LUKE 6

Lenggo basain ha mailing sbaiyaba

(Mt. 12.1-8; Mk. 2.23-28)

1Lenggo basain ha mailing gejer ha Jisu baiso lang ba. Boni rikphayarao maiding sbai hi yao jang khuji phalang ba. 2Pharisairao gejesi sing ba, Sumjabani Lenggo basain ha dang thaoyayaba khe dang ba?

3Jisu bonsi khe thiphin ba, David jang boni lugurao makham hukhri jaoba ha, khusi dangyaba khe nisi phuriya? 4Bo Madai ni noh ha hap dada, Jonthairao khe garhi de gibin jiphuyayaba phnu riyaba hon khe lahahi ji ba. Ode boni lugurao ne bo riba niya?

5Jisu bonsi khe thi ba, Marsini Basa de Lenggo Basain ni Gabra se.

Yao adur jayaba subung

(Mt. 12.9-14; Mk. 3.1-6)

6Odehe, gibin Lenggo Basain ha Jisu sunagog ha hap hi bonsi khe slingri ba, ode oraha subung saosi yaoda ni yao adur dong ba. 7Dara khe slingriyarao ar Pharisairao bo khe gajai rimane, Lenggo basain ha ham ri du na riya thihi bo khe bonsi naidao ba. 8Thikhabo, Jisu bonsini baothai khe mithi hi, yao adur jayaba khe thi ba, Bai ja, ning eraha songphai. Boha ning bo baija hi song kha. 9Odehe, Jisu bonsi khe thi ba, Ang nisi khe sing du, Lenggo basain ha hamba khlai ma nang re na hamya khlaima nang re, sogoma nang re na sthaima nang re? 10Bo khrip khe naiding hi yao adur jayaba khe thi ba, Nini yao khe sugu lah. Ode bo sugu ba, boha ning boni yao ham lang la kha.

11Bonsi Jisu ni basao ha hamsi ning thamsi baigo dada, sumjadi khlai ma kho thihi sainlai ba.

Jisu jhigin khe saikho ba

(Mt. 10.1-4; Mk. 3.13-19)

12Bo bubli ha bo hading khro ha thanghi hor song Madai niha bi ba. 13Phorong nokha naihi bo jarni rikphayarao khe longthim ba. Ode bonsini bising ha jhigin saikho dada bonsi ni bumu khe Apostol thihi deng ba. 14Bo buthu ni bumu de Simon (Peter bo thi re), ar boni buphlung Andria, Jakob ar Johan, Philip ar Bartholomai, 15Matthew ar Thoma, Alphai ni basa Jakob ar Simon (Zealot ni dol ni subung); 16Jakob ni basa Juda ar bo khe rem riyaba Juda Iskariot thu se.

Jisu gabang subung khe ham riba

(Mt. 4.23-25)

17Odehe, Jisu jang boni rikphayarao hading ni phrang akhai bu dada, jarni rikphayarao jang haphlai ha song ba. Bo hathan ni subung buthu ar Juda raji ni phrang ar khrip hathan ni phrang ar sagor dergong nolei ni phrang ar Sidon ni subung buthu bojom japhai ba. 18Bo buthu de boni grao khe khna mane phaiyarao se. Ode bonsini limthai sathai khe ham rijao mane asa jang phaiyarao se. Ode saoha sgo sgain gajaoyarao se. 19Bo ni phrang khusi dangphu mane raothai baigo ba. Ode bo khrip khe ham ri ba. Odebani, khrip subung buthu bo khe dophama bao ba.

Hamthai jang bubain risiyaba

(Mt. 5.1-12)

20Jisu naiding hi boni rikphayarao khe nai dada thi ba,

Nisi dukhisarao, nisi ni khophal hambi,

Madai ni raji de nisi ni se.

21Duha nisi hukhri hi dongyarao, nisi ni khophal hambi,

Nisini hoh gablai nang.

Duha grayarao nisi ni khophal hambi,

Nisi mini mai nang.

22Marsi ni Basa ni khlai hi subung buthu nisi khe naisle kha bo, dangkhlai kha bo, jo kha bo, siji kha bo, nisi ni khophal hambi. 23Oleiba ha nisi khaja hi baithreng lah, bede thikhala nisi yaosandi mai mane sorgo ha thathi hi deng du. Bonsi ni phagarao gorasalirao ni basaoha olei ning dang ba.

24Nisi gnangrao, nisi ni bakho bubain risi bi

Nisi suk jang khajama mai blai kha.

25Duha nisi hoh gablaiyarao, nisi ni bubain risi bi,

Nisi hukhri mai nang.

