LUKE 2

Jisu hajaiba ni grao

(Mt. 1.18-25)

1Bo bubli ha Kaisar Augasta, habsao raji khrip dongba si ha, khrip subung ni bumu khe rebkhu mane hukhum ri ba. 2Boha Suria raji ni Kurini latsap ni bubli ha bumu reb khu jen ba. 3Khripbo jar jar ni nolei ha bumu rebkhu jao mane thang ba.

4Odehe, Josepbo David ni sarik surik ar greng se bani Galili raji ni nolei masi Nazareth ni phrang Judai raji ni David ni nolei Bethlehem thiyaba ha, 5Jar ni bihih Mari, sao khonggin jayaba khe langpha hi, bumu reb khu jao mane thang ba. 6Bonsi oraha dongba ha ning hajai mani bublibo sophai ba. 7Ode, hajai jenyaba basa sagra mai ba. Bokhe rih merai hi mihrung ha thu ri ba. Bede thikhade naorai thaothan ha bonsi dongthan maiya.

Melma raokhiyarao jang sorgo deglarao

8Odehe bo raji ni hathan masi ha gejesi melma raokhiyarao hor ha jarni melma khe raokhi hi dong ba. 9Gabra ni phrang degla masi, bonsi niha songpha phai ba, ode sersi giding bonsi niha sring sring jdanpha ba. Odebani bonsi hamsi ning khin ba. 10Thikhabo degla bonsi khe thi ba, Nisi da khin ar khna lah. Ang khrip jadi ni khlai hi khaja sisiyaba hamba graojma khe labuba se. 11Dini ha nisi ne khlai hi David ni nolei ha sogoyah Gabra Krista hajai kha. 12Odehe, nisi ni khlai hi mithi mani sin ebo se, nana khe rih merai hi mihrung ha thu riba khe nisi nuhi nang.

13Boha ning, degla niha sorgo ni subung gabang nujao hi Madai khe edehe bakhan ri ba,

14Judaothao ni Madai niha muima ja thing

Ode, habsao habo hamjaoyaba subungrao ni basaoha milima dong thing, thihi bonsi thi ba.

15Deglarao sorgo ha thangla bani yaohon ha, melma raokhiyarao thi lai ba, Tha, jing Bethlehem ha thang nang, sumjadi japhai ba Gabra sainthiyaba grao khe naihi nang.

16Ode, bonsi srap thang hi, Mari jang Josep, mih ni ahar riyaba mihrung ha nana thu riba khe bonsi nuhi kha. 17Melma raokhiyarao bokhe nuba jang nana ni basao ha degla sainthiyaba graojma khe bonsi niha sainthi ba. 18Khnayarao si melma raokhiyarao sainthiyaba grao khe khna hi gmang ba. 19Thikhabo, Mari ebo grao buthu khe khrip jarni khah bisingha deng ba. 20Melma raokhiyarao degla bonsi niha sainthiba lai jasosi nuhi bani Madai khe bakhan rihi bonsi thangphin la kha.

Jisu ni bujuh rasoba

21Sainjai so ba ha, bujuh raso bani basain so bani, bo sathip ha dongyaba ni ha degla bumu dengma saniba lai bumu khe Jisu thihi deng ba.

Jisu khe bikhoh ha yaopha ba

22Odebani, Moses ni dara ha dongba lai bokhe thar mani basain sokha bani bokhe Jerusalem ha langpha hi thang ba. 23Gabra ni dara ni grao ha dongba lai hajai jenyaba basa sagra khede Gabrani khlai hi gathar se thihi reb ba lai. 24Gabra niha yaopha mani khlai hi daothu jorsi thikhabo, daophri basa magin thikhabo, Gabra ni dara ni grao ha reb ba lai labu hi bandai ri ba.

25Bo bubli ha, Jerusalem ha subung saosi Simeon thiyaba dong ba. Bo dormo ni subung se. Bo Madai khe mani hi Israelrao khe sogo ri mane jon hi dongyaba se. Ar boni basaoha Bese Gathar dongpha ba. 26Gabra Krista khe nuya side thi nang niya thihi Bese Gathar jang bokhe mithi ri ba. 27Bese jang langpha jao hi, Simeon Madai khoh ha hap hiba. Dara ha dongba lai dang ri mane nana Jisu khe buma jang bupha labu ba ha, 28Simeon nana khe bam dada Madai niha hamjaoma ri ba:

29Gabra, duhade nini grao lai,

nini leng khe khah santi jang haiha la ga.

