LUKE 8

Jisu ni khusi dangriyaba

1Khaisa yaohon ha, Jisu Galili rajini nolei gede khasi ha Madai ni graojma hamba khe sainthi mane thang ba. Ode boni rikphayarao jhiginbo bo jang baosi rikpha ba. 2Odehe masainjikrao gejesi bese gusu gajaoyarao ar limthai sathai ni phrang khrip ham rijaoyarao bo jang rikpha ba. 3Herod ni rangkhoh raokhiya, Chuza ni bihih Joanna ar Susanna ar gibin masainjikrao bo jang rikpha ba. Bo subung buthu bonsi jarni rang jang Jisu ar boni rikphayarao khe boni khusi ha juru re.

Maimu saiyaba ni daogari

(Mt. 13.1-9; Mk. 4.1-9)

4Subung buthu boni ha githim phaiba ha, ode gibin gibin nolei ni phrang phaiyarao phaiba ha, Jisu daogari grao jang bonsi ne grao sainthi ba.

5Subung saosi maimu saimane thang ba. Saipha langba ha gejesi lama bijing ha grai ba. Subung buthu bo khe gasep ba, ar dao buthu phai hi khon jithar ba. 6Ode gejesi longphlai basao ha grai hi, srap basla bre ba. Thikhabo, hah bangya bani mai rain kha. 7Gejesi busuling ha grai hi, busuh jang mai khe dip phung thar kha. 8Ode gejesi hah hamba ha grai dada, mai juphai hi dephai hi, phantha jang rjasi thai kha.

Daogari ni nangthai

(Mt. 13.10-17; Mk. 4.10-12)

9Boni rikphayarao, Ebo daogari grao la sumjadi? thihi Jisu khe sing ba. 10Bo bonsi khe thi ba, Madai ni raji ni grao huikhaoyaba khe tharmai phu mane nisi ne ri du. Thikhabo, gibin subung raone de daogari grao jang se sainthi ba. Ar bonsi mai kha bo nuya mane, ar khna kha bo khmao hapya mane.

Maimu daogari thiphlayaba

(Mt. 13.18-23; Mk. 4.13-20)

11Daogari grao de edehe: maimu de Madai ni grao se, 12Lama bijing ha graiyaba de, grao khe khnayarao se. Bonsi lonya mane ar sogo jaoya mane Diabol phaihi bonsini khah bising ni phrang grao khe lang la re. 13Longphlai basao ha graiyaba de, sere grao khe khna dada, khaja sisi ajaoyarao se. Thikhabo, bonsini yader giri bani, phongsi ni khlai hi se ning lon ba. Ar bonsi niha naigrik sophai kha ning bonsi galai phin re. 14Busuling ha graiba thiyaba de, bonsi grao khe khna kha, thikhabo sagang gede thangpha langba ha, waimu jang habsaoni gnang bonsi khe dip phung kha, suk jang dong mani baoma ha gablai hi bathai thaiya hi thao la kha. 15Hah hamba ha graiba thiyaba buthu grao khna hi, hamsisi khah gibi jang dukhu soi hi bonsi bathai thai re.

Thaophari ni phrang slingthai

(Mk. 4.21-25)

16Saosi bo thaophari phnang hi, mudik jang khlip phungya ar thuyam ni bakhla ha bo dengya, hapsing phaiyarao si jdanma khe nuphu mane dengthan ha se deng re.

17Odebani, bajiha phlaya hi, hui hi deng mane musibo giri; mithiya hi nujaoya hi dengmane musibo giri.

18Bedehe nisi khna ba, girik lah, sere niha dong bonthane baosingma se, sere niha giri, dongyaba khe bo boni phrang lang lama se.

Jisu ar boni daphlungrao

(Mt. 12.46-50; Mk. 3.31-35)

19Odehe, boni daphlungrao boniha phai ba. Thikhabo, subung bang bani boni ha sohi phuya. 20Subung sereba Jisu khe thi ba, Nini buma ar daphlungrao ning jang goron laima nangjao du, baji ha jon hi dong ba.

21Jisu bonsi khe thiphin ba, “Ani buma ar daphlungrao la sere Madai ni grao khe khna dada mani re, bonsi se ning ani buma ar daphlungrao se”.

Jisu baryungma khe mathao ba

(Mt. 8.23-27; Mk. 4.35-41)

22Bo bubli ha, sainsi de jarni rikphayarao jang rung ha gakhu hi bonsi khe bo thi ba, Tha, jing dih nar gede bailang nang, thihi bonsi thang ba. 23Bonsi rung ha gahi thangsai ba ha bo thu ba. Dih kharnai ha baryungma phai hi, bonsini rung ha dih gablai didih jahi, khinthao sisi ja ba. 24Boni rikphayarao boni ha thanghi bo khe thi ba, Slingriyah, Slingriyah, jing de thi tharma ja kha.

Jisu baija hi bar jang dithon khe jo ba. Boha ning phirik phirik thaolang kha. 25Bo bonsi khe thi ba, Nisi ni lonma braha dong ba?

Bonsi khin hi gmang ba, ode bonsi saosi jang saosi thilai ba, Ebo subung la sere kho? Bo bar jang dithon khe jokha ning boni grao khe mani du lao!

