LUK 20

Yisu Tashi-ain Indang Asüngdangba

(Mat. 21.23-27; Mar. 11.27-33)

1Kenü anogo pai tenla kidang nisungtem dang osangtajungji sayutsüngia aser sayua alidang, tamburtem den puti ungertem aser ozüng sayurtem pa dangi aru, 2aser pa dang asüngdanga ashi, “Onok dang shiang; kechi ain agi nai itemi inyaker? Mesüra ne nem iba ain agütsüba ya shiba?” 3Aser pai parnok dang langzü, “Nia nenok dang o ka asüngdangdi, tang kü dang shiang; 4Yohan Baptitsüba kotak nungi asü mesüra nisung nungi?” 5Parnoki parnok rongnung ashishitepa ashi. “Kotak nungi ta asenoki shira, kechiba nenoki pa dang mamang ta pai ashitsü. 6Ano nisung nungi ta asenoki shira, nisung ajaki asenok dak lung agi aontsü, kechiaser Yohanji ainkar ka ta parnoki amanger.” 7Anungji parnoki langzü, “Paji kong nungiar onoki memetet.” 8Aser Yisui parnok dang ashi, “Kechi ain agi ni itemi inyaker nia nenok dang meshili.”

Tsükmenatzü Lu Nung Inyaker Agi O-entepba

(Mat. 21.33-46; Mar. 12.1-12)

9Aser nisung kar shirnoki pei sasa temeshi ta züngshia pei sasa dak tamang ayur aser tangar sensatsür parnok dang o-entepba pai ashi. 10Aser mapang tatong nung aluyimertemi pa nem tsükmenatzü lu süngjang aongtsü asoshi pai parnok dangi kilir ka yok; saka aluyimertemi pa dak azük aser paji teka tazüng yok. 11Aser ano pai tangar kilir ka yok, aser parnoki pa daka azük aser pa dak maksüa benshir teka tazüng yok 12Ano pai tasembenbuba-a yok saka parnoki pa-a yirutsü aser aridok. 13Aser tsükmenatzü lu kibubai ashi, ‘Ni kechi inyaktsü? Ni kü temeimba jabaso yoktsü, ashiko parnoki pa dangbo akhüm tsübutsü.’ 14Saka kodang aluyimertemi paji angu parnoki jembitepa ashi, ‘Ibai senmangbaji lir; asenoki pa tepsetdi aser senmangji asenok meyong akümtsü.’ 15Parnoki paji tsükmenatzü lu nungi meindok aser paji tepset. Anungji tsükmenatzü lu kiburi parnok dang kechi inyaktsü? 16Pai arutsü aser item aluyimertem samatsütsü aser tsükmenatzü luji tangar nem yimdaktsütsü.” Aser kodang parnoki aji angashi parnoki ashi, “Tsüngremi aji songtemangma.” 17#TKe. 118.22 Saka pai parnok dak repranga ashi, “Ajangla zülua aliba o ya kechi?

‘Kisürtemi koba lung magi aji kinük nung tongtiba aküm.’

18“Iba lung manungji shiba tsükdir pa anüka ajensatsütsü; aser shiba dak iba lung tsükdir, iba jagi pa auyi küma akusatsütsü.”

Kaisar Nem Alimelen Agütsüba

(Mat. 22.15-22; Mar. 12.13-17)

