MATHI 14

Yohan Baptitsüba Asüba

(Mar. 6.14-29; Luk. 9.7-9)

1Iba mapang nungji Herod Tetrarki Yisu indang jembiba osang angashi, 2aser pai pei tenzükertem dang ashi, “Ibai Yohan baptitsüba lir; pa tasü nungi shia aruogo, aser item ain mapatem pa ajanga inyaker.” 3#Luk. 3.19,20 Kechiaser Herodi pa tenu Filip kinungtsü Herodia atema Yohan pua alener tepuokdak ayu. 4#Lev. 18.16; 20.21Kechiaser Yohani Herod dang ashi, “Nai la agitsü tim masü.” 5Aser pai pa tepsetnüa liasü saka telok tsübu, kechiaser parnoki Yohanji ainkar ka ta züngshia liasü. 6Saka kodang Herod asoba anogo tonga aru, Herodia jalai telok tsüngdang tsüngsang, aser Herod peladaktsü. 7Anungji lai kechi meshidir aji la nem agütsüdi ta pai azüngashia nangzük. 8Aser la tetsüi ajungshiba agi lai ashi, “Yangi kü nem Yohan Baptitsüba kolak su ka nung kua.” 9Idangji chubaji jashia liasü, saka pai nangzükba aser pa den chiyungdak amenertem atema aji agütsütsü pai mela. 10Aser pai yoka tepuokdak Yohan kolak atang. 11Aser pa tekolakji su ka nung bener arua aiürla nem agütsü, aser lai aji tetsü dangi bener ao. 12Aser Yohan nütsüngtem arua tasü mangji bener oa arem; aser parnoki oa aji Yisu dang ashi.

Meyi Pungu Chiyungdaktsüba

(Mar. 6.30-44; Luk. 9.10-17; Yoh. 6.1-14)

13Kodang Yisui ya angashi, yang nungjagi rong ka nung azüngmeyakdak tesem kati pa kija pila-a ao; aser aji teloki angashidang yimtitem nungi parnoki tetsüng agi pa sülen anitak. 14Aser pa adokdang nisung telok tulu ka angu, aser Yisui parnok asoshi aria bilema, parnok shirangertem anebtsü. 15Kodang nikongtsütsü atong, nütsüngtemi pa dangi arua ashi, “Ya azüngmeyakdak aser anüa luogo; yimtaki ia parnok sasa chiyungtsü alitsü asoshi telok senshidakjang.” 16Saka Yisui parnok dang ashi, “Parnok aotsü tenüngdaktsü maka; nenoki parnok nem chiyungtsü agüjang.” 17Parnoki pa dang ashi, “Onok yangi amtsük pungu, aser ango ana dang lir.” 18Yisui ashi, “Itemji kü dangi bener arung.” 19Aser pai telokji ai manung amentsü mela; aser pai amtsük pungu aser ango anaji amer, anünglen repranga pai moatsü aser amtsükji sangsa-a pa nütsüngtemi telok nem agütsü. 20Parnoki chir tip-atem aser tanüngba tanüktari agi molok terana sünga parnoki benden. 21Aser chiyungertem tetsür tanur mezüngi, tebur meyi pungu shi liasü.

Tzüma Nung Jajaba

(Mar. 6.45-52; Yoh. 6.15-21)

22Pai teloktem senshidaktsüdang, pei nütsüngtem rong kati tudaktsü aser pa dang tamasa tzü külen jagi odaktsü. 23Aser pai teloktemji senshidaktsür külen pa kija sarasademtsü tenem kati atu. Nikongtsütsü akümdang yangji pa kija liasü. 24Saka tang joko rongji tzüyim tiyong tongya liasü aser tzüsem agi meyipshidakja liasü, kechiaser mopungji tejaklen nungi aon. 25Ankongpang nung Yisu parnok dangi tzüyim ma nung jaja-a aru. 26Kodang nütsüngtemi pa tzüyim ma nung jajaya angu, parnoki aoksa-a ashi, “Yabo tanela ka asütsü” aser parnoki tetsübu agi ayimten. 27Saka idangji Yisui parnok dang jembia ashi, “Tasü itang; niar tetsübu.” 28Peteri Yisu dang langzüa ashi, “Kibuba, ya na süra ni ne dangi tzüma nung jaja-a arutsü mela-ang.” 29Aser pai ashi, “Arung.” Aser Peter rong nungi alu, aser Yisu dangi aotsü asoshi tzüma nung jaja. 30Saka kodang pai mopungji angu, pai tsübu aser tzü telungi aitsü tenzükdang, pai ayimtena ashi, “Kibuba, ni kümzükang.” 31Aser idangyongji Yisui pei teka songtoka pa dak ameter, pa dang ashi, “Oh na tamang tila, kechiba nai atitaker?” 32Kodang parnok rongi atu, mopungji anenadok. 33Aser rong nung alirtemi pa dang külema ashi, “Atangji na Tsüngrem Chir.”

Gennesaret Nung Shiranger Anebtsüba

(Mar. 6.53-56)

34Parnoki tzü atena or Gennesaret lima atong. 35Kodang idakji aliba nisungtemi pa ajitet, parnoki iba linük temeket ajakleni yoka shiranger ajak pa dangi aniten. 36Aser parnoki pa sü sütsüng nung danga kongshidi ta pa dang mepishi. Aser kwikati kongshi parnok ajak anebadok.

Currently Selected:

MATHI 14: AONAGABSI

Highlight

Copy