MATHI 15

Tsüraburtem Yimsü-yimbong

(Mar. 7.1-13)

1Idangji Farisitem aser tezülurtem Yirusalem nungi Yisu dangi arua ashi, 2“Kechiba ne nütsüngtemi tsüraburtem yimsüyimbong alemer? Kechiaser parnoki chi chiyungdang parnok teka memetsüker?” 3Yisui parnok dang langzü, “Kechiba nenokia nenok yimsü-yimbong atema Tsüngrem ozüng raksar? 4#Ani. 20.12; 21.17; Taz. 5.16; Lev. 20.9 Kechiaser Tsüngremi ashi, ‘Nebu aser netsü akhüm tsübuang, shibai pei tebu mesüra tetsü anema tamajung jembidir, pa sülanglang.’ 5Saka nenoki ashir, teyari kechi nenoki ni nungi ngula, aji Tsüngrem atema sempet lir ta nisung kati pei tebu mesüra tetsü dang shira pai pei tebu akhüm tsübutsü tenüngdaktsü maka. 6Aji oda nenok yimsü-yimbong meji nung nenoki Tsüngrem o amajok kümdaktsür. 7Anemsübatem, Isaiai nenok indang shitak yamai shina kar:

8 # Isa. 29.13 ‘Iba puri tebang agi ni akhüm tsübur,

saka parnok mulungjang ni nungi talangka pila-a lir.

9Parnoki nisunger tzüzüng-ozüngtemji tesayubatem ama sayua,

parnoki amajok nung ni külemer!’ ”

Nisung Ka Menentsübatem

(Mar. 7.14-23)

10Aser Yisui telok pa dangi ja-a parnok dang ashi, “Angang, aser angatetang! 11Tebangi kechi air aji agi nisung menentsür masü; saka kechi tebang nungi adoker aji agi nisung menentsür.” 12Idangji nisungtemi arua pa dang ashi, “Iba o angashidang Farisitem jashi ta nai meteter ma?” 13Saka Yisui langzüa ashi, “Kechi tsünütsüsa kotak nung aliba kü Bui metsünü, aji atsüdoktsü. 14#Luk. 6.39 Parnok oda tokjang, parnok nükpoker lenirtem lir. Aser nükpokeri nükpoker anirabang, anaprongla kangla nung asongtsü.” 15Peteri langzüa pa dang ashi “Iba o-entepba tetezü onok dang rateta shiang.” 16Aser Yisui ashi, “Nenokia ano mangateter no? 17Tebangi kechi air, aji tepoki ia metsümeshidaki oa endoker, aji nenoki meshitet no? 18#Mat. 12.34 Saka kechi tebang nungi adoker, aji temulungjang nungi adoker aser iba jagi nisung menentsür. 19Kechiaser nisung mulungjang nungi shisatsü tamajung, nisung tepsettsü, nüktapangta, jabujari, auyatsü, tiyazü kuli aser Tsüngrem atalatsü adoker. 20Aser item jagi nisung menentsür. Saka teka memetsüki chiyungba agi nisung memenener.”

Kanantsür Ka Tamang

(Mar. 7.24-30)

21Aser Yisui yang nungjagi Tair aser Sidon limai ao. 22Aser ajiang, Kanantsür ka iba lima nungjagi arua ayimtena ashi, “Oh Kibuba, Dawid Chir, kü dang aochiang; kü jala temenen tanela agi kanga kangshia lir.” 23Saka pai la dang o kata melangzü. Idangji pa nütsüngtemi pa dang mepishia ashi, “La yokadokang, kechiaser lai asenok sülen ayimtener.” 24Saka pai langzü, “Israel temadokba santem dangi dang ni yok.” 25Saka lai arua pa dang külema ashi, “Kibuba, ni yariang,” 26Idangji pai langzü, “Tanur chiyungtsü bena arur azütem madang endoktsü tim masü.” 27Saka tetsür jagi langzü, “Hau, Kibuba, saka azütemia pei kibur langbang nungi tsükba tanüktaribo achir.” 28Idangji Yisui langzü, “Oh tetsür, ne tamang tulu lir; nai aginüba amaji ne dang inyakang.” Idangji la jala iba mapang nungjagi anebadok.

Nisung Aika Anebtsüba

29Yisui yang nungjagi pila aser Galil tzüyim anasai aru, aser pai tenem jagi atu aser idakji amen. 30Tsüngtsükertem, nükpokertem, suwar, tetsüng teka lemtartem aser tangar aika den telok jenti pa dangi aru. Aser teloki Yisu tsüngdang parnokji yutsü. Aser pai parnok anebtsü. 31Anungji suwartemi o jembitetba, lemtartem ajungba, tsüngtsükertemi jajatetba, aser nükpokertemi anguba kodang parnoki item ain-mapatem angu, telok jagi süngmang; aser parnoki Israel Tsüngrem tenüng asang.

Meyi Pezü Chiyungdaktsüba

(Mar. 8.1-10)

32Yisui pa nütsüngtem pa dangi aja aser ashi, “Ni telok asoshi aria bilemer, kechiaser item anogo asem tashi kü den lia aruogo aser tachitsü kecha maka. Aser parnok yaseta ni meyoknür. Ashiko parnok lenmang nung lumiadoktsü.” 33Nütsüngtemi pa dang ashi, “Telok patakati tepok süngdaktsütsüsa arem nung asenoki amtsük paikaji kong nungi angutsü?” 34Yisui parnok dang ashi, “Nenok amtsük kwika aka?” Parnoki ashi, “Tenet aser ango ishika.” 35Anungji Yisui telokji ali nung amentsü mela. 36Aser pai amtsük tenet aser angoji amer tenüngsang agütsür pai sangsa aser nütsüngtem nem agütsü, aser nütsüngtemi telok nem agütsü. 37Parnok ajak chir tip atem. Aser parnoki tanüngba tanüktari molok tenet sünga benden. 38Tetsür tanur mezüngi aji achiba tebur meyi pezü liasü. 39Aser pai teloktemji yoker, rongi tua Magadan arrtsüi ao.

Currently Selected:

MATHI 15: AONAGABSI

Highlight

Copy