MATHI 2

Tashi Temetetertemi Semdangba

1Tang Herod chuba tensa nung Yihuda lima nung aliba Bethlehem nung kodang Yisu aso, ajiang, anüdoklen nungi tashitemetetertem Yirusalemi aru, 2aser asüngdanga ashi, “Yihuda nunger chuba soa alibaji kong ali? Kechiyong onoki pa petinu anüdoklen adoka angu aser pa külemtsü aru.” 3Kodang Herod chubai o ya angashi, pa den Yirusalem nunger ajak aoksadok. 4Pai putiunger aser tezülur ajak külemi ayongten aser Mesiaji kong asotsü ta parnok dang asüngdang. 5Parnoki pa dang ashi, “Yihuda lima nung aliba Bethlehem nung; kechiaser ainkari yamai zülua lir.

6 # Mik. 5.2 “Na Yihuda lima nung aliba Bethlehem,

Yihuda yimsüsürtem rongnung na kodaka-ang tilatiba masü;

kechiaser na nungi yimsüsür ka adoktsü,

shibai kü nübur Israel madak yimsü asütsü.”

7Idangji Herodi tashitemeteter temji miima aja aser petinuji kodang adok ta parnok nungi tejangja metettsü asüngdang. 8Aser parnok Bethlehemi yoka ashi, “Oang aser tanur indangji kümdanga nendaka bushiang, aser kodang nenoki pa ngudir, nia arua pa külemtsü asoshi kü dangi osang bener arung.” 9Parnoki chuba o angashir ao, aser ajiang, tanur aliba madak tonga arur manen tashi, parnoki anüdoklen anguba petinuji parnok jakdang ao.

10Kodang parnoki petinuji angu, parnoki kanga pelatep; 11aser parnoki kidang jagi ai aser tetsü Mari den tanurji angu. Idangji parnoki apudaka pa külem, aser parnoki senti osetlep salar pa nem hon, liangmesen, aser teronem menemba sempettem agütsü. 12Aser Herod madangi lepa maotsü asoshi pungmang ka nung Tsüngremi parnok songtem nung parnoki lenmang tanga kati pei limai ao.

Ijip Limai Ajenba

13Parnok or külen, ajiang, Kibuba tenyar ka Yosef dangi pungmang nung adok, aser ashi, “Shishiang, tanur o tetsü na anir Ijip limai jenang aser ni ne dang mashi tashi yangji liang; kechiaser Herodi tanurji tepsettsü bushitsü.” 14Idangji pai shishi, aser tanur o tetsü na anir ammang nung Ijipi aenshia ao; 15#Hos. 11.1 aser Herod masü tashi yangji liasü. Anungji ainkar ajanga Kibubai kechi jembi aji yamai atalok: “Ijip lima nungi ni kü jabaso jatet.”

Kinü Tanurtem Tepsetba

16Idangji tashitemetetertemi pa külakoktsüogo ta Herodi meteta, pai jashia ain adok, aser Bethlehem nung, tashitemetetertem nungi angazükba mapang apir, pai ozüng agüja tebur chanu küm ana aser tekübok rogo ajak tepsetdaktsü. 17Anungji Yerimia ainkari shinba ya atalok,

18 # Yer. 31.15 “Rama nung ola ka angashi,

oda jebtepba aser mangyimba tulu;

Racheli pei chirtem asoshi ajeb,

aser parnok mali nung lai mesüngzüknü.”

Ijip Nungi Shilangba

19Saka kodang Herod asü, ajiang, Ijip lima nung Yosef dangi Kibuba tenyar ka pungmang nung adok, 20aser ashi, “Shishiang aser tanur o tetsü na anir Israel limai oang, kechiaser shiri tanur takümji bushi parnok süogo.” 21Idangji pa arameso aser tanur o tetsü na anir Israel limai aru. 22Saka Yihuda nung Arkeleoi pei tebu Herod melen yimsü südagi ta angashir pa ajagi aotsü tsübua liasü; aser pungmang nung Tsüngremi songtem nung, pai Galil limai meyip; 23#Mar. 1.24; Luk. 2.39; Yoh. 1.45 aser pa Nazaret nunger ta ajatsü, ibai ainkartemi shinba ataloktsü asoshi, pa arur Nazaret ta ajaba yimti nung ali.

Currently Selected:

MATHI 2: AONAGABSI

Highlight

Copy