LUKE 7
7
Siphaiya hojani leng khe ham ri ba
(Mt. 8.5-13)
1Odehe, subung buthu tharmai mane grao sainthi blaihi Jisu Kapernaum ha hap hi ba. 2Oraha dongyaba siphaiyarao rjasi ni hoja, boni leng maya nangyaba, limhi thi didih ja ba. 3Bo Jisu ni grao khe khna hi, boni leng khe ham rimane khlaihi Jisu niha khainsu mane boni ha dongyaba Juda khraorao khe haiha ba. 4Bonsi Jisu niha sohi dada boni ha khah jang muh jang khainsu ba. Ebo subung juru jao ja re. 5Bo de jini Juda jadi khe hamsisi maya nang du. Jini sunagog khe bo hamsisi dang riba, thihi bonsi thi ba.
6Odehe, Jisu bonsi jang thangpha ba. Ar noh ha sohi didih ha siphaiya ni hoja niha grao sainthi mane boni lugurao khe haiha ba, ar boniha thi ba, Gedeba, ning jar khe dukhu da ri. Ani noh ha ning hapsing mane gathaya. 7Odebani, ang nini ha phaima bo nangdaoya. Ning graothai rikha ning ani ansa hamphin nang. 8Ang bo malai ni bakhla ha donghi ani bakhla ha siphayarao dong. Ang saosi khe thang thikhade bo thang re, gibin khe phai thikhade, bo phai re. Ode ani leng khe ebo khusi khe dang ang thikhade, bo dang re.
9Jisu bo grao khe khnaba jang, hamsi ning gmang ba. Odebani, bo jang rikphayarao khe naiphin hi, bo thi ba, Israelrao ni bising ha bo elei lonma gnang khe ang nuya kho!
10Haiha jaoyarao noh gede thangphin kha ode leng bo hamphin kha thihi nu ba.
Nain ni banjik ni basa
11Khaisa yaohon ha, Jisu Nain thiyaba nolei ha thang ba. Boni rikphayarao ar subung buthu bo jang thangpha ba. 12Bo nolei ni daoglap ha sohi ba jang, subung githi, banjik ni basa, saosi mang mangyaba khe bainbu hi phai ba. Nolei ni subungrao bo thangpha ba. 13Bo banjik khe nuba jang hamsi ning bo khe khasaosisi jajao hi, bo khe thi ba, Da gra. 14Bo sampha hi dolei khe rem ba, bo khe bainyarao songthao kha. Jisu thi ba, Nagadao, ang ning khe thi du, baija lah. 15Githi subung baija hi grao jo kha, ode Jisu bo khe jarni buma ne ri kha.
16Subung buthu khrip bo khinseng hi Madai khe bakhan khlaihi thi ba, Madai jarni subungrao khe naiso mane jini bising ha gorasali dedaothao baigo kha lao!
17Jisu ni grao Judai raji ode boni sere bere haphai ha gublung thar kha.
Johan subung haiha ba
(Mt. 11.2-19)
18Johan ni rikphayarao ebo buthu khrip grao khe Johan niha sainthi ba. 19Odebani Johan jarni rikphayarao ni bising ha subung gini khe longha hi, Phaiginyaba ning ning, na gibin khe jing jon ma kho? thihi singmane Gabra niha haiha ba.
20Bonsi boni ha sohi dada, bonsi thi ba, Phaiginyaba ning ning, na gibin khe jing jon ma kho? thihi Baptisma riyaba Johan jing khe singmane nini ha haiha ba.
21Bo bubli ha Jisu limyarao sayarao gabang khe ham riba ode muthai ganarao khe muh nu ri ba. 22Odehe, Johan ni rikphayarao niha bo thi ba, Nisi thangphin hi, Johan niha nisi sumjadi khe nu ba, ar nisi khnayaba khe sainthi tha. Ganarao muthai nuphin kha, khorarao hemphin kha, khunthi jayarao ragaophin kha, nathongrao khnaphin kha, githirao baijaphin kha, dukhisarao niha hamba graojma sainthi kha. 23Asaba bo ani basao ha jajaoya jayayaba de boni khophal hambi!
