MARK 3

Teka Ashirepba Nisung Ka Anebtsüba

(Mat. 12.9-14; Luk. 6.6-11)

1Pai tanaben sinagogi ait, aser idakji teka ashirepba nisung ka liasü. 2Pai pa amungnü anebtsüdisü, manebtsülir ta pa aitsütsü asoshi parnoki mita ata. 3Pai teka ashirepba nisung dangji ashi, “Yagi arua noktakang.” 4Pai parnok dang ashi, “Amungnü tajung inyaktsü tim asü, tamajung inyaktsü tim; taküm kümzüktsü asü, mesüra tepsettsü?” Saka parnoki mokorai ali. 5Parnok temulung merangbaji ngua pai mit adoka parnok meketa ajia nisungba dangji ashi, “Ne teka songtokang.” Pai aji songtok, aser pa teka akhi ama kümadok. 6Farisitem kimai adok aser idangyongji parnoki pa kodaser samatsütsü, pa anema Herod telok den tasa asa.

Tzüyimküm Nung Telokti

7Yisui pei nütsüngtem den tzüyim leni meyip, aser Galil nungi telok ka anitak; aser Yihuda lima nungi, 8aser Yirusalem nungi Idumea aser Yordan külen nungi, Tair aser Sidon temeket linük nungi telok tulu kati pai inyakba angashia pa dangi aru. 9#Mar. 4.1; Luk. 5.1-3 Anungji telok jagi pa dak menungshidaktsütsü asoshi pai pei nütsüng dang rong tila ka renema atang ta ashi; 10kechiaser pai nisung aika anebtsü, aser shiranger ajaki pa dak kongshitsü asoshi nungtepa aru. 11Kodangsa temenen tanelatemi pa angu, parnoki pa tsüngdang apudaker aser ayimtena ashi, “Na Tsüngrem Chirji lir;” 12saka pa indang odia mesangtongtsüla ta pai parnok ajang ajanga nungtem.

Terana Shimba

(Mat. 10.1-4; Luk. 6.12-16)

13Pai tenemi atu aser pai mulungba ama itemji aja; aser parnoki pa dangi aru. 14Pai terana shimtet, shir dang tenyartem ta ajar, anungji parnoki pa den alitsü, sayutsüngi yoktsü, 15aser temenen tanelatem aridoktsü tashi-ain parnok nem agütsü: 16Item teranaji pai shimtet; aser pai Simon dang Peter ta aja, 17Zebedi chir Yakob aser tenu Yohan (pai parnok dang Boanarges, tetezü Tsüngmok chirtem, ta aja), 18Andria, Filip Bartholoma, Mathi, Toma, Alfa chir Yakob, Thadia, Kanan nunger Simon, 19aser Yihuda Iskariot, shibai pa bendanga agütsü.

Yisu aser Beel-zebul

(Mat. 12.22-32; Luk. 11.14-23; 12.10)

20Pai ki kati atu; aser telokji tanaben senten, anungji parnoki techiyunga mechiyungtet. 21Pa den külemi alirtemi aji angashidang pa sottsü tugu, kechiyong parnoki ashi, “Pa yia matar.” 22#Mat. 9.34; 10.25 Yirusalem nungi aluba tezülurtemi ashi, “Pa dak Belzebul lir, aser temenen tanelatem tongtiba tashi agi pai temenen tanelatem aridoker.” 23Pai parnok pa dangi aja, aser o-entepbatem agi parnok den pai jembi: “Satani kodaser Satan aridoktet? 24Yimli ka pei sasa lemsara, iba yimliji melitet. 25Kibong kati pei sasa lemsara, iba kibongji noktaka melitet. 26Aser Satani pei sasa anema apusor lemsara, pai noktaka melitet, saka tatem tongogo. 27Tashi tait nisungji tamasa alena meyura, shiangaia tashitait kidang jagi ia, par oset-tsüset rakzükraktemtsü makok. 28Atangji ni nenok dang ashir, temenen ajak aser tatalaba kechi agisa ataladir nisung chirtem dang atoktsü. 29#Luk. 12.10 Saka shibaisa Tanela Temeshi anema ataladir putusa putu tatok maka; joko tatem makaba temenen menar” 30kechiaser parnoki ashi, “Pa dak temenen tanela lir.”

Yisu Tetsü aser Adianutem

(Mat. 12.46-50; Luk. 8.19-21)

31Pa tetsü aser tenu nungertem aru, aser kima noktaker pa tajai yok. 32Telok ka pa meketa mena liasü aser parnoki pa dang ashi, “Ajiangjo, netsü aser nenu nungeri kima na bushidagi.” 33Pai parnok dang langzü, “Kütsü aser künu nungertem shir?” 34Aser pa meketa amenertem dak repranga pai ashi, “Kütsü aser künu nungertem ajiang. 35Shiri Tsüngrem mulungba inyaker, paji kü adianu, aser ai-anu, aser kütsü lir.”

Currently Selected:

MARK 3: AONAGABSI

Highlight

Copy