LUKE 1
1
Grao jenyaba
1O Mayani Theophil,
Jini bisingha japhaiyaba grao khe gabang subung rebma bao ba. 2Jenba ni phrang ebo buthu khe nuyarao ar boni khusi dangyaba ni graojma jini ha sainthiyaba khe reb ba. 3Odebani, ebo buthu khe hamsisi khlai hi nai dada jenba ni phrang yaohonthao sosi, ninthane reb khade ham nang thihi ang bao ba. 4Sagang ha ninthane, bonsi riyaba grao khe, gibi ning thihi ning tharmaihi buji mani khlai hi ang reb ba.
Baptisma riyaba Johan hajai bani grao
5Juda rajiha, Herod Raja khamba ha, Abijah dol ni subung Zakaria thiyaba jonthai saosi dong ba. Bo Aron ni greng khe noh ja ba. Boni bihih ni bumu Elizabeth se. 6Bonsi gini jang Gabra ni muh ha hamba subung se. Odebani, Gabra ni dara disa khe hamsisi manihi dong ba. 7Elizabeth sagrima jabani, sasik maiya. Bonsi gini bo grasa grajik ja kha.
8Zakaria nalai dangba lai sainsi khali Jonthai ni khusi dang mane Madaikhoh ha hap ba. 9Odehe, Jonthai ni dara ha dongba lai, Gabra ni bikhoh ni bising ha hap hi bahai midim sao mane sama naiba ha boni saoha galai ba. 10Bo duna saosaiba ha baji ha subung buthu Madai bi ba. 11Gabra ni sorgo degla masi nujao phai ba, ode Madai huthan ni yaoda gede songpha phai ba. 12Zakaria bokhe nu dada, waimu nang ba. Odehe hamsi ning khinbo khin ba. 13Thikhabo, sorgo ni degla bokhe thi ba, Zakaria, da khin, Madai ning biyaba khe khna kha. Nini nohbrajik Elizabeth ninthane basa saosi mai ri nang. Ning bokhe Johan thihi bumu deng lah. 14Bo hajai bani ning hamsi ning khaja nang, ode subung buthu gabang khaja nang. 15Bede thikhade, bode Gabrani sagang ha subung gedeba ja nang. Bo grep bidih ar ju musi khebo ling nang niya. Hajaiya sani sagang ha ning Bese Gathar jang gablai ba se. 16Bode Israelrao ni bising ha gabang subung khe jarni Gabra Madai niha khah phin rihi labuphin nang. 17Bupharao ni khah khe basathu nihah phin phin ri nang. Ode, subung grao maniyayarao khe girikyarao ni gede phin phin ri mani Gabrani khlai hi subung buthu salai hi deng mani, Elija ni bese jang khusi dang phu mani Gabra ni sagang ha bo thang da ma.
18Zakaria degla khe thi ba, Bede khlai hi ang tharmai phu nang? Ang bo grasa ja kha, ani nohbrajik bo grajik ja kha.
19Degla bokhe thiphin ba, Ang ning Gabriel, Madai ni sagang ha songyaba. Ebo hamba graojma khe sainthi mane angkhe haiha ba. 20Khna lah, bubli sophai ginyaba grao khe ning lonya bani, boni grao sophaiya si ning grao jophuya hi thao ma.
21Zakaria khe subung buthu jonhi dong ba. Bikhoh bising ha budu lao bang bani bonsi hamsi ning gmang lai ba. 22Bo baigo buba jang, grao jophuya kha. Odebani bikhoh bising ha nujaoyaba nu ba thihi bonsi tharmai ba, ode bo yao jang se grao jo si ba.
23Bo jonthai ni khusi dangblai hi jarni noh gede thangphin kha. 24Khaisa yaohon ha, boni nohbrajik Elizabeth sao khonggin ja kha, ar nokha dain bowa noh niphrang baigoya hi dong ba. 25Duhade subung ni sagang ha musi jajaoya mane ani laji khe Gabra lang la kha, bo thi ba.
Jisu hajaiba ni grao
26Odehe, Elizabeth sao khonggin daindo soba ha, Madai jarni degla saosi Gabriel thiyaba khe Galili raji ni nolei masi, Nazareth thiyaba ha, 27mala gathar saosi niha haiha ba. Bode David ni sarik surik, Josep thiyaba jang noh jamane sandi dangseng hi dengyaba se. Bo mala ni bumu Mari se. 28Degla boni ha phai hi thi ba, Juthai, nini ha santi dong thing. Ning jang Gabra dongpha du. Ninthane hamsi ning hamthai bo riha du.
29Mari de olei sainthiyaba grao ni khlai hi hamsi ning khah waimu nang hi, Ebo khlimthai la sumjadi khlimthai ja kha thi hi bo khah ha bao ba. 30Degla bokhe thi ba, Mari, da khin, Madai ning khe nangjao du. 31Khna lah, ning sao khonggin jahi basa miyah mai nang, boni bumu Jisu thihi ning deng la nang. 32Bode subung gede ja ma. Judao thaoyaba Madai ni Basa thijao ma, ode Gabra Madai bokhe boni phagara David ni khamthan khe ri ma. 33Ode, Jakob ni sarik surikrao ni basao ha thaoglao jang bo Raja ja nang. Boni raji jam nang niya.
34Mari degla niha thi ba, Bede khlai hi olei ja phu ma? Ang la basai ning maiya kho?
35Degla boniha thiphin ba, Bese Gathar nini basaoha akhai phai nang, ar judaothao ni raothai jang nini basao ha sainkhlim ja nang. Odebani hajai phaiginyaba nana de subung gathar, Madai ni basa thijao ma. 36Nai lah, nini sengphongjik Elizabeth bo, grajik jaba ni yaohon ha duha sao khonggin ja ba daindo ja kha. 37Madai ni khlai hi dang phuyayaba khusi musi bo giri.