24Johan subung haihayarao thangphin bani yaohonha subung githim laiyarao niha, bo Johan ni grao khe sainthi ba. Naithao sisi khe naimane sumjabani hajengling ha nisi thangba kho? Bar sib baha dobung maoyaba khe? 25Niya kha la, sumjadi khe nai mane thang ba? Rih miyao dudu phinhi sal khlaihi dongyaba khe? Nai lah, oleiyaba subung buthu de Rajani noh ha se dong ba. 26Niyakha la, sumjadi khe nai mane thangba kho? Gibi jang ang nisi khe thi du, gorasali khe naima ning thangba se thi! Bo gorasali thane dedaoyaba eraha dong. 27Nai lah, ani haiyasa khe nini sagang ha ang haiha du, bo de nini sagang ha ninthane lama slamhi deng nang thihi Madai ni laisi ha boni balam ha rebyaba de ebo Johan ning. 28Ang nisi khe thi du, masainjik ni phrang hajaiyaba ni bising ha, Johan tha dedaoyaba saosi bo giri kho. Thikhabo, Madaini raji hade subung khasi daothao bo Johan tha dedaothao ja phu du.
29Boni grao khe khnayarao khrip bo, ar khajna kharangyarao bo Johan niha baptisma jama ni khlai hi Madai gibi khe bonsi ajao la kha.
30Pharisairao ar Dara khe slingriyarao de Johan ni yao ha baptisma lamane nangjaoya. Bede thikhade Madai salai riyaba khe bonsi ajaoya.
31Jisu thisai ba, “Duha ni subung buthu sumjadi jang ang suthai hi thi nang kho? Gabang ning dubi lao? 32Bonsi de ansarao hathai ha khamlai hi, dolsi gibin dol niha, ‘Nisi ne jing jukhu bani muri dam ba, nisi la baiya lao. Ar grathai jang jing gra kha bo, nisi la graya,’ thiyarao lai se! 33Baptisma riyaba Johan phai ba, bo makham jiya, grep bidih bo lingya. Bo khe nisi thibu du, sao ha sgo sgain ni lugu se 34Marsini Basa phai ba, bo jidu ling du. Nisi thiphin du, Nai ha sang, bo subung de jiba raoyaba ar grep bidih lingba raoyaba khe ar khajna kharangyarao ar phaphirao ni lugu se thihi nisi thi du! 35Thikhabo, girikma de boni khrip ansarao bo khe gajai riya.”
Simon ni noh ha Jisu thao ba
36Pharisai saosi makham jimane Jisu khe jama ba. 37Bo nolei ha masainjik hamya khusi dangyaba saosi dong ba. Bo masainjik khna ba Jisu Pharisai ni noh ha makham khalai kham du thi hi. Odebani, alabastar thao midim khe bitholsi labu ba, 38Jisu ni igah gabasi ha songphai hi gra ba, ode boni mudithai Jisu ni igah ha serkhru thar ba. Ode boni khnai jang phusa ba. Ode boni igah khe khudim hi thao hu ba. 39Pharisairao bo khe nu dada, khah ha elei bao ba, Ebo subung gorasali gibi thikha la, bo khe dophayaba masainjik sere ar boni hamyathai khe mithima se mu!
40Jisu boni ha thi ba, Simon nini ha ang grao thaisi sainthima nang du.
Bo bokhe thiphin ba, Dei, thi sang, slingriyah
41Jisu bo khe thi ba, Rang jaoba riyaba niha subung gini lagai nang ba. Saosi denarion rjasi, saosi ne thodan lagai nang ba. 42Thikhabo, bonsi lagai khe bone suphin phuya hi thao ba. Odebani gini khebo bo map khlai kha. Ode thikhala bo sere khe maya nang dao?
43Simon thiphin ba, Sere khe bangdao hi map khlaiyaba, bo ja nang.
Jisu thiphin ba, Gibi grao khe ning thi kha dou. 44Odehe, masainjik ni gede naiha hi, Simon khe thi ba, Ebo masainjik khe ning nu kha? Nini noh ha ang hapsing hiba ha, ning de ani igah sumane bo dih riya. Bo masainjik de boni mudi jang ani igah khe su dada boni khnai jang rusa ba. 45Ning de ang khe khudimya, bo de ang sophai bani phrang thaoya si ani igah khe khudim ba. 46Ning de ani khro hah thao doriya, bo de ani igah buthu ha thao midim hu ri ba. 47Odebani, ang ning khe thi du, ebo masainjik khe maya gabang phnu mane boni phap gabang khe ang map khlai kha.
48Ode Jisu, bo masainjik khe thi ba, Nini phap dongba si khrip khe ang map khlai kha.
49Bo jang khalai khamyarao thilai ba, Bo sere ja nang, phap khe map khlai phuya ba.
50Jisu bo masainjik khe thi ba, Nini lonma jang ning khe sogo kha, shanti jang thang lah.
Currently Selected:
LUKE 7: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