Nisi duha miniyarao, nisi ni bubain risi bi,

Khah waimu jang nisi grama se.

26Nisi malai khe hamba sugu hi bakhan khlai kha bo, nisi ni basaoha bubain risi bi. Nisi ni phagara mosol gorasalirao ni basaoha bo olei ning dangba se.

Sotrurao khe hamjao lah

(Mt. 5.38-48; 7.12a)

27Thikhabo, nisi ani grao khnayarao, nisi niha ang thi du, nisi ni sotrurao khe hamjao lah. Nisi khe sere naisle du bonsi ni basaoha hamba khusi khe dang lah. 28Nisi khe sariyarao khe hamthai ri lah. Nisi khe dukhu riyarao ne Madai bi ri lah. 29Nini bakhaolei khe malai saikhaosi gede bakhaolei ri kha de, saokhaosi gede bo ajao phin lah; ode nini rih khe malai lala kha de nini sola khe bo ri lah. 30Niniha malai sain kha de, ri lah; nini jinis khe malai lala kha de, da sain phin. 31Madai nisi ni basaoha bede dang ma nangjao ba, nisi bo olei ning dang lah.

32Nisi sere khe khasao ba, bo khe se ning khasao kha la, bedehe hamthai mai ma? 33Nisi ni basaoha hamba khusi dangyarao ni basaoha se ning nisi hamba khusi dang re thikhala, bede khlaihi nisi hamthai mai ma? 34Maiphin mane asa jang lagai jaoyarao ne se ning ri re thikhala, bede khlaihi nisi hamthai mai nang? Phaphirao bo maiphin mane olei lagai jaoba ri re. 35Odebani nisi de jarni sotrurao khe hamjao lah, ode bonsi ham mane khusi dang lah; ar maiphin mane asa jayahi lagai ri lah, odese nisi hamthai ni yaosandi gabang mai hi judao thaoyaba ni sasik ja ma. Bo de khaja ba ringyayarao ode subung phaphirao khe bo khasao re. 36Nisi ni bupha khasaoba lai ning nisi bo malai khe khasao lah.

Malai ni balam ha bisar

(Mt. 7.1-5)

37Malai khe da musu lah, odese ning bo musu jaoya ma. Saosi khe bo gajai da ri lah, odese ning bo gajai rijaoya ma. Malai khe map khlai lah, odese ning bo map khlai jaoma se. 38Ri lah odese nisi bo riphin jao ma; bo suyaba bokhoh ha nesik dada gaphao si nisi maiphin ma.

39Ode, Jisu bonsine ebo daogari khe sainthi ba, “Gana jang gana de langsmai phu nang? Bonsi gini jang hakhor ha galaising nang niya? 40Slingyasa de slingriyasa tha dedaoya. Thikhabo slingyasa asaba bo sling blaikha de boni slingriya lai ja nang.”

41“Jarni muthai ha dongyaba malang khe nuyahi, nini daphlung ni muthai ni muphin khe bedehe ning nu ba? 42Jarni muthai ha dongyaba malang khe nuyahi jarni daphlung khe bede khlaihi nini muthaini muphin khe Ang khe khaikho ri lah thihi ning bede thiphu ba?”

Buphang ode boni bathai

(Mt. 7.16-20; 12.33-35)

43“Hamba buphang ha de hamya bathai thaiya, ode hamyayaba buphang ha hamba bathai thaiya. 44Asaba buphang khe bo bathai ha tharmai phu du. Busuphang ha thaikhrao bathai khaoya, dukha ha grep bathai khaoya. 45Subung hamba de jarni khah bising ni don bokhoh ni phrang grao hamba khe saiphlung re, ode subung hamya de boni khah bising ni don bokhoh ni phrang hamya grao khe saiphlung re. Ode khah ha gablaiyaba gaphaohi khuh ha jo re.”

Longthai gayaba magin

(Mt. 7.24-27)

46“Ani grao khe maniya hi sumjabani nisi ang khe Gabra, Gabra thi ba? 47Asaba sere ani ha phaihi ani grao khe khna dada mani re, beleyaba subung thihi ang nisi ne phnu nang. 48Bo subung jarne noh dang mane longthaima ha guthu jaohi longthai ni thong gaiba lai se. Dih dehi noh ha nang ba, thikhabo sbai phuya. 49Asaba bo ani grao tharmai dada grao khe maniya kha de, longthaima ha noh dangya hi, hah ha thong gaihi noh dangba lai se. Bo noh dih raokha ning dih nepha phai hi baithar langba lai se.”

Currently Selected:

LUKE 6: DIMASBSI

Highlight

Copy