Gerasin raji ha sophai ba

(Mt. 8.28-34; Mk. 5.1-20)

26Odehe, Jisu ar boni rikphayarao Galili dihkharnai nar bailang hi Gerasin haphai ha sohi ba. 27Jisu rung ni phrang akhai ba ha miyah subung saosi rih giri sgo gajaoyaba khe goron ba. Bo noh habo dongya, mangkhlong ha se dongbai re. 28Bo Jisu khe nuba jang bol jang jirik khao hi boni ha blip pha hi thi ba, Jisu, judaothaoyaba Madai ni basa, ang khe sumjadi khlai ma nangjao ba? Nini ha ang bi la du, ang khe dukhu da ri. 29Bo subung ni bising ni phrang baigo mane khlai hi Jisu sagang ha bese gusu khe grao riba. Thikhabo, alang alang bese gusu bo subung khe rem ba, ar subung buthu phatho ha sikhol jang khahi deng khabo, saso hi hajengling ha bo khe bese gusu ri khlai re.

30Ode, Jisu bo khe sing ba, Nini bumu sumjadi?

Bo thiphin ba, Ani bumu bangbi, bede thikha de boni bising ha sgo sgain gabang ning dong ba. 31Sgo sgain buthu hakhor khithu giriyaba ha bonsi khe haihaya mane Jisu niha khainsu ba.

32Hading basao ha hono buthu dolsi, gabang sam jibaihi dong ba. Ode sgo sgain buthu hono ni bising ha hap mane Jisu niha khainsu bani bo grao ri ba. 33Ode sgo buthu bo subung ni phrang baigo langhi hono ni bising ha hap hi ba jang hono buthu khaikhlai langhi harang bakhla ni dih wari ha galaising hi thithar ba.

34Hono raokhiyarao olei jaba khe nuba jang, ode bonsi khaipha langhi nolei ha ar sere bere haphai buthu ni subung buthu niha sainthi ba. 35Subung buthu jathai khe nai mane phaiyarao Jisu niha sophaiba ha bising ni phrang sgo baigo langyaba subung, Jisu ni igah gabasi ha khamba khe nuba jang bonsi khin ba. 36Sgo gajaoyaba hamphinba khe nuyarao khrip subung buthu niha sainthi ba. 37Gerasin rajini subung buthu hamsisi khin bani oraha ni phrang thangla mane Jisu khe bonsi khainsu ba. 38Bising ni phrang sgo sgain Bese gusu baigoyaba subung Jisu niha bi ba, Ning jang ang khe thangpha ri. 39Thikhabo, Jisu bo khe thi ba, Nini noh gede thangphin lah, nini basao ha Madai khusi dangyaba ni muima khe sainthi lah, thi hi bo khe haiha kha. Ode bo thanghi khrip nogor buthu ha, Jisu boni basao ha khusi dangriyaba khe sainthi ba.

Jaira ni bisik ar masainjik khe ham ri ba

(Mt. 9.18-26; Mk. 5.21-43)

40Odehe, Jisu phaiphin ba ha, subung buthu khrip bo khaja ba, bede thikhade bo khe khrip bo jonhi dong ba. 41Boha ning sunagog ni hoja, Jaira thiyaba subung saosi, phai dada Jisu ni igah gabasi ha blip pha hi khainsu ba. 42Bede thikhade boni bisik maithai jhigin laiyaba, limhi thuyam ha thi didih jahi dong ba.

Ode Jisu thangba ha subung buthu githimlai hi dong ba. 43Masainjik saosi, maithai jhigin bithi thanghi dong ba. Boni ha dongba si Daktor raone rithar kha, thikhabo saosi bo ham ri phuya. 44Bo githim laiyarao ni gejer ha Jisu ni yaohon gede phai dada, boni rih bergong khe remba jang boni bithi thangyaba thao lang la kha. 45Jisu sing ba, Ang khe sere rem ba?

Khrip subungrao ang de niya thihi thi lai ba. Odebani Peter thi ba, Slingriyah, subung buthu ning khe nepha laiba se.

46Thikhabo, Jisu thi ba, Subung saosi ang khe remba se. Bede thikhade, khusi dangphuyaba raothai ani phrang baigo langba thihi ang mithi du. 47Bo masainjik hui phuya kha thihi mithi kha. Sao ther ther mao hi, phai dada Jisu ni igah gabasi ha blip pha dada khrip ni sagangha jar dopha bani grao jang bo hamphin bani grao khe sainthi ba. 48Jisu boni ha thi ba, Ani bisik, nini lonma ning khe ham ri kha. Shanti jang thang lah.

49Bo olei sainlai sainba ha Jaira ni noh ni phrang subung saosi phai hi thi ba, Nini bisik thih kha, Slingriyah khe dukhu da ri si.

50Thikhabo, Jisu bo grao khe khna hi Jaira khe thi ba, Da khin, lon se ning lon lah, bo hamphin nang.

51Noh ha bo sohiba ha Peter, Johan ar Jakob odehe ansa ni buma bupha khe garhi de saosi khe noh ha hap riya. 52Oraha dongyarao si, ansa ni khlai hi khrip bo bol jang gralai hi bonsi jarni khahbao do ba. Jisu bonsi khe thi ba, Da gra, ansa thihya, bo thuba se.

53Gibi ning thih kha thihi bonsi mithi bani bonsi khripbo bo khe minithai ba. 54Thikhabo, Jisu ansa ni yao khe rem dada, Nandi, baija lah, thi ba. 55Boni bese phaiphin hi, bo baija kha. Ode bone jimane ri thihi bo sani ba. 56Boni buma bupha hamsi ning gmang kha. Thikhabo, ebo jathai saosi niha bo da sainthi thihi bonsi khe magna ba.

Currently Selected:

LUKE 8: DIMASBSI

Highlight

Copy