30Bede thikhala nini sogoyah khe

ani muthai jang nu la kha.

31Ebo khe khrip jadi ni muthai ha

ning ning salai rihi deng ba.

32Jentailrao nini ha nini jnama khe nuphu mani khlai hi

ar Israelrao niha nini muima japhu mane.

33Nana ni basao ha grao thiyaba khe buma bupha gini jang hamsi ning gmang ba. 34Simeon bonsi khe hamthai ri dada boni buma Mari khe thi ba, Khna lah, ebo nana de Israelrao ni bising ha gabang subung buthu khuda mane ar sogo mane saikho ba. Ar malai jang siji jaomane sinbo phnu nang. 35Nini khah bo seng jang iphlaba lai sa ma se. Ode gabang subung ni khah khebo baothai phnu nang.

36Ode, Asher jadi ni Phanuel ni bisik gorasali saosi, Anna thiyaba dong ba. Bo hamsi ning grajik jakha. Bo noh jahi basai jang maithai sni mang mang dongpha ba. 37Bo nokha maithai jang bisa bri maithai bri banjik jahi dong ba. Ar Madaikhoh khe garyahi nalaibo hoh khongja donghi bo Madai niha bi re. 38Ode, okhali ni basain ha ning bo phai dada Madai niha hamjaoma ri ba, ode Jerusalem khe sogo mane lonhi jonyarao niha khrip nana ni balam khe sainthi ba.

Nazareth ha bonsi thangphin ba

39Gabra ni dara ha dongba lai khrip khusi khe dangblai bani yaohon ha bonsi Galili raji, jarni nolei Nazareth ha thangphin la kha. 40Nana de dedao phalang ba, ar raodao phalang hi bo girikthai jang gablai ba, ar Madai ni khasaoma boni basao ha dong ba.

Bikhoh ha nana Jisu

41Maithai phrong Jisu ni buma bupha Baiglai ni Mel mani mane Jerusalem ha thang re. 42Bo maithai jhigin soba ha dara ha dongba lai Baiglai ni Mel mani mane bonsi thang ba. 43Ode mel jamhi phaiphin ba ha, ansa Jisu Jerusalem ha dongthao la kha, bo khe buma jang bupha mithiya. 44Odebani, sainsi ni lama ha thang hi bonsi subung buthu ni bising ha ar lugurao ni dol ha ar basao mithiyarao niha bo khe smai hi nuya kha. 45Ode, bonsi bo khe nuyabani smai phalang hi Jerusalem gede thangphin kha. 46Saintham ni yaohon ha Jisu khe Madaikhoh bising ha bonsi slingriyarao ni gejer ha khamba khe nuhi ba, ar bonsini grao khe khnahi singbo sing ba. 47Bo joyaba grao khe khnayarao ar boni girikthai jang grao thiphinyaba khe khnayarao khrip bo gmang ba. 48Odehe, buma jang bupha, bo khe nuba jang hamsi ning gmang ba. Odebani, buma bo khe thi ba, Ani basa, sumjabani jing khe elai dukhu ri ba? Nai lah, napha jang ang waimu jang ning khe smai ba.

49Bo bonsi khe thiphin ba, Sumjabani nisi ang khe smai ba? Ani bupha ni noh ha ang dongma thihi nisi mithiya? 50Thikhabo, bo thiphinyaba grao khe bonsi bujiya.

51Ode, bo bonsi jang baosi Nazareth ha thangphin ba. Oraha bo bonsini grao khe mani hi dong ba. Boni buma khrip ebo buthu grao khe khah ha deng ba. 52Jisu ringpha langhi girikpha langhi sao bo dedao phalang hi jupha lang ba, ar Madai jang subung buthu ni khasaoma hamjaoma maihi dong ba.

Currently Selected:

LUKE 2: DIMASBSI

Highlight

Copy