MARK 1

Yohan Baptitsübai Sayutsüngiba

(Mat. 3.1-12; Luk. 3.1-18; Yoh. 1.19-28)

1Tsüngrem Chir Yisu Khrista indang Osangtajung tetenzük. 2#Mal. 3.1 Isaia ainkari nung zülua aliba ama:

“Ajiang ni kü tenyar ne jakdang yoker,

shibai ne lenmang renemtsü.

3 # Isa. 40.3 Lisem lima nung kati ayimtena aliba ola.

Nenoki Kibuba lenmang renemang;

pa lentongbang metong metonga yangluang.”

4Anungji Yohan Baptitsüba lisem lima nungi adoka, temenentem atoktsü asoshi temulung meyipa baptitsü indang sayutsüngia aru. 5Aser Yihuda lima temeket aser Yirusalem nung alir ajak pa dangi ao; aser parnok temenen nangzüka, pai parnok Yordan ayong nung baptitsü. 6#2 Ch. 1.8 Yohani ut-züng sü abena liasü, aser teperem nung shiküp ka agi nai, süngku aser arem ninang mojitzü pai achi. 7Pai sayutsüngia ashi, “Kü dang nungi kanga agi tuluba ka kü sülen arudar, oda nibo mokrema lur pa tsüngsem lisü salatsüa metemsü. 8Ni nenok tzü nung baptitsür, saka paibo nenok Tanela Temeshi nung baptitsütsü.”

Yisu Baptiba

(Mat. 3.13-17; Luk. 3.21-22)

9Item anogo nungji Galil lima Nazaret yim nungi Yisu aru aser Yordan ayong nung Yohani baptitsü. 10Pa tzü nungi adokdangji anüng lapoka Tanela posü ama alua pa dak atemba pai angu. 11#Lip. 22.2; TKe. 2.7; Isa. 42.1; Mat. 3.17; 12.18; Mar. 9.7; Luk. 3.22 Aser anüng nungi ola ka adoka ashi, “Na kü meimba jabaso, ne dak ni temulung achir.”

Yisu Atitangba

(Mat. 4.1-11; Luk. 4.1-13)

12Idangyongji Tanelai pa lisem lima leni arioktsü. 13Aser lirnü tashi lisem lima nung Satani pa atitanga; pa arem shiruru den liasü; aser kotak tenyartemi pa anebalu.

Galil Lima nung Sayutsüngi Tenzükba

(Mat. 4.12-17; Luk. 4.14-15)

14Tang Yohan pur külen, Tsüngrem Osangtajung sayutsüngia Yisu Galili aru, 15#Mat. 3.2 aser ashi, “Mapangji tongogo, aser Tsüngrem Yimli ana nung aitogo, temulung meyipang, aser Osangtajung nung amangang.”

Angopur Pezü Ajaba

(Mat. 4.18-22; Luk. 5.1-11)

16Galil tzüyim anasa süidang, Simon aser tenu Andria tzüyim nungji zütsük onya pai angu; kechiaser parnok angopurtem liasü. 17Yisui parnok dang ashi, “Kü sülen arung aser ni nenok nisung apurtem kümdaktsüdi.” 18Idangyongji parnoki pei zütsük toktsür pa sülen anitak. 19Tatsüka or külen, Zebedi chir Yakob aser pa tenu Yohan parnok rong nung zütsük atepya pai angu. 20Idangyongji Yisui parnok aja aser parnoki pei tebu Zebedi rong nungji ayangertem den toktsür pa sülen anitak.

Temenen Tanela Agi Apuba Nisung Ka Anebtsüba

(Luk. 4.31-37)

21Parnok Kapernaumi ao; aser idangyongji amungnü Yisui sinagogi ia sayutsü tenzük. 22#Mat. 7.28,29 Idangji pai sayuba nung parnoki süngmang, kechiaser pai tezülurtem ama masü, saka ain aketba nisung ka ama sayu. 23Idangjisa parnok sinagog nungji temenen tanelai apuba nisung ka liasü, aser pai yamai ayimtena ashi, 24“Onok ne den inyaktsü kechi aka, Nazaret nunger Yisu? Na onok samatsütsü aru asü? Na shiba-ar ni meteta lir, na Tsüngrem meyong Temeshisang.” 25Yisui pa dang metenokja ashi, “Mokorai liang, pa nungi adokang,” 26temenen tanela jagi pa ateptendaktsü aser tashi agi asa-a, pa nungi adok. 27Parnok ajak süngmang nung parnok o parnok na yamai jembitepa ashi, “Ya kechi tesüngmangtsü? Kechi tesayuba tasen ka? Pai temenen tanelatem danga ozüng agütsür, aser parnoki pa dang angar.” 28Aser idangyongjisa pa nüngsang Galil lima temeket ajaklen sangdonga ao.

Yisui Tashitak Tapu Jenti Anebtsüba

(Mat. 8.14-17; Luk. 4.38-41)

29Idangji parnoki sinagog toktsü aser Yakob o Yohan den Simon aser Andria kidangi ao. 30Simon kinungtsü tetsü ramen agi shiranga mejanga liasü, aser idangjisa parnoki la indang Yisu dang ashi. 31Pa arua la teka nung amer atsümeso, idangji ramen jagi la toktsü aser lai parnok nem awazüa agütsü. 32Iba nikongtsütsü anü lur külen shirangertem aser temenen tanelai apubatem ajak parnoki pa dangi anir aru. 33Aser yimti nung alir ajak kikümdang sentep. 34Tashitak tapu jenti agi shiranger ajak pai anebtsü, aser temenen tanelatem aika pai aridoktsü, aser pai temenen tanelatem nem o mejembidaktsü, kechiaser parnoki pa metet.

Sayutsüngi Aoba

(Luk. 4.42-44)

35Anepdang yakta ano manga alidang, Yisui shishir kimai adoka azüngmeyakdak tesem kati aenshia ao, aser yangji pai sarasadem. 36Simon aser pa den alirtemi pa bushi. 37Parnoki pa angu aser ashi, “Ajaki na bushidagi.” 38Pai parnok dang ashi, “Anasa aliba yimtsüngtem nunga sayutsüngitsüsa asenoki tangalen jagi odi, kechiaser ya asoshi ni aru.” 39#Mat. 4.23; 9.35 Aser pai parnok sinagog nung sayutsüngia aser temenen tanelatem aridokja, Galil ajak sema senzü.

Zütsüra Aketba Nisung Ka Anebtsüba

(Mat. 8.1-4; Luk. 5.12-16)

40Zütsüra aketba nisung ka pa dangi arua apudaka pa dang mepishia ashi, “Nai mulungra, nai ni merüktettsütsü akok.” 41Pai aochia bilema pei teka songtok aser pa dak kongshi, aser pa dang ashi, “Ni mulunger, na merüka kümang.” 42Idangyongjisa zütsürai pa toktsü, aser pa meshiteta aküm. 43Pai pa dang sashia nungtem aser idangyongjisa pa yokadok, 44#Lev. 14.1-32 aser pai pa dang ashi, “Nai ya shinga danga teshima no, saka oang aser putir dang sayuang aser parnok dang kuli asütsü asoshi na merüktettsü atema Mosai melaba ama tenla-ang.” 45Saka pai oadok aser iba o ayimsünga yoktsü atema iba indang odia jembimeso; anungji joko Yisui yimti katia odia meitet, saka azüngmeyakdak tesem ka nung pila-a ali; aser ajaklen nungi nisungtem pa dangi aru.

Currently Selected:

MARK 1: AONAGABSI

Highlight

Copy