19Aser iba mapang nungjisa ozüng sayurtem aser puti ungertemi pa dak teka aitsü asoshi merang; saka parnoki nisungtem tsübu, kechiaser o-entepbaji pai parnok anema jembi ta parnoki metet. 20Aser governor yimsüsüba aser bangdak tashi nem paji bendanga agütsütsü asoshi pai jembiba nungi langka tai aputsü asoshi temeshi ama sayua itdangitertem parnoki yok aser paji mita ata. 21Aser parnoki pa dang asüngdang, “Nai shitak ashir aser sayur, aser shinga tejak merepranger saka ochi agi Tsüngrem lenmangji sayur ta onoki metet. 22Onoki Kaisar nem alimelen agütsütsü tim asü masü?” 23Saka pai parnok külakba meteta parnok dang ashi, 24“Kü dang adholi ka sayuang. Ya shiba noksa aser shiba tenüng züluba?” Aser parnoki langzü, “Kaisar” 25Anungji pai parnok dang ashi, “Ajangla kechi Kaisar meyong aji Kaisar nem agüjang aser kechi Tsüngrem meyong aji Tsüngrem nem agüjang.” 26Aser parnoki nisungtem tsüngdang pai ashiba nungi langka tai ajiteta pa aputsü mokoki liasü aser pai langzüba nungji parnoki süngmang aser ola madok.

Shia Aruba Indang Asüngdangba

(Mat. 22.23-33; Mar. 12.18-27)

27Aser tasürtem shia marutsü ta jembiba Sadukitem kar pa dangi aru, 28aser parnoki pa dang asüngdang, “Tesayur, nisung ka kinungtsü toktsür techir meli-i süadokra, pa tenui kinungtsüji agitsüla aser pa tedi asoshi metsü adokdaktsütsüla ta Mosai onok nem zülua toktsü. 29Tang adianu tenet liasü. Mezüngbubai kinungtsü ka agi aser techir meli-i süadok; 30aser tanabuba aser tasembubai la agi, 31yamaji tenetpronglai techir metoktsüi asü. 32Aser tesülen tetsürlajia asü. 33Anungji tasürtem shia aruba mapang nung laji shiba kinungtsü asütsü? Kechiaser parnok tenetpronglai laji kinungtsü asütsü agi.” 34Aser Yisui parnok dang ashi, “Iba lima chirtemi ki ayimer aser kiyi-i aor; 35saka parnok shir kotak lima aser shia aruba ngutettsüsa temsüa lir parnokji ki mayimer aser kiyi-i meyoker. 36Aser parnok asütsü makok, kechiaser parnok kotak tenyartem den kasa, aser tasü nungi shia aruba chirtem asünung, parnok Tsüngrem chirtem lir. 37#Ani. 3.6 Aser süngsem indang Lai nungto kong Mosai Kibuba dang Abraham Tsüngrem, Isak Tsüngrem aser Yakob Tsüngrem ta aja, iba jagi tasürtem shia arubaji lir ta sayur.”

38Anungji pa tasürtem Tsüngrem masü, saka akümlirtem Tsüngrem; kechiaser ajak pa ajanga taküm alir.” 39Aser ozüng sayurtem kari langzü, “Tesayur, nai junga shiogo.” 40Joko parnoki pa dang tasüngdangba tali asüngdangtsü kecha temulung moulutet.

Khrista Indang Tasüngdangba

(Mat. 22.41-46; Mar. 12.15-37)

41Saka pai parnok dang ashi, “Khristaji Dawid chir ta parnoki koda ashir? 42Kechiaser Dawidi pei sasa Tenüngsang Ken kaket nung ashi,

‘Kibubai kü Kibuba dang ashi,

ni ne tsükchir ne tsüng kübok mayu tashi

43 # TKe. 110.1 na kü tajichilen menang.’

44Anungji Dawidi pa dang Kibuba ta jara, ajangla Khristaji koda Dawid chir asütsü?”

Tezülurtem Anema Aitsüba

(Mat. 23.1-36; Mar. 12.38-40)

45Aser nisung ajaki angashia pai nütsüngtem dang ashi, 46“Tezülurtem asoshi kümdangang; shiri sü talanglang abener jajanür, aser shishidak salem aginür aser sinagog nung temaba menden aginür; aser yimpoksüdak tamaren menden aginür; 47Shiri amitsür ki chimar, aser anemsü agi talanglang sarasademer; parnoki tai tuluba angutsü.”

Currently Selected:

LUK 20: AONAGABSI

Highlight

Copy