38Odehe, Mari thi ba, Angde Gabrani lengjik se. Ning thiba lai ning ani basao ha sophai thing. Ode sorgoni degla thang la kha.
Mari Elizabeth niha thang ba
39Boni yaohon ha, Mari de salai dada Juda raji ni nolei masi ha sangga thang kha. 40Bo Zakaria ni noh ha hap dada Elizabeth khe khlim ba. 41Mari khlimba ni khurang khe khna hi, Elizabeth ni hoh bising ha nana dongyaba mao kha. Ode, Elizabeth niha Bese Gathar gablai ba. 42Bo bol jang jirik khaohi thi ba, Masainjikrao ni bising ha nini khophal hamdao thao. 43Ani Gabra ni buma ani ha phaiba la sumjadi ni grao kho? 44Ning khlimyaba khurang khe khnaba jang ani bohoh bising ha dongyaba nana baijlom kha. 45Gabra boni ha grao sainthiyaba khe sophai ma thihi lon bani, boni khophal hambi.
Mari ni bakhan rajabthai
46Mari thi ba,
“Ani khah ha Gabra khe bakhan khlai du,
47Ani bese sogoyahba Madai ni khlai hi ang khaja du!
48Bede thikhade, bode boni lengjik khasi daothaoyaba khe wainso du.
Duha ni phrang khrip subung buthu ang khe khajayaba thi ba.
49Raodaoyaba Madai anthane khusi gede dang ri kha,
Boni bumu bo gathar se.
50Bokhe khin hi dongyarao ni basaoha
Jug jug khasaoma phnu nang.
51Bo jarni yao ni bol khe phnu kha,
ar bonsini khah ha baoyaba sanggama buthu khe bo dra dri khlai kha.
52Bo Raja gedebarao khe nekhlai hi,
Gibin jadi khasiyarao khe sugu kha.
53Hukhri jaoyarao khe hamba jimu jang hoh gablai ri kha,
Ode, gnangrao khe yao khongja khlai hi haiha kha.
54Jini phagrarao niha bo grao hanggai ba lai,
Boni leng Israelrao khe naiso la kha.
55Abraham ar boni sarik surik niha,
thaoglao jang boni khasaoma khe phnu nang”.
56Mari Elizabeth ni noh ha daintham lai dong hi jarni noh ha thangphin la kha.
Baptisma riyaba Johan hajai bani grao
57Elizabeth nana mai mani bubli sophai hi bo nana miyah mai kha. 58Boni noharirao ode hainthirao khna dada Gabra boni basaoha hamba khusi dang ri kha thihi hamsi ning bonsi bo jang khajapha ba.
59Odehe sainjai so ba ha, nana khe bujuh raso mane bonsi phai ba. Bupha ni bumu lahi Zakaria thihi bonsi dengma bao ba. 60Thikhabo, boni buma thi ba, Niya, boni bumu Johan deng nang.
61Bonsi Elizabeth khe thi ba, Elai bumu de nisini daphlungrao ni bising ha saosi bo giri kho! 62Odehe, bonsi boni bupha niha yao jang grao johi nana ni bumu khe sumjadi deng ma thihi sing ba.
63Zakaria reb mane longthai bakhlap sain hi, oraha Boni bumu Johan se thihi reb ba. Bonsi khrip bo gmang lai ba. 64Boha ning khuh slai khru dada grao johi Madai khe bakhan khlai ba. 65Noharirao khinthar hi Juda raji ni nolei buthu ha bo grao gublung thar kha. 66Ode, khnayarao si khah ha baohi, bo grao khe sing ba, Ebo nana bede jahi thao nang? bonsi thilai ba. Gabra ni yao boni basao ha dongpha du.
Zakaria grao sainthi da ba
67Boni bupha Zakaria, Bese Gathar jang gablai hi dong ba. Bo edehe grao sainthi da ba:
68“Gabra, Israel ni Madai khe bakhan jahi dong thing!
Bo jarni subungrao khe juru hi sogo kha,
69Boni leng David ni sarik surik ni phrang
sogoma ni bogrong bo song ri kha.
70Odehe, gada habo jarni gorasali ni khuh jang
grao hanggai ba lai jasosi,
71Jini sotrurao, jing khe naisleyarao ni
yao ni phrang jing khe sogo kha.
72Jini phagararao ni basao ha khasaoma phnu mani, ode
boni grao gathar khayaba khe wainso mani
73Jini phagara Abraham niha
smai dang hi grao hanggai ba.
74Bo jing khe sotrurao ni yao ni phrang sogo nang
75Jing thanghi dongba ha ning, gathar jang ragaosisi dongphu mani
Boni muh ha bo jingkhe saikho ba.
76Ode nanadao, ning khe judao thaoyaba ni gorasali thihi thi nang,
ar boni lama khe slam mane
Gabrani sagang ha ning thang nang.
77Bonsi ni phap map jama ni
sogo jaomane grao khe mithi ri nang.
78Jini Madai ni khasaoma jang
ar magain dik dikyaba basao ni phrang
sain baigo hi jini ha jnama ri nang.
79Andar jang githi ni sainkhlim ha khamyarao
ar bonsini igah khe santhi ni lama gede hem ri mani basao ni phrang jnama sophai nang”.
80Ansa dephalang hi juphalang hi sao jang bese gede raodao phalang ba. Odehe basain soya side Israel sarao niha nujaoya hi bo hajengling ha dong ba.
Currently Selected:
LUKE 1: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
