ROM 1

Salem o

1Paul, Yisu Khrista lar ka, tenyar ka asütsü Tsüngremi aja, aser Tsüngremer Osangtajung asoshi shimtet. 2Iba Osangtajung Tsüngremi Temeshi Laishiba nung pei ainkartem ajanga nangzük. 3Iba Osangtajung pa Chir indang lir, shiba shi agi Dawid metsü nungi jakzük 4saka Tanela Temeshi agi tasü nungi shia aruba ajanga ain nung pa Tsüngrem Chir ta sangoktsü. 5Yisu Khrista asen Kibuba, pa ajanga aser pa tenüng atema, bendanger shirnokisa amangdir parnoka tashi angaba dangi jadentsü atema onoki Tsüngrem taochi aser tenyar akümtsü agizük. 6Nenoka parnok rongnungji densema lir kechiaser nenoka Yisu Khristai aja. 7Tsüngremi meimba aser temeshi pur asütsü ajaba Rom nung alir ajak dangi asen Tebu Tsüngrem aser Kibuba Yisu Khrista nungi nenok dangi taochi aser tesünep sang.

Pauli Rom Yimti Semdangnür

8Tamasa nenok ajak asoshi Yisu Khrista ajanga ni kü Tsüngrem tenüng asanger, kechiaser nenok tamang indang alima ajak nung prokshia odagi. 9Kechiyong kü sarasadem nung ni maneni nenok bilemtetdagi ta pa Chir Osangtajung nung Tsüngrem shiba dang ni tenzüker, paji kü kuli lir. 10Ya Tsüngremi mulungba süra, kenü anogobosa ni nenok semdangtettsü ta ni teti sarasadema atar. 11Kechiyong nenok akangshidaktsütsü aser nenok den tanela sempet lemsateptsü asoshi ni nenok ajurutsü yongyar. 12Oda asenok tamang agi kati ka ajungshiteptsü asoshi. 13Adianutem, ni tangar Bendangertem rongnung ama nenok rongnunga süngjang kar angutsü asoshi ni nenok dangi arutsü aiben bilema liasü, saka tang tonga titema lir, ya ni nenok nem metetdaktsür. 14Grik nungertem aser tangartem anaprongla dang, temetetertem aser mashirtem dang sakuku tenzüktsü ni khuret kar. 15Anungji nenok Rom nung alir danga akok tashi Osang tajung sayutsüngitsü ni jangraseta lir.

Osangtajung Tashi Ain

16Kechiyong Osangtajung asoshi ni maker; kechiaser ibai tamangertem oda mezüngbubaji Yihuda nunger aser Grik nunger ajak kümzüktsü Tsüngremer ain lir. 17#Hab. 2.4 Kechiyong tamang ajanga Tsüngrem tsüngdang temeten angubaji Osang tajung ajanga jungkai adok, zülua aliba ama, “Temeshi pur tamang agi taküm alitsü.”

Meimchir Tai Temenen

18Kechiyong nisungtem shirnoki pei tamajungba agi ochiji nungtemer parnok temenen aser memeshiba anema Tsüngremer terasaba kotak nungi jungkai adoka lir. 19Tsüngrem indang metettsüba ajakji parnok tsüngdang odia jungkai adoka lir; kechiyong Tsüngremisa aji jungkai adokdaktsü. 20Kechiyong alima yangluli nungi, tatem makaba pa ain aser Tsüngrem yimya itemji munguaka, teyangluba osettem ajanga itemji angatettsü jangjajangja-a dang jungkai adoka kar. Anungji parnok telangzütsü maka. 21Parnoki Tsüngrem meteta liaka, saka parnoki pa nem tim tetushi mesüra nüngsang magütsü; saka parnok amajok tebilemba shisatsütem nung ali, aser parnok tamashi mulungjang manga kümdaktsü. 22Tashitemetetertem ta shia, parnok sasa tamashirtem aküm. 23Aser tasütsüba meimchir, ozüsangnu, tetsüng pezü atenba shirurutem aser juzüa senzüba shirurutem mesükba süngyanglutem agi tamasüba Tsüngrem sentsüwangshi melentep.

24Anungji parnok rongnung pei temang mezüngmeshidaktsütsü asoshi Tsüngremi parnokji memerükbalen parnok mulungjang jabujariba nem bendanga agütsü. 25Parnoki tiyazü den Tsüngrem ochiba melentep, aser Teyanglur shiba teti asangtsü tim, ibaji melena teyangluba osettem akhüm tsübu aser tenzük, Amen. 26Anungji maksütsü shi azü jangraba nem Tsüngremi parnok bendanga agütsü. Kechiyong tetsürtemi yimya benshiba kazüba toktsür koba yimya masü aji parnok rongnung inyak. 27Aser kasaji teburtemia tetsür den kazüba yimya toktsür kati ka den jabujaritsü tenzük, aser parnok mashikoshi yimya benshiba talang pei dak atalok. 28Kechiaser metetba shisatsü agi inyaktsü menangzük nung tim masüba mapa inyaktsü asoshi aser taktsü maketba temenen mulungjang nem Tsüngremi parnok bendanga agütsü. 29Parnok tamajung, tara, tenükshiba, aser shisatsü tamajung agi sünga lir. Parnok nükmerem, tepsetba, rarabangsen, tekülak aser tesempa agi sünga kar, 30parnok nüngsenbangsen o jembirtem, ashikülaker, Tsüngrem toktsüba aser Tsüngrem mezüngmeshiba nisungtem aküm. Parnok tekong temerang, naloknara, tamajung mapa shisadangertem, tsüraburtem dang tashi mangabatem; 31mangatetba, akhüm-maket, kibong temeimtep makaba, yimlibilem makaba purtem dang lir. 32Yamala mapa inyakertem tasütsü tetemsü ta Tsüngremer Ozüng lateta alibaji tim dang lir: kechiaser parnoki itemji inyakba dang masü, saka ano itemji inyakba nisungtem dang parnoki pelar.

Currently Selected:

ROM 1: AONAGABSI

Highlight

Copy