a thu za ta chun, a dâwn thiem dante chuh mak a sa tau a, 48Chun, a nu leh a pa chun amah chuh a muh phet un mak a sa ten u a, tichun, a nu’n a kawmah, “Ka chapa bangtia hiti a hih nei bawl ahim? Ngaitie! na pa leh ken lungdawng taka ka hung hawl uh ahi,” a ti a. 49Chun, amah chun a kawm u ah, “Bang dinga ei hawl na hiu hi? Ka pa In a ka um ding hi, na he puou a ahim?” a ti a. 50Himahlele, a kawm u a a thugen chuh a ngaihna a he puou hi.

51Khutichun, Isu chuh amau haw chu tawh, Nazareth khuo achun a chieh khawm tau a, a thu thuu in a um ta a. Chun, a nu chun thil cheng cheng chuh a lungthim in a vawp zing a. 52Tichun, Isu chuh taksa leh chitna lam achun a khang lien deuh deuh ta a, tichun, Pathien leh mihingte deihsakna a chang deuh deuh ta a.#1 Sam 2.26; Tch 3.4

Currently Selected:

LUKE 2: GANGBSI

Highlight

Copy