MARK 2

Togimra Agi Shirangba Nisung Ka Anebtsüba

(Mat. 9.1-8; Luk. 5.17-26)

1Anogo ishika lir külen kodang pa Kapernaumi tanaben aru, pa kidang lir ta angazük. 2Nisung jenti sentep nungji joko parnok masem, oda kishizüng tonga mesemi nungten, aser parnok dang pai sayutsüngia liasü. 3Idangji togimra agi shiranger ka, nisung pezüi apur pa dangi anir aru. 4Telok aliba agi parnoki Yisu anasai marutet; anungji parnoki pa alidak teindang kilemji rakpok aser aji lupoker togimra agi shirangba nisung ontaka aliba yiptenji ajungzüka ludaktsü. 5Yisui kodang parnok tamangji angu togimra agi shirangba dang pai ashi, “Tebu ne menen tokogo.” 6Saka idakji tezülurtem kar mena liasü aser parnoki pei mulung nung shisadang, 7“Kechiba iba nisung yagi yamai jembir? Pai Tsüngrem atalaa jembir. Tsüngrem dak alema shibai temenen atoktsü akok?” 8Idangji parnoki parnok mulung nung yamaji shisadanger ta Yisui pei mulung nung meteta, parnok dang ashi, “Nenoki kechiba itemi nenok mulungjang nung shisadanger? 9Togimra agi shirangba dang, ‘Ne menen tokogo’, ta ashitsü temelaba asü, mesüra ‘Noktakang, aser ne yipten benang aser jaja-ang’ ta ashitsü temelaba?” 10Saka Nisung Chir dak temenen atoktsü tashi-ain lir ta nenoki metettsü asoshi, pai togimra agi shirangba dang ashi, 11“Ni ne dang ashir, shishiang, aser yipten bener ner kidangi oang.” 12Pai shishi, aser idangyongji pa yipten bena aru aser parnok jakdang nungi oadok, anungji parnok ajak süngmang aser Tsüngrem sentsüwangshia ashi, “Onoki kodanga yamai munguka.”

Levi Ajaba

(Mat. 9.9-13; Luk. 5.27-32)

13Pai tanaben tzüyimküm tsütsü leni ao; aser telok ajak pa dangi senten, anungji pai parnok dang sayumeso. 14Aser pai süia aodang, Alfa chir Levi alimelen sarudak mena pai angu, aser pai pa dang ashi, “Kü sülen anitakang.” Pai arameso aser pa sülen anitak. 15Kodang Yisu Levier kidang chiyungdak mena liasü, aser idakji alimelen sarurtem aser temenenpur aika Yisu aser pa nütsüngtem den külemi mena liasü; aser parnoki pa sülen anitak. 16Kodang pa temenenpurtem aser alimelen sarurtem den chiyunga parnoki angu, Farisi rongnung tezülurtemi pa nütsüngtem dang ashi, “Pai Kechiba alimelen sarurtem aser temenenpurtem den chiyunger?” 17Yisui ya angashia parnok dang ashi, “Anema alirtem asoshi mozü shiteter tenüngdaktsü maka, saka shirangertem asoshi tenüngdaktsü. Temeshipurtem masü, saka temenenpurtem ajatsü ni aru.”

Lumiba Indang Asüngdangba

(Mat. 9.14-17; Luk. 5.33-39)

18Yohan nütsüngtem aser Farisitemi lumia liasü, aser nisungtemi arua pa dang ashi, “Kechiba Yohan nütsüngtem aser Farisitemi lumir, saka ne nütsüngtemi melumir”

19Yisui parnok dang ashi, “Kiyimsang parnok den ali tashi kiyimba tembartemi lumitsü asü? Kiyimsang parnok den ali tashi parnok lumitsü makok. 20Saka anogotem arutsü, kodang kiyimsang parnok nungi anir aotsü, idangji iba anogo nungji parnoki lumitsü. 21Shingaia sü tejen nung sü tasen mateploker; pai yamaji inyakra, tateplokba tasen jagi tejenbajia shizüka tapok tulu padaktsür. 22Shingaia yi tasen shiküp juli tejen nung meshioker; pai yamaji inyakra, yi jagi shiküp juliji pokmatsü, aser yi o shiküp juli anaprongla samatsü; saka yi tasen shiküp juli tasen nung shioktsüla.”

Amungnü Tsükjong Mitba

(Mat. 12.1-8; Luk. 6.1-5)

23 # Taz. 23.25 Amungnü ka pai alu ajanga süidang, tuodak nung pa nütsüngtemi tsükjong mitmeso. 24Idangji Farisitemi ashi, “Ajiang, kechi amungnü inyaktsü tim masü aji kechiba parnoki inyaker?” 25#1 Sa. 21.1-6 Aser pai parnok dang ashi, “Dawid aser pa den alirtem nüngdaka alidang aser ayadang, pai kechi inyak aji nenoki kodanga mezüngdangka ma? 26#Lev. 24.9 Pai koda Abiathar putir alidang Tsüngrem kidangi ai, aser Tsüngrem madang ayuba amtsük, koba putir dak alaka tangari achitsü tim masü, aji achi aser pa den alirtem nema agütsü?” 27Pai parnok dang ashi, “Meimchir asoshi Amungnü yanglu, saka Amungnü asoshi meimchir meyanglu; 28aji asünung Nisung Chir Amungnü Kibuba lir.”

Currently Selected:

MARK 2: AONAGABSI

Highlight

Copy