MATHI 3

Yohan Baptitsüba Sayutsüngiba

(Mar. 1.1-8; Luk. 3.1-18; Yoh. 1.19-28)

1Item anogo nungji Yohan Baptitsüba aru aser Yihuda lisem lima nung sayutsüngia ashi, 2“Nenok temulung meyipang, kechiaser kotak yimli anasa lir.” 3#Isa. 40.3 (LXX) Kechiaser Yohan indang ainkar Isaiai jembiba yamai lir,

“Lisem lima nung kati ayimtenba ola, Kibuba lenmang renemang, Pa lenkong metong metonga yangluang.”

4 # 2 Ch. 1.8 Iba Yohani ut-züng sü aben aser teperem nung shiküp nai; aser pa chiyungtsüji süngku aser arem ninang mojitzü liasü. 5Idangji Yirusalem aser Yihuda ajak, aser Yordan meketa aliba ajak pa dangi ao; 6aser parnoki pei temenen nangzüka, pai parnok Yordan ayong nung baptitsü.

7 # Mat. 12.34; 23.33 Saka kodang Farisi aser Saduki pur aika pa dangi baptitsü asoshi aruba angu pai parnok dang ashi, “Nenok per chirtem tarutsü aliba ain adokba nungi ajentsü shibai nenok kümdangdaktsü? 8Anungji nenok temulung meyipba den putepa tejang tangdakjang; 9#Yoh. 8.33 aser, ‘Abrahamji ozü tebu lir’ ta nenoki tebilem, kechiyong ni nenok dang shidi, ‘Item lungtem nungi Tsüngremi Abraham chirtem adokdaktsütet.’ 10#Mat. 7.19 Aser tanga süngdongzüng nung puji ataloka lir, koba süngdong nungsa tejang tajung matanger aji lepzüktsü aser mi nung enoktsütsü. 11Nenok temulung meyip ni nenok tzü nung baptitsür. Saka shiba kü sülen arudagi pa kü dang tuluba, shiba tsüngsem abentsü ni metemsü. Pai nenok Tanela Temeshi aser mi nung baptitsütsü. 12Pa ket nung aptoktsü ber am-a lir. Pai pei motsüngnem jungjunga oktoktsü aser pai pei tsük jendang bendentsü, aser pai tsüksü kodanga masepba mi nung rongtoktsü.”

Yisu Baptiba

(Mar. 1.9-11; Luk. 3.21-22)

13Idangji Yohan nem baptidaktsütsü asoshi Yisui Galil nungi Yordani aru. 14Saka Yohani pa songtema ashi, “Ni ang nai baptitsütsü tim sür nung, ano na ang kü dangi arur no?” 15Yisui pa dang langzü, “Tangbo odang sang, kechiaser temeshiba ajak ataloktsütsü asenokbo yamai asütsü tim.” Idangji Yohani pa dang hai-haura aka. 16Aser Yisu baptizükli pai idangyongjisa tzü nungi adok aser idangji ajiang kotak pa nem lapoktsü, aser Tsüngrem Tanela posü ka ama pa dak alua atemba pai angu; 17#Lip. 22.2; TKe. 2.7; Isa. 42.1; Mat. 12.18; 17.5; Mar. 1.11 aser kotak nungi ola kati ashi, “Ibai kü meimba jabaso, shiba dak ni kü mulung achir.”

Currently Selected:

MATHI 3: AONAGABSI

Highlight

Copy